തിരുവനന്തപുരം: രാജ്യത്തേക്കെത്തുന്ന സ്വര്‍ണ കടത്തിന്റെ മൂന്നിലൊന്നും കേരളത്തിലേക്കാണെന്ന് കസ്റ്റംസ് കമ്മീഷണര്‍ സുമിത്ത് കുമാര്‍. ഈ വര്‍ഷം മാത്രം 44 കോടിയുടെ അനധികൃത സ്വര്‍ണം കസ്റ്റംസ് പിടികൂടിയതായും കമ്മീഷണര്‍ വാര്‍ത്താ സമ്മേളനത്തില്‍ അറിയിച്ചു. രാജ്യത്ത് പ്രതിവര്‍ഷം 100 കോടിയുടെ സ്വര്‍ണ കള്ളകടത്ത് നടക്കുന്നവെന്നാണ് അനുമാനം. അതിന്റെ മൂന്നിലൊന്നും കേരളത്തില്‍ നടക്കുന്നുവെന്നാണ് അന്വേഷണ ഏജന്‍സികളുടെ കണ്ടെത്തല്‍. കള്ളകടത്ത് വര്‍ദ്ധിക്കുന്നുവെന്ന വിവരത്തിന്റെ അടിസ്ഥാനത്തില്‍ കസ്റ്റംസും അതീവ ജാഗ്രത പുലര്‍ത്തുകയാണെന്ന് കസ്റ്റംസ് കമ്മീഷണര്‍ വ്യക്തമാക്കി.
സംസ്ഥാനത്ത് കള്ളകടത്ത് കേസുകളുടെ എണ്ണത്തിലും വര്‍ദ്ധനയുണ്ടായി. കഴിഞ്ഞ സാമ്പത്തിക വര്‍ഷം 28 കോടിയുടെ സ്വര്‍ണമാണ് പിടികൂടിയത്. ഈ സാമ്പത്തിക വര്‍ഷം പിടികൂടിയത് 44 കോടിയുടെ സ്വര്‍ണമാണ്. കഴിഞ്ഞ രണ്ടു ദിവസമായി കസ്റ്റംസ് നടത്തിയ പ്രത്യേക ഓപ്പറേഷനിലൂടെ 123 കിലോ സ്വര്‍ണം പിടികൂടിയെന്നും കമ്മീഷണര്‍ പറഞ്ഞു. ഇതര സംസ്ഥാനങ്ങളില്‍ നിന്നും കേരളത്തിലേക്ക് കടത്തുന്ന സ്വര്‍ണമാണ് പിടികൂടിയത്. ഏറ്റവും കൂടുതല്‍ സ്വര്‍ണ കടത്ത് പിടികൂടിയത് കരിപ്പൂര്‍ വിമാനത്താവളത്തിലാണെന്ന് കസ്റ്റംസ് കമ്മീഷണര്‍ പറഞ്ഞു. 84 കിലോ സ്വര്‍ണം കടത്തിയതിന് 175 കേസാണ് രജിസ്റ്റര്‍ ചെയ്തിട്ടുണ്ട്. സ്വര്‍ണ കടത്തിനെ കുറിച്ച് വിവരം നല്‍കുന്നവര്‍ക്ക് ഉയര്‍ന്ന പ്രതിഫലം നല്‍കുമെന്നും കസ്റ്റംസ് കമ്മീഷണര്‍ അറിയിച്ചു.
