ന്യൂദല്ഹി: വടക്കു കിഴക്കന് ദല്ഹിയിലെ കലാപത്തില് പാര്ലമെന്റില് പ്രതിപക്ഷ ബഹളവും കൈയാങ്കളിയും. രാജ്യസഭയും ലോക്സഭയും പല തവണ നിര്ത്തിവയ്ക്കേണ്ടി വന്നു. നടപടികള് തുടരാകാനാത്ത സാഹചര്യത്തില് പിന്നീട് സഭ പിരിഞ്ഞു. കലാപം ചര്ച്ച ചെയ്യണമെന്നായിരുന്നു പ്രതിപക്ഷ പാര്ട്ടികളുടെ ആവശ്യം. ഇക്കാര്യം ചൂണ്ടിക്കാട്ടി ഇരുസഭകളിലും പ്രതിപക്ഷം നോട്ടീസ് നല്കിയിരുന്നു. കലാപ പ്രദേശങ്ങള് പൂര്ണമായും സമാധാനത്തിലേക്ക് മടങ്ങിയെത്തിയതിന് ശേഷം ചര്ച്ചയാകാമെന്ന് സര്ക്കാര് വ്യക്തമാക്കിയെങ്കിലും പ്രതിപക്ഷം അടങ്ങിയില്ല. വിഷയം ഗൗരവമുള്ളതാണെന്നും ചര്ച്ചയ്ക്ക് സമയം നല്കുമെന്നും രാജ്യസഭാ ഉപാധ്യക്ഷന് വെങ്കയ്യ നായിഡു വ്യക്തമാക്കി. സമാധാനം പുനഃസ്ഥാപിക്കുന്നതിനാകണം പ്രഥമ പരിഗണന. ഇത്തരം കലാപങ്ങള് എങ്ങനെ തടയാമെന്നത് ഉള്പ്പെടെ അതിന് ശേഷം ചര്ച്ച ചെയ്യാം. അദ്ദേഹം ചൂണ്ടിക്കാട്ടി. ഇപ്പോള് അനുയോജ്യമായ സമയമല്ലെന്നും സാഹചര്യം മെച്ചപ്പെടുന്നത് വരെ കാത്തിരിക്കണമെന്നും ലോക്സഭയില് സ്പീക്കര് ഓം ബിര്ള പറഞ്ഞു. എന്നാല്, പ്രതിപക്ഷം ബഹളം തുടര്ന്നതോടെ ലോക്സഭ രണ്ട് മണിവരെ നിര്ത്തിവച്ചു.
വീണ്ടും സഭ ചേര്ന്നപ്പോള് അമിത് ഷായുടെ രാജി ആവശ്യപ്പെടുന്ന പ്ലക്കാര്ഡുകളുമായാണ് പ്രതിപക്ഷ അംഗങ്ങളെത്തിയത്. ഇവര് മുദ്രാവാക്യം വിളികള് ആരംഭിച്ചു. സ്പീക്കര് ശാന്തരായിരിക്കാന് ആവശ്യപ്പെട്ടെങ്കിലും ഫലമുണ്ടായില്ല. ബിജെപി എംപി സഞ്ജയ് ജയ്സ്വാള് സംസാരിച്ചുകൊണ്ടിരിക്കുമ്പോള് കോണ്ഗ്രസ് അംഗങ്ങളായ ഗൗരവ് ഗൊഗോയ്, നവനീത് സിങ് ബിട്ടു എന്നിവര് അമിത് ഷായുടെ രാജി ആവശ്യപ്പെടുന്ന കറുത്ത ബാനര് പിടിച്ച് ഭരണ ബെഞ്ചിലേക്ക് ചെന്നു. ചിലര് ബിജെപി അംഗങ്ങള്ക്ക് നേരേ പേപ്പര് കീറിയെറിഞ്ഞു. ബിജെപിയുടെ രമേഷ് ബിദൂരി ഉള്പ്പെടെയുള്ള അംഗങ്ങള് മടങ്ങിപ്പോകാന് ആവശ്യപ്പെട്ട് ഇവരെ തള്ളി. ഇതോടെ ഉന്തും തള്ളുമായി. ഇത്തരം സാഹചര്യങ്ങളില് സഭ പ്രവര്ത്തിപ്പിക്കാന് താത്പര്യമില്ലെന്ന് ചൂണ്ടിക്കാട്ടിയ സ്പീക്കര് നടപടികള് നിര്ത്തിവച്ചു. ജനങ്ങള് ഇതൊക്കെ കാണുകയാണ്. ജനാധിപത്യത്തിന്റെ ശ്രീകോവിലാണിത്. ഇവിടെ ചില നിയമങ്ങള് പാലിക്കേണ്ടതുണ്ട്. നടുത്തളത്തിലേക്ക് വരാന് പാടുള്ളതല്ല. അദ്ദേഹം ഓര്മ്മപ്പെടുത്തി. തുടര്ന്ന് മൂന്ന് മണിക്ക് വീണ്ടും ചേര്ന്നെങ്കിലും ബഹളം കാരണം പിരിഞ്ഞു.
കോണ്ഗ്രസ് അംഗങ്ങളുടെ മോശം പെരുമാറ്റത്തെ അപലപിച്ച പാര്ലമെന്ററികാര്യമന്ത്രി പ്രഹ്ലാദ് ജോഷി കലാപത്തിന് പ്രേരണ നല്കിയവരാണ് ഇപ്പോള് ബഹളമുണ്ടാക്കുന്നതെന്ന് കുറ്റപ്പെടുത്തി. 1984ല് മൂവായിരത്തിലേറെ പേരെ കൊലപ്പെടുത്തി അന്വേഷണം പോലും നടത്താത്തവരാണ് ഇവര്. സമാധാനം പുനഃസ്ഥാപിക്കാനാണ് ശ്രമിക്കുന്നത്. എന്നാല് സംഘര്ഷമുണ്ടാക്കാനാണ് പ്രതിപക്ഷത്തിന്റെ ശ്രമം. കോണ്ഗ്രസ് അംഗങ്ങള്ക്കെതിരെ നടപടിയാവശ്യപ്പെട്ട് ബിജെപി അമിത് ഷായുടെ നേതൃത്വത്തില് സ്പീക്കറെ കണ്ടു. ഇതിനിടെ; തന്നെ ബിജെപി വനിതാ എംപി മര്ദ്ദിച്ചതായി രമ്യാ ഹരിദാസ് ആരോപിച്ചു. സ്പീക്കറുടെ ഇരിപ്പിടത്തില് ബാനര് വച്ചതിന് ടി.എന്. പ്രതാപനെ താക്കീത് ചെയ്തു.
