കൊച്ചി: മലപ്പുറത്തെ ഈ മാതൃക സംസ്ഥാനത്തിന് മാത്രമല്ല, ഇന്ത്യക്കാകെ മാതൃകയാകുകയാണ്. കേന്ദ്ര സര്ക്കാരിന്റെ ജനക്ഷേമ പദ്ധതികള് എങ്ങനെ വകമാറ്റാതെയും വകുപ്പു മാറ്റാതെയും ജനങ്ങള്ക്കായി നടത്താമെന്ന് ഇത് കണ്ടുപഠിക്കണം.
ഗ്രാമീണ യുവജനതയ്ക്ക് തൊഴില് നൈപുണ്യ വികസന പരിശീലനം നല്കി അവര്ക്ക് തൊഴില് ഉറപ്പാക്കാനുള്ള കേന്ദ്ര സര്ക്കാര് പദ്ധതിയാണ് ദീനദയാല് ഉപാധ്യായ ഗ്രാമീണ കൗശല്യ യോജന (ഡിഡിയു – ജികെവൈ). സംസ്ഥാന സര്ക്കാരുകള് വഴിയാണ് കേന്ദ്ര ഗ്രാമവികസന മന്ത്രാലയത്തിന്റെ പദ്ധതി. ഏത് സ്ഥാപനത്തിനും പദ്ധതി നടപ്പാക്കാം.
മലപ്പുറം വണ്ടൂരിനടുത്ത് തിരുവാലിയിലെ പോപ്പീസ് ബേബി കെയര് പ്രോഡക്ട്സ് പ്രൈവറ്റ് ലിമിറ്റഡ് എന്ന, കുട്ടികളുടെ വസ്ത്ര നിര്മാണ കമ്പനിയാണ് ദീനദയാല് യോജന നടപ്പാക്കുന്നത്. കമ്പനിയുടെ ലക്ഷ്യം നല്ലതെന്ന് ബോധ്യപ്പെട്ടപ്പോള് കേന്ദ്രം വ്യവസ്ഥകളില് പ്രത്യേക ഇളവുകള് പോലും നല്കി. 4.99 കോടി രൂപയുടെ കേന്ദ്ര പദ്ധതിയിലൂടെ 730 പേര്ക്ക് തൊഴില് പരിശീലനം നല്കുന്ന പരിപാടി ആരംഭിച്ചിട്ട് ഒരു മാസമായി.
ഗ്രാമങ്ങളിലെ 38 വയസില് താഴെയുള്ളവര്ക്കാണ് സൗജന്യ പരിശീലനം. പരിശീലന കാലത്ത് പ്രതിദിനം 125 രൂപ യാത്രാ ബത്ത. മൂന്നു മാസ കോഴ്സാണെങ്കില് അതുകഴിഞ്ഞ് മൂന്നു മാസം ഏതെങ്കിലും സ്ഥാപനത്തില് ജോലി നേടിയെന്നുറപ്പാക്കണം. സംസ്ഥാന സര്ക്കാര് നിശ്ചയിച്ചിട്ടുള്ള നിരക്കില് വേതനം ലഭിക്കും. പരിശീലനം മികച്ച തൊഴില് ഉപകരണങ്ങള്കൊണ്ടുതന്നെ. വിദേശത്തു പോയാലും ഏറ്റവും പുതിയ യന്ത്രങ്ങളും ഉപകരണങ്ങളും ഉപയോഗിക്കാന് കഴിയണം. ഓരോ ഘട്ടത്തിലും പരിശോധനകള് നടത്തിയാണ് കേന്ദ്രസര്ക്കാര് അടുത്ത ഘട്ടത്തിന് ധനസഹായം നല്കുന്നത്.
എട്ടു കോഴ്സുകളാണ് പോപ്പീസ് നടത്തുന്നത്. നാലു കോഴ്സുകള് തുടങ്ങി, 135 പേരുണ്ട്. തുന്നല്, ഫാഷന് ഡിസൈനിങ് തുടങ്ങിയ മൂന്നു മാസകോഴ്സുകളാണിപ്പോള്, മറ്റു കോഴ്സുകള് ഉടന് തുടങ്ങും. കേരളത്തിലെവിടെനിന്നും ഗ്രാമീണ മേഖലയില് ഉള്ള, 38 വയസുകഴിയാത്തവര്ക്ക് പരിശീലനത്തിന് ചേരാം.
ഒരു കോഴ്സില് 35 പേരെ ചേര്ക്കും. മെഷീന് മെയിന്റനന്സ് മെക്കാനിക്, തയ്യല് മെഷിന് ഓപ്പറേറ്റര്, തുന്നല്, വെയര് ഹൗസ് പായ്ക്കര്, ഗാര്മെന്റ്സ് കട്ടര് എന്നിവയിലാണ് ആദ്യഘട്ട പരിശീലനം. കൂടാതെ ഇംഗ്ലീഷും പഠിപ്പിക്കും. മൂന്നു മാസം പ്ലേസ്മെന്റ് നിര്ബന്ധം. ഇതിന് പോപ്പീസിന്റെ കമ്പനിയില് സൗകര്യം ഉണ്ട്. അതിനാല് കോഴ്സ് നടത്താന് കൂടുതല് സൗകര്യമുണ്ട്.
മറ്റ് സ്ഥാപനങ്ങളില് പഠിക്കുന്നവര്ക്ക് പോപ്പി ഈ സൗകര്യം നല്കുന്നുണ്ടെന്നും പോപ്പീസ് മാനേജിങ് ഡയറക്ടര് ഷാജു തോമസ് പറഞ്ഞു. മറ്റു ജില്ലകളിലും പരിശീലന പദ്ധതി ആരംഭിക്കും. വിനോദ്. ആര്, പ്രമീഷ് തുടങ്ങിയവരാണ് പദ്ധതിയുടെ മേല്നോട്ടക്കാര്.
