ആലപ്പുഴ: സിപിഐ സംസ്ഥാന സെക്രട്ടറി കാനം രാജേന്ദ്രനെതിരെ പോസ്റ്റര് ഒട്ടിച്ച സംഭവത്തില് സ്വന്തം നേതാക്കള് തന്നെ പോലീസ് പിടിയിലായതോടെ നാണം കെട്ട് പാര്ട്ടി. എറണാകുളത്ത് ഡിഐജി ഓഫീസ് മാര്ച്ചിനിടെ നടന്ന പോലീസ് അതിക്രമത്തില് എംഎല്എ അടക്കമുള്ളവര്ക്ക് പരിക്കേറ്റിട്ടും പോലീസ് നടപടിയെ ന്യായീകരിച്ച് പ്രസ്താവന നടത്തിയതിനെ തുടര്ന്ന് കാനം രാജേന്ദ്രനെ സിപിഐ സംസ്ഥാന സെക്രട്ടറി സ്ഥാനത്തു നിന്ന് മാറ്റണമെന്ന വിധത്തില് പോസ്റ്ററുകള് പ്രത്യക്ഷപ്പെട്ടിരുന്നു.
ഇത് വിവാദമായതോടെ പോസ്റ്റര് ഒട്ടിച്ചവര് പാര്ട്ടിക്കാരല്ലെന്ന് കാനം അറിയിച്ചിരുന്നു. ഇതാണ് അന്വേഷണത്തില് പാര്ട്ടിക്ക് തന്നെ നാണക്കേടായത്. സിപിഐക്ക് അകത്തെ വിഭാഗീയതയുടെ തെളിവാണ് പോസ്റ്റര് എന്നും കാനത്തിനെതിരെ കെ.ഇ. ഇസ്മയില് പക്ഷത്തിന്റെ നീക്കമാണ് സംഭവത്തിന് പിന്നിലെന്നും വരുത്തിത്തീര്ക്കാനായിരുന്നു പാര്ട്ടിക്കുള്ളില് ശ്രമം നടത്തിയിരുന്നത്. ഇസ്മയില് പക്ഷ നേതാക്കള്ക്കെതിരെ പാര്ട്ടിക്കകത്ത് കടുത്ത വിമര്ശനവും ഉയര്ന്നിരുന്നു.
എന്നാല് കേസ് അന്വേഷണത്തിന്റെ ഭാഗമായി പോലീസ് നഗരത്തിലെ സിസിടിവി ദൃശ്യങ്ങള് തപ്പിയെടുത്തതോടെയാണ് പോസ്റ്റര് ഒട്ടിച്ചത് കാനം അനുഭാവികള് തന്നെയാണെന്ന് കണ്ടെത്തിയത്. ഇതോടെ തൊടുത്തുവിട്ട ആരോപണങ്ങളെല്ലാം തിരിച്ചു കുത്തുന്ന അവസ്ഥയിലായി. അതിനിടെ കാനത്തിനെതിരെ പോസ്റ്റര് ഒട്ടിച്ച മൂന്നു പേരെ പാര്ട്ടിയില് നിന്നും പുറത്താക്കി.
അതേസമയം പോലീസ് പിടികൂടിയ മൂന്ന് പേരില് ഒതുങ്ങുന്നതല്ല പോസ്റ്റര് പതിച്ചതിന് പിന്നിലെ ഗൂഢാലോചനയെന്നാണ് ഇസ്മയില് പക്ഷം പറയുന്നത്. ഇതിനു പിന്നില് പ്രവര്ത്തിച്ചവരെ പുറത്തുകൊണ്ടുവരാന് പോലീസും പാര്ട്ടിയും വിശദമായി അന്വേഷിക്കണമെന്ന ആവശ്യവും ശക്തമായിട്ടുണ്ട്. ചൊവ്വാഴ്ച കോട്ടയത്ത് ചേരുന്ന മേഖലാ റിപ്പോര്ട്ടിങ്ങില് ഇക്കാര്യം ഉന്നയിക്കാനും ഇസ്മയില് പക്ഷം തീരുമാനിച്ചിട്ടുണ്ട്.
