ന്യൂദല്ഹി : രാജ്യത്തെ ഇലക്ട്രിക് വാഹനങ്ങളുടെ നികുതി 12 ല് നിന്ന് അഞ്ചു ശതമാക്കാന് ജിഎസ്ടി കൗണ്സില് തീരുമാനം. കേന്ദ്ര ധനമന്ത്രി നിര്മ്മല സീതാരാമന്റെ അധ്യക്ഷതയില് ചേര്ന്ന ജിഎസ്ടി കൗണ്സിലാണ് ഇതുസംബന്ധിച്ച് തീരുമാനം എടുത്തത്.
അടുത്തമാസം ഒന്നു മുതല് പുതിയ നിയമം പ്രാബല്യത്തില് വരും. ഇലക്ട്രിക് വാഹനങ്ങളുടെ ചാര്ജറുകളുടെ ജിഎസ്ടി 18 ല് നിന്ന് അഞ്ച് ശതമാനവും ആക്കിയിട്ടുണ്ട്. രാജ്യത്തെ അന്തരീക്ഷ മലിനീകരണം കുറയ്ക്കുന്നതിന്റെ ഭാഗമായി ഇലക്ട്രിക് വാഹന വില്പ്പന പ്രോത്സാഹിപ്പിക്കാനുള്ള കേന്ദ്ര സര്ക്കാര് നയത്തിന്റെ ഭാഗമായാണ് നികുതി കുറച്ചത്. കൂടാതെ ഇന്ത്യയെ ഇലക്ട്രിക് വാഹന നിര്മ്മാണ ഹബ്ബാക്കി മാറ്റാനാണ് സര്ക്കാര് പദ്ധതി, ഇതിനായി ഇലക്ട്രിക് വാഹനങ്ങളുടെ ഘടകങ്ങളെ കസ്റ്റംസ് ഡ്യൂട്ടിയില് നിന്ന് നേരത്തെ തന്നെ ഒഴിവാക്കിയിരുന്നു.
പ്രാദേശിക ഭരണകൂടങ്ങള് ഇലക്ട്രിക് ബസുകള് വാടകയ്ക്ക് എടുക്കുമ്പോള് ജിഎസ്ടി ഒഴിവാക്കാനുള്ള താരുമാനത്തിനും കൗണ്സില് അംഗീകാരം നല്കിയിട്ടുണ്ട്. ഇലക്ട്രിക് വാഹനങ്ങള് വാങ്ങാനെടുക്കുന്ന വായ്പയുടെ പലിശയില് 1.5 ലക്ഷം രൂപയുടെ ആദായനികുതി ഇളവുകള് നല്കുമെന്നും കേന്ദ്ര ധനമന്ത്രി നിര്മ്മലാ സീതാരാമന് ബജറ്റ് അവതരണവേളയില് പ്രഖ്യാപനം നടത്തിയിരുന്നു. 1.5 ലക്ഷം രൂപ നികുതി ഇളവ് വരുന്നതോടെ വായ്പ തിരിച്ചടവില് ഏകദേശം 2.5 ലക്ഷം രൂപയുടെ ആനുകൂല്യം ഉപഭോക്താവിന് ലഭിക്കും.
2030 ഓടെ രാജ്യത്തെ ഇലക്ട്രിക് വാഹനങ്ങള് 30 ശതമാനമായി ഉയര്ത്താനാണ് സര്ക്കാര് പദ്ധതി. ഇലക്ട്രിക് വാഹനങ്ങളുടെ ഉപയോഗം വര്ധിപ്പിക്കാനായി ചാര്ജിങ് സ്റ്റേഷനുകളും മറ്റു അടിസ്ഥാന വികസനങ്ങളും ഉടന് നടപ്പാക്കും.
