കൊല്ലം: കൊല്ലം പുത്തുർ മാവടിയിൽ പാമ്പ് കടിയേറ്റ് അഞ്ച് വയസുകാരൻ മരിച്ചു. ആറ്റുവാശ്ശേരി തെങ്ങുവിള മണിമന്ദിരത്തിൽ മണിക്കുട്ടന്റെ മകൻ ശിവജിത്താണ് മരിച്ചത്. മാതാപിതാക്കൾക്കൊപ്പം ഉറങ്ങിക്കിടക്കവെ പുലർച്ചെ അഞ്ചു മണിയോടെയാണ് പാമ്പ് കടിച്ചത്.
ഉറക്കത്തിൽ എന്തോ കടിച്ചെന്ന് കുട്ടി അമ്മയോട് പറഞ്ഞിരുന്നു. പരിശോധിച്ചപ്പോൾ കാലിൽ രണ്ട് പാടുകളും ചോരവരുന്നതും ശ്രദ്ധയിൽപ്പെട്ടിരുന്നു. ഉടൻ അടുത്തുള്ള വൈദ്യന്റെ ചികിത്സ തേടുകയും ചെയ്തിരുന്നു. എന്നാൽ അല്പസമയത്തിനകം കുട്ടിയുടെ നില വഷളാവുകയായിരുന്നു.
കുട്ടിയെ അടുത്തുള്ള സ്വകാര്യ ആശുപത്രിയിലും പിന്നീട് കൊട്ടാരക്കര താലൂക്ക് ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. മാവടി ജി.എൽ.പി.എസ് സ്കൂളിലെ എൽകെജി വിദ്യാർത്ഥിയാണ് ശിവജിത്ത്.
