കൊട്ടിയം: വീട്ടില്‍ നിന്നു കാണാതായി പിറ്റേദിവസം മൃതദേഹം കണ്ടെത്തിയ ദേവനന്ദയുടെ മരണം പുതിയ വഴിത്തിരിവിലേക്ക്. ഫോറന്‍സിക് സംഘത്തിന്റെ പ്രാഥമിക റിപ്പോര്‍ട്ടില്‍ ദേവനന്ദ മുങ്ങി മരിച്ചത് തടയണയ്‌ക്ക് സമീപമെല്ലന്ന നിഗമനമാണ്. വീടിനു സമീപത്തെ കുളിക്കടവിലായിരിക്കാം അപകടം നടന്നതെന്ന നിഗമനത്തിലാണ് ഫോറന്‍സിക് സംഘം.
സംഭവസ്ഥലത്തെ പരിശോധനയ്‌ക്ക് ശേഷമാണ് സംഘം ഈ നിഗമനത്തിലെത്തിയത്. വീടിനു സമീപത്തുള്ള കല്‍പ്പടവില്‍ നിന്നാകാം കുട്ടി ആറ്റില്‍ വീണതെന്നാണ് സംശയം. ദേവനന്ദയുടെ മരണത്തിലെ സംശയം നീക്കാനാണ് പോലീസിന്റെ അഭ്യര്‍ഥന പ്രകാരം ഫോറന്‍സിക് സംഘം കഴിഞ്ഞ ദിവസം പള്ളിമണ്‍ ഇളവൂരില്‍ പരിശോധന നടത്തിയത്. വീടിനു 75 മീറ്റര്‍ മാത്രം ദൂരത്തുള്ള കുളക്കടവിലാകാം ദേവനന്ദ ആറ്റില്‍ അകപ്പെട്ടതെന്ന് റിപ്പോര്‍ട്ടില്‍ പറയുന്നു. കുട്ടി വീണതാണോ അപായപ്പെടുത്തിയതാണോ എന്നത് വ്യക്തമല്ലെന്നും റിപ്പോര്‍ട്ടില്‍ സൂചനയുണ്ട്.
കുളിക്കടവില്‍ മുങ്ങിത്താണ കുട്ടി പുഴയുടെ ആഴമേറിയ ഭാഗത്ത് എത്തപ്പെടാം. അടിയൊഴുക്കുണ്ടായിരുന്ന പുഴയിലൂടെ മൃതദേഹം ഒഴുകി മാറാം. തടയണയുടെ അടിയിലൂടെ ഒഴുകിയ മൃതദേഹം 300 മീറ്റര്‍ അകലെ പൊങ്ങുകയായിരുന്നുവെന്നാണ് ഫോറന്‍സിക് സംഘത്തിന്റെ നിഗമനം. കുട്ടിയുടെ വയറ്റില്‍ ചെളിയുടെ അംശം കൂടുതലായിരുന്നു. തടയണയ്‌ക്ക് സമീപത്താണ് കുട്ടി ആറ്റില്‍ അകപ്പെട്ടതെങ്കില്‍ വയറ്റിലെ ചെളിയുടെ അംശം ഇത്രത്തോളമുണ്ടാകില്ലായിരുന്നെന്നും മൃതദേഹം മറ്റേതെങ്കിലും സ്ഥലത്തേ പൊങ്ങാന്‍ സാധ്യതയുള്ളെന്നും ഫോറന്‍സിക് സംഘം കണ്ടെത്തി.
ദേവനന്ദയുടെ വീട്ടില്‍ നിന്ന് ബണ്ടിലേക്ക് 220 മീറ്ററുണ്ട്. കുളിക്കടവിലോ വീട്ടില്‍ നിന്ന് 100 മീറ്റര്‍ ദൂരത്തിനിടയിലോ അപകടം സംഭവിച്ചിരിക്കാനുള്ള സാധ്യതയാണ് ഫോറന്‍സിക് സംഘം പരിഗണിക്കുന്നത്. ദുര്‍ഘടം പിടിച്ച ഈ വഴിയില്‍ പതിയിരിക്കുന്ന അപകട സാധ്യതയും വിദഗ്ധര്‍ വിലയിരുത്തി. ബണ്ടിനു സമീപത്തുവച്ച് അപകടം സംഭവിച്ചിരുന്നെങ്കില്‍ നല്ല ഒഴുക്കുള്ള സമയമായതിനാല്‍ മൃതദേഹം ബണ്ടിനു സമീപത്തുനിന്ന് ലഭിക്കുമായിരുന്നില്ല. മുങ്ങി മരിച്ചപ്പോള്‍ തന്നെ ദേവനന്ദ ചെളിയില്‍ താഴ്ന്നുപോകാനും ഇടയുണ്ടായിരുന്നു. ജലപരപ്പില്‍ പൊങ്ങി ഒഴുക്കില്‍പ്പെട്ട് ബണ്ടിന്റെ അപ്പുറത്തേക്ക് കടന്ന് മുള്ളുവള്ളിയില്‍ കുടുങ്ങി നിന്നത് മൃതദേഹം അഴുകി തുടങ്ങിയപ്പോഴാണെന്നും ഫോറന്‍സിക് സംഘത്തിന്റെ റിപ്പോര്‍ട്ടില്‍ പറയുന്നു. തിരുവനന്തപുരം മെഡിക്കല്‍ കോളേജിലെ ഫോറന്‍സിക് മേധാവി ഡോ.കെ. ശശികലയുടെ നേതൃത്വത്തിലുള്ള ഫോറന്‍സിക് വിദഗ്ധരുടെ മൂന്നംഗ സംഘം ഇത്തിക്കര ആറ്റിന്റെ കൈവരിയായ പള്ളിമണ്‍ ആറും പരിസരപ്രദേശങ്ങളും ദേവനന്ദയുടെ വീടും സന്ദര്‍ശിച്ചിരുന്നു. ഇതിന് ശേഷമാണ് ഈ നിഗമനം. ഫോറന്‍സിക് സംഘത്തിന്റെ പൂര്‍ണമായ പരിശോധനാഫലം തിങ്കളാഴ്ച അന്വേഷണസംഘത്തിനു കൈമാറും.
അതേസമയം, പ്രദേശത്ത് ശിശുമനഃശാസ്ത്രജ്ഞരെ എത്തിച്ച് പരിശോധിപ്പിക്കാനാണ് പോലീസ് തീരുമാനം. ഇതിനായി ഉടന്‍ കത്ത് നല്‍കാനാണ് അന്വേഷണസംഘത്തിന്റെ തീരുമാനം. കുടവട്ടൂരിലെ അച്ഛന്റെ വീട്ടില്‍ ഒരുവര്‍ഷം മുമ്പ് ദേവനന്ദ പറയാതെ പോയ വഴികളും ഫോറന്‍സിക്ക് സംഘം പരിശോധിച്ചിരുന്നു. ഇളവൂരിലും ദേവനന്ദ തനിയെ പോകാനുള്ള സാധ്യതയാണ് സംഘം പരിശോധിക്കുന്നത്.
