തിരുവനന്തപുരം: പ്രധാനമന്ത്രി നരേന്ദ്ര മോദിയുടെ സ്വപ്ന പദ്ധതി ഏറ്റെടുത്ത് മുഖ്യമന്ത്രി പിണറായി വിജയന്. സ്വച്ഛ് ഭാരത് പദ്ധതിയെ അനുകരിച്ചാണ് പുതിയ പദ്ധതി കേരളത്തില് നടപ്പിലാക്കുന്നത്. ഇതിന്റെ ഭാഗമായി ദേശീയ- സംസ്ഥാന പാതയോരങ്ങളില് പൊതു ശുചിമുറികള് നിര്മ്മിക്കുന്നതിന് മൂന്നു സെന്റ് വീതം സര്ക്കാര് ഭൂമി കണ്ടെത്തുന്നതിന് തദ്ദേശസ്വയംഭരണ സ്ഥാപനങ്ങള്ക്ക് നിര്ദേശം നല്കാന് മന്ത്രിസഭ തീരുമാനിച്ചു. സംസ്ഥാനത്താകെ 12,000 ജോഡി (സ്ത്രീകള്ക്കും പുരുഷന്മാര്ക്കും) ശുചിമുറികള് നിര്മ്മിക്കുകയാണ് ലക്ഷ്യം.
പൊതു ശുചിമുറികളുടെ അഭാവം റോഡ് മാര്ഗം യാത്ര ചെയ്യുന്ന സ്ത്രീകളും കുട്ടികളും ഉള്പ്പെടെയുള്ളവര്ക്ക് പ്രയാസമുണ്ടാക്കുന്നുണ്ട്. പെട്രോള് പമ്പിലെ ശുചിമുറികള് ഉപഭോക്താക്കള്ക്കു മാത്രമായി പരിമിതപ്പെടുത്തുന്ന സ്ഥിതിയുണ്ട്. ഈ സാഹചര്യത്തിലാണ് തദ്ദേശസ്വയംഭരണ സ്ഥാപനങ്ങളുടെ നേതൃത്വത്തില് 12,000 ജോഡി ശുചിമുറികള് നിര്മ്മിക്കാനുള്ള പദ്ധതി നടപ്പിലാക്കുന്നത്.
സഹകരിക്കാന് തയ്യാറുള്ള ഏജന്സികളെ ഇതില് പങ്കാളികളാക്കും. സര്ക്കാരിന്റെയും പൊതുമേഖലാ സ്ഥാപനങ്ങളുടെയും സഹകരണ സ്ഥാപനങ്ങളുടെയും ഭൂമി ഇതിനു വേണ്ടി പ്രയോജനപ്പെടുത്തും. ശുചിമുറികളോടൊപ്പം സാധ്യതയുള്ള സ്ഥലങ്ങളില് അത്യാവശ്യസാധനങ്ങള് വില്ക്കുന്ന ബങ്കുകളും ലഘുഭക്ഷണശാലകളും തുടങ്ങും.
ശുചിത്വവും സുരക്ഷിതത്വവും ഉറപ്പുവരുത്തുന്ന രീതിയിലാകും ശുചിമുറികളുടെ നിര്മ്മാണവും പരിപാലനവും. നിര്മ്മാണച്ചെലവ് തദ്ദേശസ്വയംഭരണ സ്ഥാപനങ്ങള് വഹിക്കണമെന്നും സര്ക്കാര് വ്യക്തമാക്കുന്നു. നരേന്ദ്ര മോദി നടപ്പിലാക്കിയ സ്വച്ഛ് ഭാരത് പദ്ധതിയെ ഏറ്റവും അധികം വിമര്ശിച്ചതും കളിയാക്കിയതും കേരളത്തിലെ സിപിഎം നേതൃത്വമായിരുന്നു.
