ന്യൂയോര്ക്ക്: ലൈംഗികാതിക്രമ കേസില് കുറ്റക്കാരനെന്നു കോടതി കണ്ടെത്തിയ ഹോളിവുഡ് ചലച്ചിത്ര നിര്മാതാവ് ഹാര്വി വെയ്ന്സ്റ്റൈന് 23 വര്ഷം തടവ്. ന്യൂയോര്ക്ക് സുപ്രീം കോടതിയാണ് വെയ്ന്സ്റ്റീന് രണ്ടു കേസുകളില് ശിക്ഷ വിധിച്ചത്. വെയ്ന്സ്റ്റീന് ലൈംഗിക കുറ്റകൃത്യവും ബലാത്സംഗവും നടത്തിയെന്നാണു കോടതിയുടെ കണ്ടെത്തല്. അതിക്രൂരമായ ലൈംഗിക പീഡനം നടത്തിയെന്ന കുറ്റം കോടതി തള്ളി.
വെയ്ന്സ്റ്റീനെതിരെ ഉയര്ന്ന അഞ്ചു ലൈംഗിക ആരോപണങ്ങളാണ് കോടതി പരിശോധിച്ചത്. ഇതില് പ്രൊഡക്ഷന് അസിസ്റ്റന്റ് മിമി ഹലെയി ലൈംഗിക അതിക്രമത്തിനിരയായ സംഭവത്തിലും പേരു വെളിപ്പെടുത്താത്ത മറ്റൊരു സ്ത്രീ പീഡിപ്പിക്കപ്പെട്ട കേസിലുമാണ് വെയ്ന്സ്റ്റീന് കുറ്റക്കാരനാണെന്ന് കോടതി കണ്ടെത്തിയത്. വിചാരണയ്ക്കിടെ ആറു സ്ത്രീകള് അവരെ ഹാര്വി വെയ്ന്സ്റ്റീന് ലൈംഗികമായി പീഡിപ്പിച്ചതായി സാക്ഷിപ്പെടുത്തി.
ആഞ്ജലീന ജോളിയും ഗിനത്ത് പാള്ട്രൊയും ഉള്പ്പെടെ ഹോളിവുഡിലെ പ്രശസ്ത നടിമാരും മോഡലുകളും ഉള്പ്പെടെ എണ്പതോളം പേരാണ് വെയ്ന്സ്റ്റീനെതിരെ ലൈംഗിക ആരോപണവുമായി രംഗത്തെത്തിയത്. ഹോളിവുഡിലെ കാസ്റ്റിംഗ് കൗച്ച് തുറന്നു കാട്ടുന്നതായിരുന്നു ഈ ആരോപണങ്ങളെല്ലാം. പിന്നീട് മറ്റു നിരവധി നടിമാരും വെയ്ന്സ്റ്റീന്റെ അതിക്രമങ്ങള് തുറന്നുപറഞ്ഞിരുന്നു. 2017 ഒക്ടോബറില് ന്യൂയോര്ക്ക് ടൈംസും ന്യൂയോര്ക്കറുമാണ് മിറാമാക്സ് സ്റ്റുഡിയോയുടെ സ്ഥാപകനായ വെയ്ന്സ്റ്റീനെതിരായ ആരോപണങ്ങള് വെളിച്ചത്തു കൊണ്ടുവന്നത്. ഇതിനുപിന്നാലെയാണു സ്ത്രീകളുടെ വെളിപ്പെടുത്തലുണ്ടായത്.
