രാവണന്റെ സഹോദരി സാക്ഷാല് അഞ്ജനാശൈലം പോലുള്ള ശൂര്പ്പണഖ മുലകളും മൂക്കും കാതുകളും നഷ്ടപ്പെട്ട് ചോരയൊലിപ്പിച്ച് അലമുറയിട്ടുകൊണ്ട് രാവണന്റെ മുമ്പിലെത്തി. അംഗങ്ങള് നഷ്ടപ്പെട്ട് മുന്നില് വന്നുനില്ക്കുന്ന സഹോദരിയോട്, വത്സേ, അംഗങ്ങള് നഷ്ടപ്പെട്ട് വൈരൂപ്യം സംഭവിച്ചതെങ്ങനെയെന്ന് രാവണന് ചോദിക്കുകയുണ്ടായി. ഇതു ചെയ്തത് ആരായാലും അവരെ ഞാന് ഒടുക്കുന്നതാണെന്ന് പറഞ്ഞു.
നീ രാജാവായി നിലകൊള്ളുന്നതെന്തിനാണ്? ചാരചക്ഷുസും വിചാരവുമില്ലാത്ത സ്ത്രീജിതനായ നീ നാട്ടുകാര്യങ്ങള് എന്തറിയുന്നു? ഖരദൂഷണ ത്രിശിരാക്കളെ കൂട്ടത്തോടെ പതിനാലായിരത്തെയും രാമന് അര യാമംകൊണ്ട് വകവരുത്തിയത് കഷ്ടം തന്നെയാണ്.
എന്തിനാണ് രാമന് അവരെ വധിച്ചതെന്ന് ശൂര്പ്പണഖയോട് അന്വേഷിക്കുന്നു. മറുപടിയായി, ഞാനൊരു ദിവസം കാനനത്തിലൂടെ ഒറ്റയ്ക്ക് സഞ്ചരിക്കുമ്പോള് ഗൗതമീതീരത്തെത്തി. അപ്പോള് പഞ്ചവടിയില് ജടാവല്ക്കലങ്ങളെ ധരിച്ച രാമന്റെ കൂടെ അതീവ സുന്ദരിയായ ധര്മ്മപത്നി നില്ക്കുന്നതു കാണാനിടയായി. രാമന്റെ അടുത്തു നില്ക്കുന്ന ഭാമിനിയെ കണ്ടപ്പോള്, ലോകത്തില് സൗന്ദര്യത്തെ വെല്ലാന് അവളെക്കവിഞ്ഞ് ആരുമില്ലെന്നു തോന്നി. വാണിമാതാവും, ഇന്ദ്രാണിയും ഇന്ദിരാദേവിയും ഗൗരിയും അപ്സരസുകള് പോലും അവളുടെ സൗന്ദര്യത്തില് നാണംകെട്ടുപോകും. അവളെ നിന്റെ പത്നിയാക്കാന് ഞാന് ഒരുമ്പെട്ടപ്പോള് രാമസഹോദരന് ലക്ഷ്മണന് എന്റെ മുലകളും മൂക്കും ചെവികളും അരിഞ്ഞു വീഴ്ത്തി. ഈ വിവരം ഖരനോടും പറയുകയുണ്ടായി. അപ്പോള് ഖരന് രാജാവിനോടേറ്റുമുട്ടാനൊരുങ്ങി.
അതീവ സുന്ദരിയായ ജാനകീദേവി നിന്റെ ഭാര്യയായാല് അതു ജന്മസാഫല്യമായിരിക്കും. അതിന് ഉത്സാഹിക്കുന്നതു നന്നായിരിക്കും. എന്നാല് രാമനോട് എതിരിടാന് നിനക്കു കെല്പുമില്ല. അതിനാല് ബാലന്മാരെ അയച്ച് മോഹിപ്പിച്ച് കൊണ്ടുപോരുകയേ വഴിയുള്ളു.
അത്യന്തം തേജസ്സോടെ വര്ദ്ധിത വീര്യവാനായ രാമന്റെ അടുത്തേയ്ക്ക് സ്വന്തമാക്കാന് വേണ്ടി കാമാര്ത്തിയോടെ സമീപിച്ചതിന്റെ പരിണതിയായിരുന്നു യഥാര്ത്ഥത്തില് രാമനാല് ശൂര്പ്പണഖയുടെ അംഗഛേദം വരാനിടയായത്. ഈ വാസ്തവം മറച്ചുവെച്ച് സഹോദരി പറഞ്ഞ വാക്കുകളെ അതേപടി വിശ്വസിക്കുകയും സീതാദേവിയെ സ്വന്തമാക്കാനുള്ള ഇച്ഛ പെരുകി വരുകയും ചെയ്തു. ഇത് രാവണനെ സര്വ്വ നാശത്തിലേയ്ക്കാണ് നയിച്ചത്.
