രാംപുരഹട്ട്: പശ്ചിമബംഗാളിലെ ബിര്ബൂമിലെ സര്ക്കാര് ആശുപത്രിയില് ശസ്ത്രക്രിയയിലൂടെ യുവതിയുടെ വയറ്റില്നിന്ന് നീക്കംചെയ്തത് ഒന്നര കിലോ സ്വര്ണവും 90 നാണയങ്ങളും. ബുധനാഴ്ചയാണ് 29 വയസ്സുള്ള യുവതിയെ ശസ്ത്രക്രിയയ്ക്ക് വിധേയയാക്കിയത്.
മാല, മൂക്കുത്തി, കമ്മല്, വളകള്, പാദസരം തുടങ്ങിയ ആഭരണങ്ങളും അഞ്ച്, പത്ത് രൂപയുടെ 90 നാണയങ്ങളുമാണ് യുവതിയുടെ വയറ്റില്നിന്ന് ശസ്ത്രക്രിയയിലൂടെ നീക്കിയത്. ആഭരണങ്ങളില് ചിലത് സ്വര്ണംകൊണ്ടുള്ളതാണ്. നാണയങ്ങളെല്ലാം ചെമ്പാണ്. ഒരാഴ്ചയോളം നീണ്ടുനിന്ന പരിശോധനകള്ക്കും നിരീക്ഷണങ്ങള്ക്കും ശേഷമാണ് യുവതിയെ ശസ്ത്രക്രിയയ്ക്ക് വിധേയയാക്കിയതെന്ന് ശസ്ത്രക്രിയയ്ക്ക് നേതൃത്വം നല്കിയ ഡോ. സിദ്ധാര്ഥ ബിശ്വാസ് പറഞ്ഞു.
മര്ഗ്രാം സ്വദേശിയാണ് യുവതി. മകള്ക്ക് മാനസികമായി അസ്വാസ്ഥ്യമുണ്ടായിരുന്നതായി യുവതിയുടെ അമ്മ പറയുന്നു. കഴിഞ്ഞ കുറേ ദിവസങ്ങളായി അക്രമ വാസന കാട്ടുകയും വീട്ടുപകരണങ്ങള് തകര്ക്കുകയും ചെയ്തിരുന്നു. അടുത്ത കാലത്തായ ഇവരുടെ വീട്ടില്നിന്ന് ആഭരണങ്ങള് കാണാതാകുന്നത് പതിവായിരുന്നു. ഇതിനെക്കുറിച്ച് ചോദിച്ചാല് മകള് കരച്ചില് ആരംഭിക്കും. അതിനാല് അവളെ രഹസ്യമായി നിരീക്ഷിച്ചു. അങ്ങനെയാണ് ആഭരണങ്ങള് വിഴുങ്ങുന്നുണ്ടെന്ന് മനസ്സിലായത്. തുടര്ന്ന് ആശുപത്രിയില് പ്രവേശിപ്പിക്കുകയായിരുന്നെന്നും യുവതിയുടെ അമ്മ പറഞ്ഞു.
