തിരുവനന്തപുരം: കൊറോണ ഭീതിയുടെ പേരില്‍ ഇക്കൊല്ലം ആറ്റുകാല്‍ പൊങ്കാല ഒഴിവാക്കണമെന്ന് ആവശ്യപ്പെട്ട് ഏഷ്യാനെറ്റ് ന്യൂസ് എഡിറ്റര്‍ എം.ജി. രാധാകൃഷ്ണന്‍. ഫേസ്ബുക്ക് പോസ്റ്റിലൂടെയായിരുന്നു രാധാകൃഷ്ണന്റെ പ്രതികരണം. കോവിഡ് 19 പകര്‍ച്ച വ്യാധിയുടെ പേരില്‍ ലോകത്ത് ഒഴിവാക്കിയ ആഘോഷങ്ങളുടെ പട്ടിക നിരത്തിയായിരുന്നു പോസ്റ്റ്. എന്നാല്‍, ഈ പോസ്റ്റിനു താഴെ രൂക്ഷ വിമര്‍ശനവുമായി ഭക്തര്‍ രംഗത്തെത്തി. എല്ലാ വെള്ളിയാഴ്ചകളിലേയും ജുമ നമസ്‌കാരം ഒഴിവാക്കണമെന്നും ഞായറാഴ്ചകളിലെ കുര്‍ബാന ഒഴിവാക്കണമെന്ന് പറയാത്തത് എന്തെന്നുമായിരുന്നു മിക്കവരുടേയും ചോദ്യം.
പോസ്റ്റിന്റെ പൂര്‍ണ രൂപം- മനുഷ്യരാശി സമീപകാലത്ത് നേരിടുന്ന ഏറ്റവും ഗുരുതരമായ ഭീഷണി ആയി വളരുകയാണ് കൊ വിഡ് 19 എന്ന കൊറോണ വൈറസ് പകര്‍ച്ചവ്യാധി . ആറ് ഭൂഖണ്ഡങ്ങളിലായി 80 ലേറെ രാജ്യങ്ങളിലെ ഒരു ലക്ഷത്തോളം പേര്‍ക്ക് രോഗം രേഖപ്പെടുത്തിക്കഴിഞ്ഞു. മൂവായിരത്തോളം പേര്‍ മരിച്ചിട്ടുണ്ട്. ഇന്ത്യയില്‍ ആദ്യമായി രോഗബാധ റിപ്പോര്‍ട്ട് ചെയ്തത് കേരളത്തിലാണ്. കേരളത്തിന്റെ രോഗ പ്രതിരോധ ശ്രമങ്ങള്‍ ലോകത്തിന്റെ പ്രശംസ നേടുന്നുമുണ്ട്. ജനം കൂട്ടം കൂടുന്ന ഇടങ്ങളും പരിപാടികളും ആണ് രോഗബാധയ്‌ക്ക് ഏറ്റവും സാധ്യതയുള്ളത്. ലോകരാജ്യങ്ങളെല്ലാം അതുകൊണ്ട് ആയിരത്തിലേറെ പേരെങ്കിലും എത്താനിടയുള്ള എല്ലാ പരിപാടികളും റദ്ദാക്കിക്കഴിഞ്ഞു. ഇതില്‍ ടോക്യോയില്‍ ജൂലായില്‍ നിശ്ചയിച്ച ഒളിമ്പിക്‌സും പെടാനിടയുണ്ട്. ചൈനയിലും ജപ്പാനിലും ഹോങ്കോങ്ങിലും മറ്റും എല്ലാ സ്‌കൂളുകളും പൂട്ടി. പ്രശസ്തമായ വിവിധ ആഗോള കലാകായിക പരിപാടികള്‍ റദ്ദാക്കിയിട്ടുണ്ട്.
രോഗ പ്രതിരോധത്തിന് ലോകം പ്രശംസിക്കുന്ന കേരളത്തില്‍ ഏറ്റവും അധികം ജനങ്ങള്‍ ഒന്നിച്ചുകൂടുന്ന ആറ്റുകാല്‍ പൊങ്കാല മാര്‍ച്ച് 9 നാണ്. അടിയന്തിരമായി തന്നെ ഇക്കൊല്ലത്തെ പൊങ്കാല ഒഴിവാക്കേണ്ടത് ഒരു വലിയ അപകട സാധ്യത ഇല്ലാതാക്കാന്‍ അത്യന്താപേക്ഷിതമാണ്. ഇന്ത്യയില്‍ ഈ പകര്‍ച്ചവ്യാധി പടരാന്‍ ഏറ്റവും സാധ്യത ഉള്ള ഇടമെന്ന നിലക്ക് കേരളം അത് തീരുമാനിച്ചില്ലെങ്കില്‍ അത് നമ്മുടെ ഏറ്റവും ഗുരുതരമായ അബദ്ധങ്ങളില്‍ ഒന്നാകും. ഇക്കൊല്ലത്തെ ഉംറ തീര്‍ത്ഥാടനം സൗദി അറേബ്യ റദ്ദാക്കിയത് മനസ്സിലാക്കുക. പ്രധാനമന്ത്രിയും കേന്ദ്ര ആഭ്യന്തര മന്ത്രിയും ഹോളി ആഘോഷങ്ങള്‍ ഒഴിവാക്കണമെന്ന് നിര്‍ദ്ദേശിച്ചത് മനസ്സിലാക്കുക.
കൊറോണ ബാധ മൂലം വിവിധ രാജ്യങ്ങളില്‍ ഇതിനകം റദ്ദാക്കിയ ചില പ്രമുഖ പരിപാടികള്‍.
ബര്‍ലിന്‍ ടൂറിസം ഫെയര്‍
ജനീവ മോട്ടോര്‍ ഷോ
ബാഴ്‌സലോണ മൊബൈല്‍ കോണ്‍ഗ്രസ്
ഗ്രീസ് കാര്‍ണിവല്‍
ഖത്തര്‍ മോട്ടോര്‍ ഗ്രാന്റ് പ്രി
സൗദി ഉംറ
പാരീസ് ലൂവ്ര്‍ മ്യൂസിയം അടച്ചു.
മിലാന്‍ ലാ സ്‌കാല ഒപ്പേറാ ഹൗസ് അടച്ചു.
