തിരുവനന്തപുരം: സംസ്ഥാനത്തെ ചൂട് വര്ധിക്കുന്നതിന്റെ പശ്ചാത്തലത്തില് ദുരന്ത നിവാരണ അതോറിറ്റി സംസ്ഥാനത്തെ പൊതുജനങ്ങള്ക്കായി മുന്കരുതല് നിര്ദേശങ്ങള് പുറപ്പെടുവിച്ചു. പലയിടങ്ങളിലും ദിനാന്തരീക്ഷ താപനില രണ്ട് മുതല് മൂന്ന് ഡിഗ്രിസെല്ഷ്യസ് വരെ കൂടി 37 ഡിഗ്രി സെല്ഷ്യസ് വരെ എത്തി. കേന്ദ്ര കാലാവസ്ഥ വകുപ്പിന്റെ താപനില മാപിനികളില് ജനുവരി, ഫെബ്രുവരി മാസങ്ങളില് ഇതുവരെ രേഖപ്പെടുത്തപ്പെടുത്തിയ ഉയര്ന്ന ദിനാന്തരീക്ഷ താപനിലകള് സര്വകാല റെക്കോര്ഡുകള് ഭേദിക്കുന്നതിന്റെ പശ്ചാത്തലത്തിലുമാണ് നിര്ദേശം.
കടലോര സംസ്ഥാനമായതിനാല് ഉയര്ന്ന അന്തരീക്ഷ ആര്ദ്രതയും താപസൂചിക ഉയര്ത്തും. അതിനാല് സൂര്യതാപം, സൂര്യാഘാതം തുടങ്ങിയ ഗുരുതരമായ ആരോഗ്യ പ്രശ്നങ്ങളെ നേരിടാനുള്ള മുന്കരുതലുകളാണ് നിര്ദേശിച്ചിട്ടുള്ളത്.
നിര്ദേശങ്ങള്
- ധാരാളമായി വെള്ളം കുടിക്കുക. കുപ്പിയില് വെള്ളം കൈയില് കരുതുക
- നിര്ജ്ജലീകരണം വര്ധിപ്പിക്കുന്ന മദ്യം പോലെയുള്ള പാനീയങ്ങള് പകല് ഒഴിവാക്കുക.
- അയഞ്ഞ, ലൈറ്റ് കളര്, കട്ടി കുറഞ്ഞ പരുത്തി വസ്ത്രങ്ങള് ധരിക്കുക.
- പരീക്ഷാക്കാലമായതിനാല് സ്കൂള് അധികൃതരും രക്ഷിതാക്കളും പ്രത്യേകം ശ്രദ്ധിക്കണം. ക്ലാസ് മുറികളില് വായുസഞ്ചാരവും ശുദ്ധജല ലഭ്യതയും ഉറപ്പ് വരുത്തണം.
- അങ്കണനവാടി കുട്ടികള്ക്ക് ചൂട് ഏല്ക്കാത്ത സംവിധാനം നടപ്പാക്കണം.
- പകല് 11 മണി മുതല് 3 മണി വരെ നേരിട്ട് സൂര്യപ്രകാശം ഏല്ക്കാതെയിരിക്കാന് പ്രത്യേകം ശ്രദ്ധിക്കണം.
- പ്രായമായവര്, ഗര്ഭിണികള്, കുട്ടികള്, മറ്റ് രോഗങ്ങള് മൂലമുള്ള അവശത അനുഭവിക്കുന്നവര് തുടങ്ങിയവര് കൂടുതല് ജാഗ്രതയോടെയിരിക്കണം.
- പുറത്തിറങ്ങുന്നവര് തൊപ്പിയോ കുടയോ ഉപയോഗിക്കണം.
- പകല് സമയങ്ങളില് തൊഴിലില് ഏര്പ്പെടുന്നവര് ആവശ്യമായ വിശ്രമം എടുക്കാനും ധാരാളമായി വെള്ളം കുടിക്കാനും ശ്രദ്ധിക്കണം.
- ചൂട് കൂടിയ സമയങ്ങളില് കൂടുതല് നേരം സൂര്യ രശ്മികളുമായി സമ്പര്ക്കത്തിലേര്പ്പെടുന്നത് ആരോഗ്യ പ്രശ്നങ്ങള്ക്ക് കാരണമായേക്കാം. പകല് 11 മണി മുതല് 3 മണി വരെയുള്ള സമയങ്ങളില് നേരിട്ട് സൂര്യരശ്മികള് ശരീരത്തില് ഏല്ക്കാതെയിരിക്കാന് ശ്രദ്ധിക്കേണ്ടതാണ്.
- ലേബര് കമ്മീഷ്ണര് പുറപ്പെടുവിച്ച തൊഴില് സമയം പുനഃക്രമീകരണം പാലിക്കണം.
- നല്ല പോഷക സമൃദ്ധമായ ഭക്ഷണവും പഴങ്ങളും കഴിക്കണം.
- നിര്ജ്ജലീകരണം തടയാന് ഒആര്എസ് ലായനി പ്രോത്സാഹിപ്പിക്കപ്പെടേണ്ടതാണ്.
- വളര്ത്തു മൃഗങ്ങള്ക്ക് തണല് ഉറപ്പു വരുത്താനും പക്ഷികള്ക്കും മൃഗങ്ങള്ക്കും വെള്ളം ലഭ്യമാക്കാനും ശ്രദ്ധിക്കേണ്ടതാണ്.
- ചൂട് മൂലമുള്ള തളര്ച്ചയോ മറ്റ് ആരോഗ്യ പ്രശ്നങ്ങളോ ശ്രദ്ധയില്പ്പട്ടാല് പെട്ടെന്ന് തന്നെ പ്രഥമ ശുശ്രൂഷ നല്കാനും വൈദ്യ സഹായം എത്തിക്കാനും ശ്രദ്ധിക്കേണം.
