ഒരു ജയം അകലെ കോഹ്‌ലിക്ക് റെക്കോഡ്

ജമൈക്ക: ടെസ്റ്റ് ക്രിക്കറ്റില്‍ ഇന്ത്യക്ക് ഏറ്റവും കൂടുതല്‍ വിജയങ്ങള്‍ സമ്മാനിച്ച നായകനെന്ന റെക്കോഡ് സ്വന്തമാക്കാന്‍ കോഹ്‌ലിക്ക് ഇനി ഒറ്റ വിജയം മാത്രം മതി. വിന്‍ഡീസിനെതിരായ രണ്ടാം ടെസ്റ്റ് നേടിയാല്‍ കോഹ്‌ലിക്ക് ഈ റെക്കോഡ് സ്വന്തമാക്കാം.

നിലവില്‍ 27 വിജയം നേടിയ കോഹ്‌ലി മുന്‍ നായകന്‍ ധോണിക്കൊപ്പം ഈ റെക്കോഡ് പങ്കിടുകയാണ്. രണ്ടാം ടെസ്റ്റില്‍ വിന്‍ഡീസിനെ വീഴ്‌ത്തിയാല്‍ കോഹ്‌ലിയുടെ ജയം 28 ആകും. ഇതോടെ ധോണി രണ്ടാം സ്ഥാനത്തേക്ക് പിന്തള്ളപ്പെടും.

ക്യാപ്റ്റനെന്ന നിലയില്‍ ധോണിയുടെ വിജയശതമാനം 45 ആണ്. പതിനെട്ട് തോല്‍വിയും 15 സമനിലയും നേടി. അതേസമയം കോഹ് ലിയുടെ ശാശരി 55.31 ശതമാനമാണ്. മറ്റ് ഇന്ത്യന്‍ നായകന്മാരേക്കാള്‍ ഏറ്റവും മികച്ചതാണിത്. 47 ടെസ്റ്റുകളില്‍ ഇന്ത്യക്ക് 27 വിജയം സമ്മാനിച്ച കോഹ് ലി പത്ത് തോല്‍വിയും പത്ത് സമനിലയും ഏറ്റുവാങ്ങി.

വിദേശത്ത് ഏറ്റവും കൂടതല്‍ വിജയം നേടിയ ഇന്ത്യന്‍ ക്യാപ്റ്റനെന്ന റെക്കോഡ് നേരത്തെ തന്നെ കോഹ്‌ലി സ്വന്തമാക്കി. വിന്‍ഡീസിനെതിരായ ആദ്യ ടെസ്റ്റില്‍ വിജയിച്ചതോടെ കോഹ് ലിക്ക് വിദേശമണ്ണില്‍ 12 വിജയങ്ങളായി. 26 മത്സരങ്ങളിലാണ് ഇത്രയും വിജയം നേടിയത്. ഇതോടെ സൗരവ് ഗാംഗുലിയുടെ 28 മത്സരങ്ങളില്‍ പതിനൊന്ന് ജയമെന്ന റെക്കോഡ് തകര്‍ന്നു.