നോര്‍ത്ത് സൗണ്ട് (ആന്റിഗ്വ): പ്രഥമ ലോക ടെസ്റ്റ് ചാമ്പ്യന്‍ഷിപ്പില്‍ ഇന്ത്യ ആദ്യ മത്സരത്തിനിറങ്ങുന്നു. കരീബിയന്‍ പടയാണ് എതിരാളികള്‍. മികച്ച ടീമിനെ ഇറക്കി ജയത്തോടെ ചാമ്പ്യന്‍ഷിപ്പില്‍ അരങ്ങേറുകയാണ് വിരാട് കോഹ്‌ലിയുടെ ലക്ഷ്യം. ഇന്ത്യന്‍ സമയം രാത്രി ഏഴിന് കളി തുടങ്ങും.
ലോകക്രിക്കറ്റില്‍ റെക്കോഡുകള്‍ പിഴുതെറിഞ്ഞ് കുതിക്കുന്ന കോഹ്‌ലി രണ്ട് പുത്തന്‍ റെക്കോഡുകള്‍ക്ക് അരികിലെത്തിനില്‍ക്കുകയാണ്. വിന്‍ഡീസിനെതിരായ ആദ്യ ടെസ്റ്റില്‍ വിജയിച്ചാല്‍ ഇന്ത്യക്ക് ഏറ്റവും കൂടുതല്‍ ടെസ്റ്റ് വിജയങ്ങള്‍ സമ്മാനിച്ച മുന്‍ നായകന്‍ എം.എസ്.ധോണിയുടെ റെക്കോഡിനൊപ്പം (27 വിജയം) എത്തും. ഒരു സെഞ്ചുറി കൂടി നേടിയാല്‍ ക്യാപ്റ്റനെന്ന നിലയില്‍ ഏറ്റവും കൂടുതല്‍ സെഞ്ചുറി നേടിയ ഓസീസ് മുന്‍ നായകന്‍ റിക്കിപോണ്ടിങ്ങിനൊപ്പം (19 സെഞ്ചുറി) എത്തും.
കടലാസില്‍ ഇന്ത്യന്‍ ബാറ്റിങ് നിര ശക്തമാണ്. ഈ കരുത്ത് കളിക്കളത്തില്‍ പുറത്തെടുത്താല്‍ ഇന്ത്യക്ക് വിജയം നേടാനാകും. മിന്നുന്ന ഫോം തുടരുന്ന കോഹ് ലി, ടെസ്റ്റ് സ്‌പെഷ്യലിസ്റ്റ് ചേതേശ്വര്‍ പൂജാര, കെ.എല്‍. രാഹുല്‍, രോഹിത് ശര്‍മ, ഋഷഭ് പന്ത് തുടങ്ങിയവരാണ് ഇന്ത്യന്‍ ബാറ്റിങ്ങിനെ നയിക്കുന്നത്.
ജേസണ്‍ ഹോള്‍ഡര്‍ നയിക്കുന്ന വിന്‍ഡീസും അത്ര മോശമല്ല. ഈവര്‍ഷമാദ്യം കരീബിയനിലെ ജീവനുള്ള പിച്ചില്‍ ഇം്ഗ്ലണ്ടിനെ മുട്ടുകുത്തിച്ച ടീമാണവര്‍. 2-1 നാണ് വിന്‍ഡീസ് ഇംഗ്ലണ്ടിനെതിരായ ടെസ്റ്റ് പരമ്പര സ്വന്തമാക്കിയത്.
ആന്റിഗ്വയിലെ സര്‍ വിവിയന്‍ റിച്ചാര്‍ഡ്‌സ് സ്്‌േറ്റഡിയത്തിലെ പിച്ച് പേസിനെ തുണയ്‌ക്കുന്നതാണ്. ജേസണ്‍ ഹോഡര്‍ നയിക്കുന്ന വിന്‍ഡീസ് പേസ്‌നിര ഇന്ത്യന്‍ ബാറ്റ്‌സ്മാന്മാര്‍ക്ക് തലവേദനയായേക്കും. കെമര്‍ റോച്ച്, ഷാനോണ്‍ ഗബ്രീല്‍ എന്നിവരാണ് വിന്‍ഡീസിന്റെ മറ്റ് പേസര്‍മാര്‍. ഇവിടെ കളിച്ച അവസാന ടെസ്റ്റില്‍ ഇംഗ്ലണ്ട് ആദ്യ ഇന്നിങ്ങ്‌സില്‍ 187 റണ്‍സിനും രണ്ടാം ഇന്നിങ്ങ്‌സില്‍ 132 റണ്‍സിനും പുറത്തായി.
പിച്ചില്‍ പേസും ബൗണ്‍സും ഉണ്ടെങ്കില്‍ കോഹ്‌ലി നാല് പസര്‍മാരെ അവസാന ഇലവനില്‍ ഉള്‍പ്പെടുത്തും. അങ്ങനെ സംഭവിച്ചാല്‍ സ്പിന്നറുടെ റോളിനായി ആര്‍. അശ്വിനും കുല്‍ദീപ് യാദവും തമ്മിലാകും മത്സരം.
മൂന്ന് പേസര്‍മാര്‍ ടീമിലുണ്ടാകുമെന്ന് ഉറപ്പാണ്. ജസ്പ്രീത് ബുംറ, ഇഷാന്ത് ശര്‍മ, മുഹമ്മദ് ശര്‍മ എന്നിവര്‍ അവസാന ഇലവനില്‍ ഇടം പിടിക്കും.
മായങ്ക് അഗര്‍വാളിനൊപ്പം ആരെ ഓപ്പണറായി ഇറക്കണമെന്ന ആലോചനയിലാണ് കോഹ്‌ലി. സാധാരണഗതിയില്‍ സ്‌പെഷ്യലിസ്റ്റ് ഓപ്പണറായ കെ.എല്‍. രാഹുലിനാണ് അവസരം നല്‍കേണ്ടത്. എന്നാല്‍ ഓസ്‌ട്രേലിയക്കെതിരെ മികവ് കാട്ടിയ ഹനുമ വിഹാരിയും ഓപ്പണറുടെ റോളിന് യോജിച്ച ബാറ്റ്‌സ്മാനാണ്.
യുവതാരങ്ങളായ ഷായ് ഹോപ്പ്, ജോണ്‍ കാംപ്‌ബെല്‍, ഷിംറോണ്‍ ഹെറ്റ്‌മെയര്‍ എന്നിവരാണ് വിന്‍ഡീസിന്റെ ശക്തികേന്ദ്രങ്ങള്‍. ഡാരണ്‍ ബ്രാവോയാണ് അവരുടെ ഏറ്റവും പരിചയ സമ്പന്നനായ കളിക്കാരന്‍. 52 ടെസ്റ്റില്‍ 3500 റണ്‍സ് നേടിയിട്ടുണ്ട്. ലോക ക്രിക്കറ്റിലെ തടിമാടനായ റഹ്ഖീം കോണ്‍വാള്‍ ഇന്ന് ടെസ്റ്റില്‍ അരങ്ങേറ്റം കുറിച്ചേക്കും.
വിന്‍ഡീസിനെതിരെ ഇന്ത്യ രണ്ട് ടെസ്റ്റുകളാണ് കളിക്കുക. രണ്ടാം ടെസ്റ്റ് മുപ്പതിന് കിങ്ങ്‌സ്റ്റണില്‍ ആരംഭിക്കും.
