ന്യൂദല്ഹി: ഭീകരവാദത്തെ ന്യായീകരിക്കുന്നുവെന്ന കണ്ടെത്തലിനെത്തുടര്ന്ന് സത്ലജ് സിനിമയ്ക്ക് ഏര്പ്പെടുത്തിയ വിലക്ക് തുടരണമെന്ന് വാര്ത്താവിതരണ പ്രക്ഷേപണ മന്ത്രാലയത്തിന് കീഴിലെ സമിതിയായ ഇന്റര്-ഡിപ്പാര്ട്ട്മെന്റല് കമ്മിറ്റി.
സിനിമ രാജ്യസുരക്ഷയ്ക്ക് ഭീഷണിയാണെന്നും ഐടി ആക്ടിന്റെ 69-എ വകുപ്പ് പ്രകാരം വിലക്ക് നിലനില്ക്കുമെന്നും സമിതി അറിയിച്ചു. ചിത്രം രാജ്യത്തിന്റെ പരമാധികാരത്തിനും അഖണ്ഡതയ്ക്കും വിരുദ്ധമാണ്. ഭീകരസ്വഭാവമുള്ള സംഘടനകളെ ന്യായീകരിക്കുന്നു. ഓണ്ലൈനില് പ്രചരിക്കുന്ന ചിത്രത്തിന്റെ വ്യാജ പതിപ്പുകള് കണ്ടെത്തി നീക്കം ചെയ്യാന് സി-5 പ്ലാറ്റ്ഫോമും നിര്മാതാക്കളും നടപടികള് സ്വീകരിക്കണമെന്നും സമിതി ആവശ്യപ്പെട്ടു. പഞ്ചാബില് നടന്ന കാര്യങ്ങളെ ഏകപക്ഷീയമായാണ് അവതരിപ്പിക്കുന്നത്. ഭീകരവാദത്തിനെതിരായ നിയമപരമായ നടപടികളെ ഭരണകൂടത്തിന്റെ അതിക്രമവും ക്രൂരതയുമായി ചിത്രീകരിക്കുന്നു. ചില രംഗങ്ങള് വിഘടനവാദ പ്രചാരണങ്ങള്ക്ക് ആക്കം കൂട്ടുമെന്നും സമിതി ചൂണ്ടിക്കാട്ടി.
ഹണി ടെഹ്റാന് സംവിധാനം ചെയ്ത ദില്ജിത് ദൊസാഞ്ജ് ചിത്രം ജൂലൈ മൂന്നിനാണ് ഒടിടിയില് റിലീസ് ചെയ്തത്. സുരക്ഷാ കാരണങ്ങള് ചൂണ്ടിക്കാട്ടി ഐടി. ആക്ടിലെ 69-എ വകുപ്പ് പ്രകാരം ചിത്രം പിന്വലിക്കാന് വാര്ത്താവിതരണ മന്ത്രാലയം സി5ന് നിര്ദേശം നല്കി. പിന്നാലെ ചിത്രം പിന്വലിച്ചു. തുടര്ന്ന് ചിത്രം ഐഡിസിയുടെ പരിശോധനയ്ക്ക് വിടുകയുമായിരുന്നു.
