അധിക ബാഗേജിനു വന്തുക ഫീസായി നല്കേണ്ടി വരുന്നത് എപ്പോഴും വിമാനയാത്രക്കാര്ക്ക് തലവേദനയാണ്. എന്നാല്, തന്റെ പക്കലുണ്ടായിരുന്ന സ്യൂട്ട് കേസിന് അനുവദനീയമായതിലും അധികഭാരം ആയതിനാല് നല്കേണ്ട പിഴയില് നിന്നു ഫിലിപ്പിന്സ് യുവതി ജെല് റോഡ്രിഗസ് തന്റെ ബുദ്ധി മൂലം ഒഴിവായി. യുവതി തന്നെയാണ് ഇക്കാര്യം ഫെയ്സ്ബുക്കിലൂടെ വെളിപ്പെടുത്തിയത്. സംഭവം ഇങ്ങെ- വിമാനത്താവളത്തില് എത്തിയ യുവതിയുടെ പക്കലുണ്ടായിരുന്ന സ്യൂട്ട് കേസിന് ഭാരം ഒമ്പതര കിലോ. അനുവദനീയമായ പരമാവധി ഭാരം ഏഴുകിലോയാണ്. ബാക്കിയുള്ള രണ്ടരക്കിലോയ്ക്ക് ഫീസ് നല്കാന് വിമാനക്കമ്പനി അധികൃതര് നിര്ദേശിച്ചു. എന്നാല്, ഇതിനു തയാറാകാതെ യുവതി മെല്ലെ വാഷ് റൂമിലേക്ക് പോകുകയായിരുന്നു. സ്യൂട്ട് കേസില് ഉണ്ടായിരുന്ന പാന്റ്സുകളും ടി ഷര്ട്ടുകളും ജാക്കറ്റും ഒന്നിനു മുകളില് ഒന്നായി ധരിച്ചു.
രണ്ടരക്കിലോയുടെ വസ്ത്രങ്ങള് ശരീരത്തില് ധരിച്ചതോടെ സ്യൂട്ട്കേസിന്റെ ഭാരം ആറരക്കിലോയായി മാറി. യുവതിയുടെ ബുദ്ധിയില് അമ്പരന്ന് വിമാനക്കമ്പനിക്കാര്ക്ക് കൂടുതല് ഒന്നും പറയാനുണ്ടായിരുന്നു. അതേവിമാനത്തില് ഫീസ് അടയ്ക്കാതെ റോഡ്രിഗസ് തന്റെ യാത്ര തുടര്ന്നു. ലക്ഷ്യസ്ഥാനത്ത് എത്തിയ ശേഷം ശരീരത്തുള്ള വസ്ത്രങ്ങള് സഹിതം വിമാനത്താവളത്തില് നിന്നു തന്നെ എടുച്ച ചിത്രം യുവതി ഫെയ്സ്ബുക്കില് പങ്കിട്ടു. പോസ്റ്റിനൊപ്പം റോഡ്രിഗസ് പറഞ്ഞു- വിമാനത്താവളത്തിലെ സ്റ്റാഫ് പറഞ്ഞു, ഏഴു കിലോയില് കൂടുതല് അനുവദിക്കില്ല. ഞാന് പറഞ്ഞു- കുഴപ്പമില്ല. ഒമ്പതരയില് നിന്ന് ആറരയിലേക്ക്, # എക്സെസ്ബാഗേജ്ചാലഞ്ച് സ്വീകരിച്ചു. റോഡ്രിഗസിന്റെ പോസ്റ്റ് വൈറലായതോടെ വിദേശമാധ്യമങ്ങളില് അടക്കം വന്വാര്ത്താപ്രധാന്യം നേടുകയും ചെയ്തു. ആദ്യമായല്ല, ഇത്തരത്തിലുള്ള സംഭവം. ഈ വര്ഷം ജൂലൈയില് സമാനമായ ഒരു സംഭവത്തില്, ഒരു വിമാനത്താവളത്തില് അധിക ബാഗേജ് ഫീസ് നല്കുന്നത് ഒഴിവാക്കാന് സ്കോട്ട്ലന്ഡില് നിന്നുള്ള ഒരാള് 15 ഷര്ട്ടുകള് ധരിച്ചതും വാര്ത്തയായിരുന്നു .
