ധാക്ക : തനിക്കു പകരമായി പരീക്ഷയെഴുതാന് ആളെ നിയോഗിച്ച വനിതാ എംപിയെ യൂണിവേഴ്സിറ്റി പുറത്താക്കി. ബംഗ്ലാദേശ് ഭരണകക്ഷിയായ അവാമി ലീഗ് എംപി തമന്ന നസ്രത്താണ് പരീക്ഷയെഴുതാനായി പകരം ആളുകളെ നിയോഗിച്ചത്. ആള്മാറാട്ടം പിടിച്ചതോടെ തമന്നയെ സര്വ്വകലാശാലയില് നിന്നും പുറത്താക്കിയിട്ടുണ്ട്.
ബംഗ്ലാദേശ് ഓപ്പണ് യൂണിവേഴിസിറ്റി വിദ്യാര്ത്ഥിയായ നസ്രത്ത് രൂപ സാദൃശ്യമുള്ള എട്ടുപേരെയാണ് പരീക്ഷയെഴുതാനായി നിയോഗിച്ചിരുന്നത്. സര്വ്വകലാശാലയുടെ 13 പരീക്ഷകള് ഇത്തരത്തില് ആളുകള് മാറി മാറി എഴുതാനാണ് അവര് നിര്ദ്ദേശം നല്കിയിരുന്നു.
പരീക്ഷാ കേന്ദ്രങ്ങളിലൊന്നില് തമന്നയായി നടിച്ച് ഒരു സ്ത്രീ പരീക്ഷയെഴുതുന്നത് പ്രാദേശിക വാര്ത്താ ചാനല് കണ്ടെത്തിയതോടെയാണ് സംഭവം പുറത്തായത്. അതിന്റെ ദൃശ്യങ്ങള് സമൂഹമാധ്യമങ്ങളും ഏറ്റെടുത്തതോടെ വിവാദമാവുകയായിരുന്നു. സംഭവം പുറത്തായതോടെ സര്വകലാശാല അന്വേഷണത്തിനായി നാലംഗകമ്മിറ്റിയെ നിയോഗിച്ചു കഴിഞ്ഞു. യൂണിവേഴ്സിറ്റിയില് നിന്നും തമന്നയെ പുറത്താക്കിയെന്നും ഇനി പ്രവേശനം നല്കില്ലെന്നും അധികൃതര് അറിയിച്ചു.
അതേസമയം എംപിക്കു വേണ്ടി മറ്റാള്ക്കാര് പരീക്ഷയെഴുതുന്നത് എല്ലാവര്ക്കും അറിയാമെന്നും ഭയം മൂലമാണ് പുറത്തുപറയാത്തതെന്നും ഒരു കോളജ് ജീവനക്കാരന് മാധ്യമങ്ങളോടു പറഞ്ഞു. പരീക്ഷയെഴുതുന്നവര്ക്ക് ഗുണ്ടകളുടെ കാവലുമുണ്ടാകും. എംപിയുടെ കുടുംബത്തിന്റെ സ്വാധീനം ശക്തമാണെന്നും ജീവനക്കാരന് പറഞ്ഞു. വനിതാസംവരണമുള്ള സീറ്റിലാണ് കഴിഞ്ഞ വര്ഷം നസ്രത്ത് പാര്ലമെന്റംഗമായത്. സംഭവം ഗൗരവമായി കാണുമെന്ന് അവാമി ലീഗ് അറിയിച്ചു.
