തിരുവനന്തപുരം: കേരള സര്‍വകലാശാലയ്‌ക്ക് കീഴിലെ വിദ്യാര്‍ത്ഥിയുടെ കോളേജ് മാറ്റത്തിലും മന്ത്രി കെ.ടി. ജലീലില്‍ നിയമ വിരുദ്ധമായി ഇടപെടലുകള്‍ നടത്തിയതായി റിപ്പോര്‍ട്ട്. ചട്ടവിരുദ്ധ ഇടപെടല്‍. വിദ്യാര്‍ത്ഥിനിയെ ചേര്‍ത്തല എന്‍എസ്എസ് കോളേജില്‍ നിന്ന് തിരുവനന്തപുരം വിമന്‍സ് കോളേജിലേക്ക് മാറ്റി സര്‍ക്കാര്‍ ഉത്തരവിറക്കിയാതാണ് പുതിയ റിപ്പോര്‍ട്ടുകള്‍ സൂചിപ്പിക്കുന്നത്.
നിലവില്‍ വൈസ് ചാന്‍സലര്‍ക്കുള്ള മാത്രമാണ് വിദ്യാര്‍ത്ഥികളെ കോളേജ് മാറ്റാന്‍ അധികാരം ഉള്ളത്. ഇതെല്ലാം മറികടന്നാണ് കെ.ടി. ജലീല്‍ ഇടപെട്ട് വിദ്യാര്‍ത്ഥിനിക്ക് സ്ഥലംമാറ്റം നല്‍കിയിരിക്കുന്നത്. എംജി സര്‍വ്വകലാശാലയില്‍ തോറ്റ വിദ്യാര്‍ത്ഥിനിയെ അദാലത്തിലൂടെ മാര്‍ക്ക് നല്‍കി ജയിപ്പിച്ച സംഭവം പുറത്തുവന്നതിനു പിന്നാലെയാണ് പുതിയ സംഭവവും പുറത്തുവന്നിരിക്കുന്നത്.
കേരള സര്‍വകലാശാല, സാങ്കേതിക സര്‍വകലാശാല എന്നിവിടങ്ങളിലും മന്ത്രി ചട്ടവിരുദ്ധമായി ഇടപെടല്‍ നടത്തിയതായും കണ്ടെത്തിയിട്ടുണ്ട്.
മന്ത്രിയുടെ ഓഫീസില്‍ നിന്നുള്ള നിര്‍ദേശപ്രകാരം മൂല്യനിര്‍ണയത്തീയതികളിലും പരീക്ഷാ കലണ്ടറിലും മാറ്റം വരുത്താന്‍ തീരുമാനിച്ചതായുള്ള കേരള സര്‍വകലാശാലയുടെ സിന്‍ഡിക്കേറ്റ് തീരുമാനങ്ങളടങ്ങിയ മിനിറ്റ്‌സ് ആണ് പുറത്തു വന്നത്. അക്കാദമിക് കലണ്ടറടക്കമുള്ള കാര്യങ്ങള്‍ സര്‍വകലാശാലയുടെ അധികാരപരിധിയില്‍ വരുന്ന കാര്യമാണ്.
ബജറ്റുള്‍പ്പടെയുള്ള ഭരണകാര്യങ്ങളില്‍ പ്രോ ചാന്‍സലര്‍ എന്ന നിലയ്‌ക്ക് മന്ത്രിക്ക് ഇടപെടാമെങ്കിലും, അക്കാദമിക കാര്യങ്ങളില്‍ ഇടപെടാന്‍ പാടില്ലെന്ന് ചട്ടം തന്നെയുണ്ട്. ഇത് ലംഘിച്ചാണ് മന്ത്രിയുടെ ഓഫീസ്, മൂല്യനിര്‍ണയത്തിന്റെ തീയതികള്‍ മാറ്റാന്‍ നിര്‍ദ്ദേശിച്ചത്.
