ന്യൂദല്ഹി: ദേശീയപാര്ട്ടിപദവി നിലനിര്ത്താന് പാരമ്പര്യത്തിന്റെ പഴങ്കഥകെട്ടഴിച്ച് സി.പി.ഐ. ദേശീയരാഷ്ട്രീയത്തിലെ പാരമ്പര്യം കണക്കിലെടുത്ത് ദേശീയപാര്ട്ടിപദവി എടുത്തുമാറ്റെരുതെന്നാണ് സിപിഐ മുന്നോട്ട് വെയ്ക്കുന്ന ന്യായീകരണം. ഇക്കാര്യം ഒന്നയിച്ച് തിരഞ്ഞെടുപ്പു കമ്മിഷനെ സമീപിക്കാനൊരുങ്ങുകയാണ് സിപിഐ. എല്ലാ സംസ്ഥാനങ്ങളിലും സാന്നിധ്യമുള്ള പാര്ട്ടിയായതിനാല് തങ്ങളുടെ പദവി നിലനിര്ത്തണമെന്ന് സി.പി.ഐ. ആവശ്യപ്പെടും. നാലുസംസ്ഥാനങ്ങളില് ആറുശതമാനം വോട്ടെന്ന മാനദണ്ഡത്തില് പാര്ട്ടി വരില്ല. എന്നാല്, മൂന്നുസംസ്ഥാനങ്ങളിലായി തങ്ങള്ക്ക് ആറുശതമാനം വോട്ടുണ്ടെന്നാണ് സി.പി.ഐ. ഉയര്ത്തുന്ന വാദം.
ലോകസഭാ തെരഞ്ഞെടുപ്പില് നാണംകെട്ട തോല്വി എറ്റുവാങ്ങിയതോടെയാണ് രാഷ്ട്രീയ പാര്ട്ടികളുടെ ദേശീയ പാര്ട്ടി പദവികള്ക്ക് ഇളക്കം തട്ടിയത്. സിപിഐയ്ക്ക് പുറമെ പശ്ചിമബംഗാള് മുഖ്യമന്ത്രി മമതാ ബാനര്ജിയുടെ നേതൃത്വത്തിലുള്ള തൃണമൂല് കോണ്ഗ്രസിനും ശരത്പവാറിന്റെ നാഷണലിസ്റ്റ് കോണ്ഗ്രസ് പാര്ട്ടിക്കും( എന്.സി.പി)മാണ് ദേശീയ പാര്ട്ടി പദവി നഷ്ടമാകുന്നത്.
ഈ പാര്ട്ടികള്ക്ക് തിരഞ്ഞെടുപ്പ് കമ്മീഷന് ഉടന് നോട്ടീസ് നല്കും. ദേശീയ പാര്ട്ടി പദവി എന്തുകൊണ്ട് റദ്ദാക്കരുത് എന്നതിന് കാരണം ബോധിപ്പിക്കാന് ആവശ്യപ്പെട്ടാണ് നോട്ടീസ് നല്കുന്നത്. ലോക്സഭ തിരഞ്ഞെടുപ്പിലെ ഈ പാര്ട്ടികളുടെ മോശം പ്രകടനം കണക്കിലെടുത്താണ് ഇത്തരമൊരു നടപടി തെരഞ്ഞെടുപ്പ് കമ്മീഷന് സ്വീകരിച്ചിരിക്കുന്നത്. 2014ലെ ലോക്സഭ തിരഞ്ഞെടുപ്പ് മുതല് തന്നെ ഈ പാര്ട്ടികളുടെ ദേശീയ പാര്ട്ടി പദവി ഭീഷണിയിലാണ്. ഒരു രാഷ്ട്രീയ പാര്ട്ടിക്ക് എല്ലാ സംസ്ഥാനങ്ങളിലും ഒരൊറ്റ തിരഞ്ഞെടുപ്പ് ചിഹ്നം നിലനിര്ത്തണമെങ്കില് ദേശീയ പാര്ട്ടി പദവി വേണം.
ഇപ്പോള് എട്ട് പാര്ട്ടികള്ക്കാണ് ദേശീയ പാര്ട്ടി പദവിയുള്ളത്. കോണ്ഗ്രസ്, ബി.ജെ.പി, സി.പി.ഐ.എം, സി.പി.ഐ, ബി.എസ്.പി, എന്സി.പി, എ.ഐ.ടി.സിയും ഏറ്റവും പുതുതായി മണിപ്പൂര്, മേഘാലയ, നാഗാലാന്ഡ് എന്നിവിടങ്ങളിലെ അംഗീകൃത സംസ്ഥാന പാര്ട്ടിയായ നാഷണല് പീപ്പിള്സ് പാര്ട്ടിക്കും ദേശീയ പദവിയുണ്ട്. 1968ലെ ഇലക്ഷന് സിംബല്സ് (റിസര്വേഷന് ആന്ഡ് അലോട്മെന്റ്) ഉത്തരവ് പ്രകാരം ഒരു പാര്ട്ടിയെ ദേശീയ പാര്ട്ടിയായി കണക്കാക്കണമെങ്കില് ചുരുങ്ങിയത് നാല് സംസ്ഥാനങ്ങളിലെങ്കിലും ലോക്സഭ മണ്ഡലങ്ങളിലോ നിയമസഭ മണ്ഡലങ്ങളിലോ ആറ് ശതമാനം വോട്ട് നേടാന് കഴിയണമെന്നാണ്.
നാല് അംഗങ്ങളെങ്കിലും ലോക്സഭയില് വേണം. മൊത്തം ലോക്സഭ സീറ്റുകളുടെ രണ്ട് ശതമാനമെങ്കിലും നേടണം. ചുരുങ്ങിയത് മൂന്ന് സംസ്ഥാനങ്ങളിലെങ്കിലും സ്ഥാനാര്ത്ഥികള് വേണം. 2014 ല് തൃണമൂല് കോണ്ഗ്രസിനും എന്.സി.പിക്കും സി.പി.ഐ ക്കും മായാവതിയുടെ ബഹുജന് സമാജ് പാര്ട്ടിക്കും ദേശീയ പദവിയില് തുടരുന്നതിന്റെ അയോഗ്യത സംബന്ധിച്ച് കാരണം കാണിക്കല് നോട്ടീസ് അയച്ചിരുന്നു.
2014 ലെ തെരഞ്ഞെടുപ്പിന് ശേഷം, രാഷ്ട്രീയ പാര്ട്ടികള്ക്ക് പദവി നിലനിര്ത്താന് കമ്മീഷന് അനുവദിച്ചതുപോലെ, വീണ്ടും തുടരാന് അനുവദിക്കുമോ എന്നത് സംശയമാണ്. ദേശീയ പാര്ട്ടി പദവിയില് നിന്നും ഇവരെ ഒഴിവാക്കുകയാണെങ്കില് മൊത്തം ദേശീയ പാര്ട്ടികളുടെ എണ്ണം എട്ടില് നിന്ന് അഞ്ചാകും.
