തിരുവനന്തപുരം : വ്യാജ നമ്പര്‍ പ്ലേറ്റ് ഉപയോഗിച്ച് മണ്ണ് കടത്തലിനായി സിപിഎം ബ്രാഞ്ച് സെക്രട്ടറിയുടെ ടിപ്പര്‍ ലോറി തുമ്പ പോലീസ് പിടികൂടി. മണ്ണ് കടത്തലിനായി ഇയാള്‍ പതിവായി വ്യാജ നമ്പര്‍ പ്ലേറ്റാണ് ഉപയോഗിച്ചിരുന്നത്. കോലത്തുകര ബ്രാഞ്ച് സെക്രട്ടറി അനില്‍ കുമാറിന്റെ ടിപ്പറാണ് ഇത്തരത്തില്‍ പിടികൂടിയത്.
കഴിഞ്ഞ ദിവസം പാസില്ലാതെ മണ്ണ് കടത്തിക്കൊണ്ടു പോകുന്നതിനിടെയാണ് പോലീസ് വണ്ടി പിടിച്ചെടുത്തത്. തുടര്‍ന്ന് ഉടമയായ അനില്‍ കുമാറിനോട് വാഹനത്തിന്റെ രേഖകള്‍ ഹാജരാക്കാന്‍ ആവശ്യപ്പെട്ടെങ്കിലും ഇയാള്‍ തയ്യാറായിരുന്നില്ല. പിന്നീട് മോട്ടോര്‍ വാഹന വകുപ്പിന്റെ സൈറ്റ് പരിശോധിച്ചതോടെയാണ് വ്യാജ നമ്പര്‍ പ്ലേറ്റ് ഉപയോഗിച്ചാണ് ഇയാള്‍ മണ്ണ് കടത്തിയിരുന്നതെന്ന് കണ്ടെത്തിയത്.
കെഎല്‍ 22 എന്‍ 5602 എന്നതാണ് ലോറിയുടെ യഥാര്‍ത്ഥ നമ്പര്‍. എന്നാല്‍ മണ്ണ് കടത്തലിനായി ഇയാള്‍ പ്രശാന്ത് നഗര്‍ സ്വദേശിയായ ഹരിശങ്കറിന്റെ ബൈക്കിന്റെ കെഎല്‍ 22 എന്‍ 5791 എന്ന നമ്പര്‍ ഉപയോഗിക്കുകയായിരുന്നു.
അതിനിടെ കേസ് ഒതുക്കി തീര്‍ക്കാന്‍ ബ്രാഞ്ച് സെക്രട്ടറിയുടെ നേതൃത്വത്തില്‍ ശ്രമം നടത്തിയതായും ആരോപണമുണ്ട്. വിഷയത്തില്‍ അനില്‍ കുമാറിനെതിരെ കഴക്കൂട്ടം സബ് റീജണല്‍ ആര്‍ടി ഒഫീസില്‍ തുമ്പ പോലീസ് പരാതി നല്‍കി. പാസില്ലാതെ മണ്ണ് കടത്തിയതിന് ഇയാള്‍ക്കെതിരേയും നടപടി ആരംഭിച്ചിട്ടുണ്ട്.
