ശ്രീനഗര്: കശ്മീരിന് പ്രത്യേക പദവി നല്കുന്ന 370-ാം വകുപ്പ് കേന്ദ്രസര്ക്കാര് റദ്ദാക്കിയതിന് പിന്നാലെ കശ്മീരില് സുരക്ഷാ സന്നാഹം വര്ദ്ധിപ്പിച്ചു. കൂടുതല് സൈനികരെ കശ്മീരിന്റെ വിവിധ ഭാഗങ്ങളില് വിന്യസിച്ചു. കരസേനയും വ്യോമസേനയുമടക്കം അതീവ ജാഗ്രതയിലാണ്.
രാജ്യത്തിന്റെ വിവിധ ഭാഗങ്ങളില്നിന്നായി എണ്ണായിരത്തോളം അര്ധസൈനികരെയാണ് ഇന്ന് അധികമായി വിന്യസിച്ചത്. ഉത്തര് പ്രദേശ്, ഒഡീഷ, അസം ഉള്പ്പെടെയുള്ള സംസ്ഥാനങ്ങളില് നിന്ന് ആകാശമാര്ഗമാണ് ഇവരെ എത്തിച്ചതെന്നാണ് റിപ്പോര്ട്ട്.
സംസ്ഥാനത്തെ ക്രമസമാധാന നില വിലയിരുത്തുന്നതിന് സി ആര് പി എഫ് ഡയറക്ടര് ജനറല് രാജിവ് ഭട്നാറിനെ ജമ്മു കശ്മീരിലേക്ക് അയച്ചിട്ടുണ്ട്. രാജസ്ഥാനിലെ ജയ്സാല്മറിലേക്ക് പുറപ്പെടാനിരുന്ന കരസേനാ മേധാവി ബിപിന് റാവത്ത് യാത്ര റദ്ദാക്കി ദല്ഹിയില് തുടരുകയാണ്.
ജമ്മു കശ്മീരിനു പ്രത്യേകപദവി നല്കുന്ന ആര്ട്ടിക്കിള് 370 റദ്ദാക്കണമെന്ന കേന്ദ്രസര്ക്കാര് ശുപാര്ശയില് രാഷ്ട്രപതി രാം നാഥ് കോവിന്ദ് തിങ്കളാഴ്ച രാവിലെ ഒപ്പുവെച്ചിരുന്നു. ഇതിന് പിന്നാലെയാണ് ജമ്മു കശ്മീരില് സുരക്ഷ ഇരട്ടിയാക്കിയത്.
കഴിഞ്ഞ കുറച്ച് ദിവസങ്ങളായി കശ്മീരില് സൈനിക നടപടികള് ശക്തമാക്കിയിരുന്നു. അധിക സൈനികരെ വിന്യസിച്ചും പരിശോധനകള് കര്ശനമാക്കിയും ആശങ്ക ഉയര്ത്തിയ നീക്കങ്ങളായിരുന്നു നടന്നത്. കനത്ത സുരക്ഷാ സന്നാഹം ഒരുക്കിയ കശ്മീരില് കഴിഞ്ഞ ദിവസം അര്ധരാത്രിയോടെ നിരോധനാജ്ഞ നിലവില് വന്നു.
സംസ്ഥാനമാകെ മൊബൈല് ഫോണുകളില് ഇന്റര്നെറ്റ് ബന്ധവും വിച്ഛേദിച്ചിരുന്നു. ഇത്രയും മുന്നൊരുക്കങ്ങള് നടത്തിയ ശേഷമാണ് ആര്ട്ടിക്കിള് 370 റദ്ദാക്കുകയാണെന്ന് സുപ്രധാന തീരുമാനം കേന്ദ്ര ആഭ്യന്തരമന്ത്രി അമിത് ഷാ രാജ്യസഭയില് പ്രഖ്യാപിച്ചത്. ഇതിന് പിന്നാലെ രാജ്യതലസ്ഥാനമായ ദല്ഹിയിലടക്കം കേന്ദ്രം സുരക്ഷ വര്ധിപ്പിച്ചിട്ടുണ്ട്. ദല്ഹി മെട്രോ കര്ശന നിരീക്ഷണത്തിലാണ്. ഉത്തര്പ്രദേശ്, അസം, ഒഡീഷ എന്നിവിടങ്ങളിലും സുരക്ഷ വര്ധിപ്പിച്ചിട്ടുണ്ട്.
