കോഴിക്കോട്: ജയിലിൽ കിടക്ക വേണമെന്ന ആവശ്യവുമായി കൂടത്തായി കൂട്ടക്കൊലക്കേസിലെ ഒന്നാം പ്രതി ജോളി. ചൊവ്വാഴ്ച കേസ് കോടതി പരിഗണിച്ചപ്പോഴാണ് ജോളി ഈ ആവശ്യം ഉന്നയിച്ചത്. എന്നാൽ ഇക്കാര്യം ജയിലധികൃതരുടെ മുന്നില്‍ അറിയിക്കണമെന്ന് കോടതി നിര്‍ദേശിച്ചു. കോടതി നിര്‍ദേശപ്രകാരമേ പുതപ്പും കമ്ബിളിവസ്ത്രങ്ങളും നല്‍കാന്‍ കഴിയൂ എന്ന് ജയിലധികൃതര്‍ നേരത്തേ അറിയിച്ചിരുന്നു. ഇക്കാര്യത്തില്‍ ഇടപെടുന്നില്ലെന്നും കോടതി അറിയിച്ചു.
പോലീസ് ചോദ്യം ചെയ്യലിനിടെ പിടിച്ചെടുത്ത മൊബൈല്‍ ഫോണ്‍ മകള്‍ക്ക് ഓണ്‍ലൈന്‍ പഠനത്തിന് തിരിച്ചുകിട്ടണമെന്ന് കേസിലെ രണ്ടാംപ്രതി എം.എസ്. മാത്യു അപേക്ഷ നൽകിയിട്ടുണ്ട്. കേസ് പരിഗണിക്കുന്നത് പ്രിന്‍സിപ്പല്‍ ജില്ല സെഷന്‍സ് ജഡ്ജി പി.രാഗിണി ഡിസംബര്‍ ഒമ്പതിന് മാറ്റി. എന്നാല്‍, ഫോണ്‍ കണ്ടെടുത്തിട്ടില്ലെന്ന് പോലീസ് കോടതിയെ അറിയിച്ചു. കോടതിയില്‍ പോലീസ് ഫോണ്‍ ഹാജരാക്കിയിട്ടില്ല. ഈ സാഹചര്യത്തില്‍ എന്ത് ചെയ്യാനാകുമെന്ന് കോടതി സംശയം പ്രകടിപ്പിക്കുകയും ചെയ്തു.
എന്നാല്‍, തന്റെ പക്കല്‍നിന്ന് പോലീസ് ഫോണ്‍ വാങ്ങിയെന്ന വാദത്തില്‍ മാത്യു ഉറച്ചുനിന്നു. അന്വേഷണച്ചുമതലയുണ്ടായിരുന്ന ഡിവൈ.എസ്.പിയാണ് വാങ്ങിയത്. ടവര്‍ ലൊക്കേഷന്‍ നോക്കി ഫോണ്‍ കണ്ടെത്തണമെന്നും മാത്യു ആവശ്യപ്പെട്ടു. ഇക്കാര്യത്തില്‍ മാത്യുവിന് സൈബര്‍ സെല്ലിനെ സമീപിക്കാമെന്ന് കോടതി നിര്‍ദേശിച്ചു. ജോളിയുടെ ആത്മഹത്യ ശ്രമക്കേസും പരിഗണിച്ച കോടതി കുറ്റപത്രം വായിച്ചുകേള്‍പ്പിക്കാന്‍ 21ന് മാറ്റി.
