ന്യൂദല്ഹി: ജമ്മു കശ്മീരില് സുപ്രധാന തീരുമാനങ്ങളുമായി കേന്ദ്ര സര്ക്കാര്. ഇതിന്റെ ഭാഗമായി രാജ്യസഭയില് നിര്ണായകനീക്കങ്ങള് ആരംഭിച്ചു. രാജ്യസഭയില് അടിയന്തരനിയമ നിര്മാണ നടപടി ആരംഭിക്കുമെന്നും ഇതിന്റെ ഭാഗമായി 11 മണിക്കുള്ള ശൂന്യവേള മാറ്റിവച്ചതായും രാജ്യസഭ ചെയര്മാന് വ്യക്തമാക്കി. പ്രധാനമന്ത്രിയുടെ വസതിയില് കേന്ദ്രമന്ത്രിസഭയുടെ അടിയന്തരയോഗം നടന്നതിന് ശേഷമാണ് ഇക്കാര്യത്തെ സംബന്ധിച്ചുള്ള അറിയപ്പ് പുറത്തുവന്നത്.
നേരത്തെ കശ്മീര് വിഷയം ചര്ച്ച ചെയ്യാന് പ്രധാനമന്ത്രി നരേന്ദ്ര മോദിയുടെ വസതിയില് യോഗം ചേര്ന്നിരുന്നു. സുരക്ഷാ സമിതിയിലെ അംഗങ്ങളായ രാജ്നാഥ് സിംഗ്, അമിത് ഷാ, നിര്മ്മല സീതാരാമന്, എസ് ജയ്ശങ്കര് എന്നിവരും ഇന്ന് യോഗത്തില് പങ്കെടുത്തു. സാധാരണ വ്യാഴാഴ്ച ദിവസങ്ങളില് ചേരുന്ന മന്ത്രിസഭ ഇന്ന് ചേരുന്നത് കശ്മീരിലെ സവിശേഷ സാഹചര്യം ചര്ച്ച ചെയ്യാനാണെന്നാണ് വിവരം. ഇന്നലെ കേന്ദ്ര ആഭ്യന്തര മന്ത്രി അമിത് ഷാ ദേശീയ സുരക്ഷ ഉപദേഷ്ടാവുമായും ആഭ്യന്തര സെക്രട്ടറിയുമായും പ്രത്യേകം ചര്ച്ചകള് നടത്തി സ്ഥിതിഗതികള് വിലയിരുത്തിയിരുന്നു.
ജമ്മു കശ്മീരിലെ വിഘടനവാദി നേതാക്കളെ സൈന്യം വീട്ടുതടങ്കലിലാക്കിയതിന് പിന്നാലെ ഗവര്ണര് സത്യപാല് മാലിക് ഇന്നലെ രാത്രിയില് അടിയന്തര യോഗം വിളിച്ചിരുന്നു. അര്ദ്ധരാത്രിയില് സംസ്ഥാനത്തെ ഉന്നത ഉദ്യോഗസ്ഥരുമായി രാജ്ഭവനിലാണ് അദേഹം കൂടികാഴ്ച നടത്തിയത്. ചീഫ് സെക്രട്ടറിയും ഡി.ജി.പിയും യോഗത്തിനെത്തിയിരുന്നു. നേരത്തെ, ജമ്മു കശ്മീരില് സൈനിക നീക്കം ആരംഭിച്ചതോടെ പ്രധാന വിഘടനവാദി നേതാക്കളെ വീട്ടുതടങ്കിലാക്കിയിരുന്നു.
