ലക്നൗ: കുട്ടികളെ പഠിപ്പിക്കുന്നതിനിടയില് അദ്ധ്യാപകന് ക്ലാസ് മുറിയില് കിടന്നുറങ്ങുന്ന ദൃശ്യങ്ങള് സോഷ്യല് മീഡിയയില് വൈറലായതിനെ തുടര്ന്ന് സ്വതന്ത്ര വിദ്യാഭ്യാസ ചുമതലയുള്ള മന്ത്രി അദ്ധ്യാപകനെ താല്ക്കാലികമായി പുറത്താക്കി.
ഉത്തര്പ്രദേശിലെ സിതപ്പൂര് ജില്ലയിലാണ് ഇത്തരമൊരു സംഭവം നടന്നത്. പ്രൈമറി അദ്ധ്യാപകനായ അതുല് കുമാര് മിശ്ര തറയില് കുട്ടികളുടെ നടുവില് തലയില് തുണിമൂടി കിടന്നുറങ്ങുന്ന ചിത്രമായിരുന്നു സോഷ്യല് മീഡിയയിലൂടെ പ്രചരിച്ചത്.
ഇത് വൈറല് ആകുകയും മന്ത്രിയുടെ ശ്രദ്ധയില്പ്പെടുകയും ചെയ്തതിനെ തുടര്ന്ന് അന്വേഷണത്തിന് മന്ത്രി അനുപമ ജയ്സ്വാള് ഉത്തരവിടുകയായിരുന്നു. അന്വേഷണത്തില് ഈ അദ്ധ്യാപകന് സ്കൂളില് സ്ഥിരമായി ഹാജരാകാതിരുന്നതായും സ്കൂള് സമയങ്ങളില് ക്ലാസ് മുറിയില് ഉറങ്ങാറുണ്ടെന്നും കണ്ടെത്തി. ഈ റിപ്പോര്ട്ടിന്റെ അടിസ്ഥാനത്തിലാണ് നടപടി.
ക്ലാസ് റൂമുകളില് കുട്ടികള്ക്ക് ഡെസ്ക്കും ബെഞ്ചും ഇല്ലെന്നുള്ളതും സോഷ്യല് മീഡിയയില് ചര്ച്ചയായിരുന്നു. കുട്ടികള് കാര്പ്പറ്റിന്റെ പുറത്ത് നിലത്തിരുന്നാണ് പഠിക്കുന്നതെന്നും ഫോട്ടോകളില് കണ്ടെത്തിയതിനെ തുടര്ന്ന് മന്ത്രി സ്കൂളിലേക്ക് പഠനോപകരണങ്ങള് മറ്റ് ആവശ്യവസ്തുക്കള് വാങ്ങാനും നിര്ദ്ദേശം നല്കിയിട്ടുണ്ട്.
