കോഴിക്കോട്: കൂടത്തായി കൊലപാതകക്കേസ് മുഖ്യപ്രതി ജോളി ജെയിലില് വെച്ച് ആത്മഹത്യാ ശ്രമം നടത്തി. ഇന്ന് പുലര്ച്ചെ നാലരയോടെയാണ് സംഭവം. കൈയിലെ ഞരമ്പ് മുറിച്ച് ആത്മഹത്യയ്ക്ക് ശ്രമിക്കുകയായിരുന്നു. ജോളിയുടെ കൈയില് നിന്നു രക്തം വാര്ന്ന് ഒഴുകുന്നത് ശ്രദ്ധയില്പെട്ട സഹ തടവുകാരാണ് ജയില് അധികൃതരെ വിവരമറിയിച്ചത്.
തുടര്ന്ന് ഉടന് തന്നെ കോഴിക്കോട് മെഡിക്കല് കോളേജില് പ്രവേശിപ്പിക്കുകയായിരുന്നു. രക്തം വാര്ന്നുപോയെങ്കിലും ജോളിയുടെ പരിക്ക് ഗുരുതരമല്ല. ബ്ലെയിഡ് പോലുള്ള ആയുധം ഉപയോഗിച്ചാണ് ജോളി ആത്മഹത്യാശ്രമം നടത്തിയതെന്ന് കണ്ടെത്തിയിട്ടുണ്ട്.
അതേസമയം ജയിലിനുള്ളില് ജോളിക്ക് ആയുധം ലഭിച്ചത് ഗുരുതരമായ സുരക്ഷാവീഴ്ചയാണ്. ജയിലിലെ മറ്റ് പ്രതികളുടെ സഹായം ഇതിന് ജോളിക്ക് ലഭിച്ചിട്ടുണ്ടോയെന്നും അന്വേഷിക്കുന്നുണ്ട്. എന്നാല് ജോളി സ്വയം കൈയ്യില് കടിച്ച് മുറിവേല്പ്പിച്ചതാണെന്നും ജയിലില് തിരച്ചില് നടത്തിയെങ്കിലും ആയുധങ്ങളൊന്നും കണ്ടെത്തിയില്ലെന്നുമാണ് കോഴിക്കോട് ജില്ലാ ജയില് സൂപ്രണ്ട് ജയകുമാര് പ്രതികരിച്ചത്.
ജോളി ഇതിന് മുമ്പും ജീവനൊടുക്കാന് ശ്രമിച്ചതായി റിപ്പോര്ട്ടുകളുണ്ട്. ഈ പ്രവണത കണക്കിലെടുത്ത് പ്രതി മെഡിക്കല് കോളേജിലെ മനശാസ്ത്ര വിദഗ്ധരുടെ കൗണ്സിലിങ്ങിന് വിധേയയാക്കിയതാണ്.
