ന്യൂദല്‍ഹി : ഇന്ത്യയുടെ ആഭ്യന്തര കാര്യങ്ങളില്‍ തലയിടേണ്ടതില്ലെന്ന് തുര്‍ക്കിക്ക് താക്കീത് നല്‍കി ഇന്ത്യ. ജമ്മു കശ്മീര്‍ ഇന്ത്യയുടെ അവിഭാജ്യഘടകമാണ്. ഇതുമായി ബന്ധപ്പെടുത്തിയുള്ള എല്ലാ പ്രതികരണങ്ങളേയും ഇന്ത്യ തള്ളികളയുകയാണെന്നും വിദേശകാര്യ മന്ത്രാലയം അറിയിച്ചു. പ്രസ്താവനയിലൂടെയാണ് ഇക്കാര്യം വ്യക്തമാക്കിയത്.
പാക്കിസ്ഥാന് സന്ദര്‍ശനത്തിനിടെ തുര്‍ക്കി പ്രസിഡന്റ് റജബ് തയ്യിബ് ഇര്‍ദോഗന്‍ ജമ്മു കശ്മീരുമായി ബന്ധപ്പെട്ട് പ്രസ്താവന നടത്തിയിരുന്നു. ഇതിനെ തുടര്‍ന്നാണ് ഇന്ത്യ തുര്‍ക്കിക്ക് താക്കീത് നല്‍കിയിരിക്കുന്നത്. ഇന്ത്യയുടെ ആഭ്യന്തര കാര്യങ്ങളില്‍ ഇടപെടരുത്. വസ്തുതകളെ കുറിച്ച് ശരിയായ ധാരണകള്‍ ഉണ്ടാക്കിയെടുക്കണമെന്ന് തുര്‍ക്കി നേതൃത്വത്തോട് അഭ്യര്‍ത്ഥിക്കുന്നതായും വിദേശകാര്യമന്ത്രാലയം അറിയിച്ചു.
കശ്മീര്‍ വിഷയത്തില്‍ പാക്കിസ്ഥാന് പൂര്‍ണ്ണ പിന്തുണ അര്‍പ്പിക്കുന്നുവെന്നായിരുന്നു ഇര്‍ദോഗന്റെ പ്രസ്താവന. കശ്മീരികള്‍ പീഡനം അനുവഭിക്കുന്നു, ഇന്ത്യ ഏകപക്ഷീയമായി ഇടപ്പെട്ടു, തുടങ്ങിയ പരാമര്‍ശങ്ങളാണ് അദ്ദേഹം നടത്തിയിരുന്നത്. പാക് പ്രധാനമന്ത്രി ഇമ്രാന്‍ ഖാനുമായി നടത്തിയ കൂടിക്കാഴ്‌ച്ചയിലാണ് ഇക്കാര്യം അറിയിച്ചത്.
