തിരുവനന്തപുരം: യുവ ഐഎഎസുകാര് ഉള്പ്പെടെ പ്രതിഷേധം ഉയര്ത്തിയതിന് പിന്നാലെ സര്വെ ഡയറക്ടര് വി.ആര്. പ്രേംകുമാറിന്റെ സ്ഥലംമാറ്റത്തില് നിന്ന് സര്ക്കാര് പിന്മാറുന്നു. മെഡിക്കല് അവധിയിലായിരുന്ന പ്രേംകുമാര് തിരികെ ജോലിയില് പ്രവേശിച്ചതിനു പിന്നാലെ റവന്യൂ വകുപ്പില് നിന്ന് ചീഫ് സെക്രട്ടറിയുടെ ഓഫീസ് സ്ഥിരീകരണം തേടി.
കഴിഞ്ഞ ബുധനാഴ്ച ചേര്ന്ന മന്ത്രിസഭാ യോഗത്തിലാണ് പ്രേകുമാറിനെ സര്വെ ഡയറക്ടര് സ്ഥാനത്ത് നിന്നു സ്ഥലംമാറ്റാന് തീരുമാനിച്ചത്. റവന്യൂ വകുപ്പ് അഡീഷണല് ചീഫ് സെക്രട്ടറി ഡോ.വി. വേണു സ്ഥലം മാറ്റത്തെ ചോദ്യം ചെയ്ത് ചീഫ് സെക്രട്ടറിക്ക് കുറിപ്പ് നല്കി. ഇതോടെ സംഭവം വിവാദമായി. മന്ത്രിസഭാ യോഗ തീരുമാനത്തെ ചോദ്യം ചെയ്ത വേണുവിനെതിരെ നടപടി വേണമെന്നാവശ്യപ്പെട്ട് ചില മന്ത്രിമാരുമെത്തി. പിന്നാലെ യുവ ഐഎഎസ് ഓഫീസര്മാരും പ്രതിഷേധമുയര്ത്തി. മുതിര്ന്ന ഐഎഎസ് ഉദ്യോഗസ്ഥരോട് പ്രതിഷേധം അറിയിച്ചു. ഇതോടെയാണ് സ്ഥലം മാറ്റം തത്കാലം വേണ്ടതില്ലെന്ന തീരുമാനത്തില് സര്ക്കാര് എത്തിയതെന്നാണ് സൂചന.
പ്രേംകുമാര് ഫെബ്രുവരി 14 മുതലാണ് മെഡിക്കല് അവധിയെടുത്തത്. ഫെബ്രുവരി 26ന് ഫിറ്റ്നസ് സര്ട്ടിഫിക്കറ്റ് ഹാജരാക്കി ജോലിയില് തിരികെ പ്രവേശിച്ചു. ഈ വിവരം ചീഫ് സെക്രട്ടറി അറിയാതെ പോയതിനാലാണ് സ്ഥലംമാറ്റമുണ്ടായതെന്നാണ് അദ്ദേഹത്തിന്റെ ഓഫീസിന്റെ വിശദീകരണം. ഐഎഎസ്സുകാര്ക്കിടയിലുള്ള അതൃപ്തിയും പ്രതിഷേധവും സര്ക്കാര് പദ്ധതികളെ സാരമായി ബാധിക്കുമെന്ന നിരീക്ഷണം കൂടി വന്നതോടെയാണ് സര്ക്കാരിന്റെ പിന്മാറ്റം.
