ബീജിങ് : അമേരിക്കയുമായുള്ള സാമ്പത്തിക യുദ്ധത്തില് തകര്ന്നടിഞ്ഞ് ചൈന. കഴിഞ്ഞ ദിവസം പുറത്തുവിട്ട സാമ്പത്തിക വളര്ച്ചാ നിരക്കിലാണ് ഇതുസംബന്ധിച്ച് വ്യക്തമാക്കുന്നത്. 2019ല് 6.1 ശതമാനമാണ് ചൈനയുടെ സാമ്പത്തിക വളര്ച്ച നിരക്ക്. 1991ന് ശേഷം ആദ്യമായാണ് ഇത്തരത്തില് വളര്ച്ചാ നിരക്ക് ഇടിയുന്നത്.
2018ല് 6.6 ശതമാനം വളര്ച്ചാ നിരക്കാണ് ഉണ്ടായിരുന്നത്. 2019 സാമ്പത്തിക വര്ഷം 6.6 ശതമാനം വളര്ച്ചയാണ് ചൈന ലക്ഷ്യമിട്ടത്. അമേരിക്കയുമായുള്ള വ്യാപര യുദ്ധത്തില് ചൈനീസ് വിപണിക്കുണ്ടായ തളര്ച്ചയാണ് സാമ്പത്തിക വളര്ച്ചാ നിരക്കിലും പ്രതിഫലിച്ചതെന്ന് വിദഗ്ധര് വിലയിരുത്തുന്നത്.
ചൈനയുമായുള്ള വ്യാപാരബന്ധത്തില് വിള്ളല് വീണതോടെ ചൈനീസ് ഉല്പന്നങ്ങള്ക്ക് അമേരിക്ക നികുതി ഉയര്ത്തിയിരുന്നു. ഇത് ചൈനീസ് സാമ്പത്തിക മേഖലയെ മൊത്തത്തില് ബാധിച്ചു. തുടര്ന്ന് മാസങ്ങള് നീണ്ട പോരുള്ക്ക് ശേഷമാണ് നികുതി കുറയ്ക്കാന് യുഎസ് തയ്യാറായത്. കൂടുതല് അമേരിക്കന് ഉല്പന്നങ്ങള് ചൈന ഇറക്കുമതി ചെയ്യാമെന്ന കരാറിനെ തുടര്ന്ന് നികുതി വര്ധിപ്പിക്കില്ലെന്ന് അമേരിക്ക അറിയിച്ചതിനെ തുടര്ന്നാണ് വ്യാപാര യുദ്ധത്തിന് അയവുണ്ടായത്.
എന്നാല് അമേരിക്കയുമായുള്ള വ്യാപാര യുദ്ധത്തിലും സാമ്പത്തിക വളര്ച്ച 6 ശതമാനം നിലനിര്ത്താനായത് മെച്ചമായാണ് ചൈന വിലയിരുത്തുന്നത്. വിപണിയില് സര്ക്കാര് കൂടുതല് പണമിറക്കിയതാണ് വളര്ച്ചാ നിരക്ക് താഴാതെ പിടിച്ചു നില്ക്കാന് കാരണം.
