പത്തനംതിട്ട: സഭാക്കേസുമായി ബന്ധപ്പെട്ട് ഇടത്, വലത് മുന്നണികളില്‍ നിന്നും അനുഭവിക്കേണ്ടിവന്ന പീഡനങ്ങളുടെ കഥകളുമായി മലങ്കര ഓര്‍ത്തഡോക്‌സ് സഭയിലെ വൈദികന്‍. എറണാകുളം മഴുവന്നൂര്‍ പഴന്തോട്ടം ഓര്‍ത്തഡോക്‌സ് ഇടവകയിലെ സഹവികാരി ഫാ. കെ.കെ. വര്‍ഗീസാണ് നേരിടുന്ന അക്രമങ്ങളുടേയും പോലീസ് പീഡനങ്ങളുടേയും കദനകഥ പങ്കുവച്ചത്.
പത്തനംതിട്ട പ്രസ്‌ക്ലബില്‍ മാധ്യമ പ്രവര്‍ത്തകര്‍ക്ക് മുന്നില്‍ പറഞ്ഞ യാഥാര്‍ത്ഥ്യങ്ങള്‍ ആരേയും നൊമ്പരപ്പെടുത്തും. വടക്കന്‍ ജില്ലകളില്‍ ഓര്‍ത്തഡോക്‌സ് വൈദികരും സഭാവിശ്വാസികളും ജീവന്‍ പണയം വച്ചാണ് ഓരോദിവസവും കഴിഞ്ഞു കൂടുന്നത്. എതിര്‍ കക്ഷികളില്‍ നിന്നുമുള്ള വധശ്രമം അടക്കം അതിജീവിക്കുന്നതിന് പുറമെ പിണറായിയുടെ പോലീസ് വേട്ടയാടുന്നത് ഇവരുടെ ജീവിതം ദുരിതപൂര്‍ണ്ണമാക്കുന്നു. സഭാവിശ്വാസികളെ ക്രൂരമായി പീഡിപ്പിക്കുന്നതിന് സര്‍ക്കാര്‍ പിന്തുണയും നല്‍കുന്നു.
കൊലപാതക ശ്രമത്തില്‍ തന്റെ തലയ്‌ക്ക് ഗുരുതരമായി പരിക്കേല്‍ക്കുകയും ഭാഗ്യംകൊണ്ട് രക്ഷപെടുകയുമായിരുന്നെന്ന് ഫാ. വര്‍ഗീസ് പറഞ്ഞു. തലയ്‌ക്ക് ഗുരുതരമായി പരിക്കേറ്റ് രക്തംവാര്‍ന്ന് റോഡില്‍ കിടന്ന താന്‍ മരിച്ചെന്ന് കരുതി അക്രമികള്‍ പോവുകയായിരുന്നു. എന്നാല്‍ അക്രമികള്‍ക്കെതിരെ കേസെടുക്കുവാന്‍ പോലും പോലീസ് തയ്യാറായില്ലെന്ന് മാത്രമല്ല അക്രമത്തിനിരയായ വൈദികനെ പ്രതിചേര്‍ത്ത് കേസെടുക്കുകയും ചെയ്തു. ഇതോടെ ചികിത്സ കഴിഞ്ഞ് കോടതിയില്‍ നിന്ന് ജാമ്യം എടുക്കേണ്ട ഗതികേടിലായെന്നും അദ്ദേഹം പറഞ്ഞു.
സര്‍ക്കാരില്‍ നിന്നും പോലീസില്‍ നിന്നും സഭാവിശ്വാസികള്‍ക്ക് നീതി ലഭിക്കുന്നില്ല. നിരവധി ആളുകളെ കള്ളക്കേസില്‍ കുടുക്കി. മുകളില്‍ നിന്നുള്ള സമ്മര്‍ദ്ദം കാരണമാണ് ഇങ്ങനെ ചെയ്യേണ്ടി വരുന്നതെന്ന് പോലീസ് ഉദ്യോഗസ്ഥര്‍ വേദനയോടെ പറഞ്ഞതായും ഫാ. വര്‍ഗീസ് പറഞ്ഞു. പലതവണ കേസില്‍ കുടുക്കി ജയിലില്‍ അടയ്‌ക്കാന്‍ ശ്രമമുണ്ടായി. കഴിഞ്ഞ ലോകസഭാ തെരഞ്ഞെടുപ്പിന് മുന്‍പ്-ഏപ്രില്‍ 19ന് ദേവാലയത്തില്‍ കടന്നുകയറിയ സംഘം തന്നെ അക്രമിച്ചു. എന്നാല്‍ ഈ സംഭവത്തിലും പോലീസ് പ്രതിയാക്കിയത് തന്നെതന്നെയാണെന്ന് വൈദികന്‍ പറഞ്ഞു. അക്രമികളുടെ വീഡിയോ ദൃശ്യങ്ങള്‍ ഹാജരാക്കിയിട്ടും പോലീസ് നിലപാട് മാറ്റിയില്ല. എന്നാല്‍ കോടതിക്ക് യാഥാര്‍ത്ഥ്യം ബോധ്യപ്പെട്ടതിനെ തുടര്‍ന്നാണ് അന്ന് ജാമ്യം ലഭിച്ചത്.
ലോക്‌സഭാ തെരഞ്ഞെടുപ്പിന് മുന്‍പ് വികാരി അടക്കമുള്ളവരെ റിമാന്റ് ചെയ്യണമെന്നാണ് മുകളില്‍ നിന്നും നിര്‍ദ്ദേശം കിട്ടിയതെന്നായിരുന്നു പോലീസിന്റെ വിശദീകരണം. അന്ന് സഹായവുമായി എത്തിയത് ബിജെപി പ്രവര്‍ത്തകര്‍ മാത്രമാണ്. ബിജെപി എറണാകുളം ജില്ലാ പ്രസിഡന്റ് അടക്കമുള്ളവരുടെ ഇടപെടല്‍ കാരണമാണ് അന്ന് ജയിലില്‍ കിടക്കാതെ രക്ഷപെട്ടതെന്നും ഫാ. വര്‍ഗീസ് പറഞ്ഞു. വടക്കന്‍ മേഖലയില്‍ ഓര്‍ത്തഡോക്‌സ് സഭാ വിശ്വാസികള്‍ അനുഭവിക്കുന്ന സഹനവും ത്യാഗവും ഈ പ്രദേശങ്ങളിലുള്ള വിശ്വാസികളെകൂടി മനസിലാക്കാനാണ് കോന്നിയിലെത്തിയത്.
സഭാക്കേസില്‍ മലങ്കര ഓര്‍ത്തഡോക്‌സ് സഭക്ക് അനുകൂലമായി ഉണ്ടായ കോടതി വിധി ആസൂത്രിതമായി അട്ടിമറിച്ച ഇടത് വലത് മുന്നണികളോട് വിശ്വാസികള്‍ക്കുള്ള പ്രതിഷേധം ഉപതെരഞ്ഞെടുപ്പില്‍ പ്രതിഫലിക്കുമെന്നും അദ്ദേഹം പറഞ്ഞു.
