ന്യൂദല്ഹി : ലോക്സഭാ തെരഞ്ഞെടുപ്പ് തോല്വിക്ക് പിന്നാലെ സാമ്പത്തിക ഞെരുക്കത്തിലും അകപ്പെട്ട് കോണ്ഗ്രസ് പാര്ട്ടി. കടുത്ത സാമ്പത്തിക പ്രതിസന്ധിമൂലം ഐഎസിസി ആസ്ഥാനത്തെ ജീവനക്കാര്ക്ക് ശമ്പളം പോലും കൃത്യമായി വിതരണം ചെയ്യാന് സാധിക്കുന്നില്ലെന്നാണ് റിപ്പോര്ട്ടുകളില് സൂചിപ്പിക്കുന്നത്. ഇത്തവണ കേന്ദ്ര ഭരണം പിടിക്കാമെന്ന പ്രതീക്ഷയില് തെരഞ്ഞെടുപ്പ് പ്രചാരണത്തിനും പരസ്യങ്ങള്ക്കുമായി കണക്കും മറ്റുമില്ലാതെ പണം ചെലവിട്ടതും സാമ്പത്തിക ബാധ്യതയിലേ്ക്ക് പാര്ട്ടിയെ നയിച്ചെന്നും ആരോപണം ഉയര്ന്നിട്ടുണ്ട്.
ഇതേത്തുടര്ന്ന് യൂത്ത് കോണ്ഗ്രസ്, വിദ്യാര്ത്ഥി യൂണിയന്, മഹിളാ കോണ്ഗ്രസ്, സേവാദള് ഘടകങ്ങളോടു ചെലവുചുരുക്കാന് നേതൃത്വം ആവശ്യപ്പെട്ടിരിക്കുകയാണ്. തെരഞ്ഞെടുപ്പ് തോല്വിയെ തുടര്ന്ന് കോണ്ഗ്രസ് പാര്ട്ടി വിവിധ പ്രശ്നങ്ങളില് പെട്ട് ഉലയുന്ന കാഴ്ചയാണ് ഇപ്പോള് കണ്ടുവരുന്നത്. ഫലപ്രഖ്യാപനം പുറത്തുവന്നതോടെ പരാജയതത്തിന്റെ ഉത്തരവാദിത്തം ഏറ്റെടുത്ത് കോണ്ഗ്രസ് പ്രസിഡന്റ് സ്ഥാനത്തു നിന്നും രാഹുല് ഗാന്ധി നാടകീയമായി രാ്ജിവെച്ചു. അതിനു പിന്നാലെ കോണ്ഗ്രസ്സും ജെഡിഎസും ഭരിക്കുന്ന കര്ണ്ണാടയില് സര്ക്കാരിന്റെ നിലനില്പ്പ് തന്നെ പ്രതിസന്ധിയിലാണ്. അതിനു പിന്നാലെയാണ് പാര്ട്ടി കടുത്ത സാമ്പത്തിക പ്രതിസന്ധിയിലും അകപ്പെടുന്നത്.
സേവാദള് ഓഫീസിന്റെ മാസവിഹിതം രണ്ടരലക്ഷം രൂപയില്നിന്നു രണ്ടുലക്ഷം രൂപയായി കുറച്ചു. അടുത്തമാസം മുതല് ജീവനക്കാരുടെ ശമ്പളത്തില് 5000 രൂപയുടെവരെ കുറവുണ്ടായേക്കാമെന്ന ആശങ്കയിലാണിപ്പോള് ജീവനക്കാര്.
എഐസിസി ഓഫീസില്മാത്രം നൂറ്റമ്പതോളം ജീവനക്കാരുണ്ട്. ഇതില് നൂറ്റിപ്പത്തുപേര് സ്ഥിരംജീവനക്കാരാണ്. ഇവരുടെ ശമ്പളം ഇതുവരെ മുടങ്ങിയിട്ടില്ല. താത്കാലികക്കാരില് പലര്ക്കും മൂന്നുമാസത്തെവരെ കുടിശ്ശികയുണ്ടെന്നാണറിയുന്നത്.
കോണ്ഗ്രസിന്റെ സാമൂഹികമാധ്യമ സെല്ലിലെ 20 പേര് തെരഞ്ഞെടുപ്പ് ഫലം പുറത്തുവന്നതിനു പിന്നാലെ രാജിവെച്ചിരുന്നു. പാര്ട്ടി തോല്വിയുടെ അടിസ്ഥാനത്തിലാണ് ഇവര് രാജിവെച്ചതെന്നാണ് വാര്ത്തകള് ആദ്യം പുറത്തുവന്നത്. എന്നാല് ശമ്പള കുടിശ്ശിക നല്കാത്തതിനെ തുടര്ന്നാണ് ഇവരില് പലരും രാജിവെച്ചതെന്നാണ് ഇപ്പോള് അറിയാന് കഴിയുന്നത്. നിലവില് 35 പേരാണു സെല്ലിലുള്ളത്. ഇവരില് ചിലര്ക്കു ശമ്പളം മുടങ്ങുന്നുണ്ടെന്ന് കോണ്ഗ്രസ് കേന്ദ്രങ്ങള്തന്നെ പറയുന്നു. മാധ്യമവിഭാഗത്തിന്റെ അവസ്ഥയും ഇതുതന്നെ.
അതേസമയം വിവിധ സംസ്ഥാനങ്ങളിലെ കോടതികളില് ഫയല് ചെയ്തിട്ടുള്ള കേസുകളില് ഹാജരാവുന്നതിനു രാഹുല്ഗാന്ധിക്കുമാത്രം വന് സാമ്പത്തികബാധ്യത തന്നെ ഉണ്ടാക്കുന്നുണ്ട്.
കര്ണാടകത്തിലെ പ്രതിസന്ധി പരിഹരിക്കുന്നതിനും കോണ്ഗ്രസ് ഭരിക്കുന്ന മറ്റു സംസ്ഥാനങ്ങളില് ഭരണം നിലനിര്ത്തുന്നതിനുള്ള പ്രവര്ത്തനങ്ങള്ക്കും വേണ്ട ചെലവു വേറെയും. ഭരിക്കുന്ന സംസ്ഥാനങ്ങള് കുറഞ്ഞതും വരുമാനത്തില് കുറവുണ്ടാക്കുന്നു. ഇതിലെല്ലാം ഉപരി ഈ വര്ഷം അവസാനത്തോടെ മഹാരാഷ്ട്ര ഉള്പ്പടെ മൂന്ന് സംസ്ഥാനങ്ങളില് നിയമസഭ തെരഞ്ഞെടുപ്പ് നടക്കും. ഇവിടെ തെരഞ്ഞെടുപ്പ് പ്രചാരണത്തിനുള്ള പണം കണ്ടെത്താനും കോണ്ഗ്രസ് വേറെ എന്തെങ്കിലും മാര്ഗ്ഗം കണ്ടെത്തണം.
