റിയാദ്: സൗദി അറേബ്യയിലെ എണ്ണ വ്യവസായ കേന്ദ്രമായ ആരാംകോയില്‍ നടന്ന ഡ്രോണ്‍ ആക്രമണത്തില്‍ രാജ്യത്തിലെ എണ്ണ ഉല്‍പാദനം പകുതിയായി കുറഞ്ഞതിനെ തുടര്‍ന്ന് എണ്ണവില ബാരലിന് 10 ഡോളര്‍ വരെ ഉയരാന്‍ സാധ്യതയെന്ന് റിപ്പോര്‍ട്ട്.
ആക്രമണമുണ്ടായ സൗദി ദേശീയ എണ്ണക്കമ്പനി അരാംകോയുടെ ബുഖ്‌യാഖിലും ഖുറൈസിലും കേന്ദ്രങ്ങളില്‍ ഉല്‍പാദനം നിര്‍ത്തിവച്ചെന്നു സൗദി ഊര്‍ജമന്ത്രി അബ്ദുല്‍ അസീസ് ബിന്‍ സല്‍മാന്‍ അറിയിച്ചു. പ്രതിദിനം 57 ലക്ഷം ബാരല്‍ എണ്ണയാണ് ഇതോടെ നഷ്ടമാവുക. പ്രതിദിന ആഗോള എണ്ണ ഉല്‍പാദനത്തിലെ ആറു ശതമാനമാണിത്. പുതിയ സാഹചര്യം എണ്ണവില വര്‍ധനയ്‌ക്കും ഇടയാക്കിയേക്കും. ഇത് ഒരു വലിയ കാര്യമാണെന്ന് ലിപോ ഓയില്‍ അസോസിയേറ്റ്‌സ് പ്രസിഡന്റ് ആന്‍ഡ്രൂ ലിപോവ് പറഞ്ഞു.
ഉല്‍പാദനം പുനാരാംഭിക്കാന്‍ കാലതാമസം എടുക്കും തോറും ചരക്കിന്റെ വിലയെ അത് ബാധിക്കുന്നത് ഇരട്ട അക്കത്തില്‍ ആയിരിക്കുമെന്ന് എണ്ണ വിശകലന വിദഗ്ധരും വ്യാപാരികളും വ്യക്തമാക്കി. അറ്റകുറ്റപ്പണി സമയത്തെ ആശ്രയിച്ചിരിക്കും വിലകള്‍, അത് ചിലപ്പോള്‍ ആഴ്ചകള്‍ മുതല്‍ മാസങ്ങള്‍ വരെ നീണ്ടുനില്‍ക്കാമെന്ന് ക്ലിയര്‍വ്യൂ എനര്‍ജി ഗവേഷണ വിഭാഗം മേധാവി കെവിന്‍ ബുക്ക് പറഞ്ഞു.
യുഎസ് വെസ്റ്റ് ടെക്‌സസ് ഇന്റര്‍മീഡിയറ്റ് (ഡബ്ല്യുടിഐ) ക്രൂഡ് ഫ്യൂച്ചേഴ്‌സ് വെള്ളിയാഴ്ച 0.4 ശതമാനം ഇടിഞ്ഞ് 54.85 ഡോളറിലെത്തി. ബ്രെന്റ് ക്രൂഡ് ഫ്യൂച്ചേഴ്‌സ് 0.2 ശതമാനം കുറഞ്ഞ് ബാരലിന് 60.25 ഡോളറിലെക്കും എത്തിരുന്നു. ആക്രമണത്തില്‍ ആര്‍ക്കും പരിക്കില്ലെന്നും അടിയന്തര ഉദ്യോഗസ്ഥര്‍ തീ നിയന്ത്രണ വിധേയമാക്കി സ്ഥിതിഗതികള്‍ നിയന്ത്രണവിധേയമാക്കിയിട്ടുണ്ടെന്നും സൗദി അരാംകോ പ്രസിഡന്റും സിഇഒയുമായ അമിന്‍ നാസര്‍ പറഞ്ഞു. ഉല്‍പാദനം പുനസ്ഥാപിക്കുന്നതിനുള്ള പ്രവര്‍ത്തനങ്ങള്‍ നടന്നുവരികയാണ്, ഏകദേശം 48 മണിക്കൂറിനുള്ളില്‍ പ്രവര്‍ത്തന പുരോഗതി ആഫിയിക്കുമെന്നു നാസര്‍ വ്യക്തമാക്കി.
സൗദി തലസ്ഥാനമായ റിയാദില്‍നിന്ന് 330 കിലോമീറ്റര്‍ അകലെയാണ് ആക്രമണം നടന്ന ബുഖ്‌യാഖ്. സെപ്റ്റംബര്‍ 11നാണ് അരാംകോയുടെ കേന്ദ്രത്തില്‍ ഡ്രോണ്‍ ആക്രമണം ഉണ്ടായത്. ലോകത്തിലെ ഏറ്റവും വലിയ ക്രൂഡ് ഓയില്‍ സ്റ്റെബിലൈസേഷന്‍ പ്ലാന്റാണു ബുഖ്‌യാഖിലേത്. ഒരു ദിവസം ഏഴു ദശലക്ഷം ബാരല്‍ വരെ ക്രൂഡ് ഓയില്‍ ഇവിടെ ഉത്പാധിപ്പിക്കാന്‍ സാധിക്കും.
സൗദിയിലുണ്ടായ ഏറ്റവും വലിയ ആക്രമണത്തിന്റെ ഉത്തരവാദിത്തം യെമന്റെ ഹൂത്തി വിമതര്‍ ഏറ്റെടുത്തിട്ടുണ്ട്, കഴിഞ്ഞ കുറച്ച് വര്‍ഷങ്ങളായി സൗദി പൈപ്പ്‌ലൈനുകള്‍, ടാങ്കറുകള്‍, മറ്റ് അടിസ്ഥാന സൗകര്യങ്ങള്‍ എന്നിവയ്‌ക്കെതിരായ നിരവധി ആക്രമണങ്ങള്‍ക്ക് പിന്നില്‍ ഹൂത്തികളാണ്. 2006 ഫെബ്രുവരിയില്‍ ഭീകരസംഘടന അല്‍ഖ്വയ്ദ ഇവിടെ ആക്രമണം നടത്താന്‍ ശ്രമിച്ചിരുന്നെങ്കിലും പരാജയപ്പെട്ടു.
