തിരുവനന്തപുരം: തിരുവനന്തപുരം യൂണിവേഴ്സിറ്റി കോളേജിലെ വിദ്യാര്ത്ഥിയായ അഖിലിനെ കുത്തി പരിക്കേല്പ്പിച്ച സംഭവത്തില് ഒരു എസ്എഫ്ഐ പ്രവര്ത്തകന് അറസ്റ്റില്. നേമം സ്വദേശിയായ ഇജാബിനെയാണ് പോലീസ് അറസ്റ്റ് ചെയ്തത്. കേസുമായി ബന്ധപ്പെട്ട് കണ്ടാലറിയാവുന്ന പ്രതികളില് ഒരാളാണ് ഇയാളെന്ന് പോലീസ് പറഞ്ഞു. എന്നാല് മുഖ്യപ്രതികളെക്കുറിച്ച് ഇനിയും ഒരു സൂചനയും ലഭിച്ചിട്ടില്ല. കേസില് പോലീസ് അടിയന്തിര നടപടി സ്വീകരിക്കുന്നില്ലെന്നു കാണിച്ച് പ്രതിഷേധം ശക്തമാകുമ്പോഴാണ് പ്രതികളില് ഒരാളെ അറസ്റ്റ് ചെയ്തിരിക്കുന്നത്.
അതേസമയം കേസിലെ പ്രതികള് ഇടത് വിദ്യാര്ത്ഥി സംഘടനയായ എസ്എഫ്ഐ ആയതിനാല് സംസ്ഥാന സര്ക്കാരും ഇതില് ഇടപെടുന്നില്ലെന്നും ആരോപണം ഉയര്ന്നിട്ടുണ്ട്.
അതേസമയം കുത്തേറ്റ അഖിലിന്റെ മൊഴി പോലീസ് ഇന്ന് രേഖപ്പെടുത്തും. ഒളിവിലുളള പ്രതികള് തിങ്കളാഴ്ച മുന്കൂര് ജാമ്യത്തിനായി കോടതിയെ സമീപിച്ചേക്കുമെന്നും സൂചയുണ്ട്. പ്രതികള് എവിടെയെന്ന് പോലീസ് അറിയാമെന്നും അവരെ സംരക്ഷിക്കുകയാണെന്നും വിദ്യാര്ത്ഥികള് ആരോപിക്കുന്നുണ്ട്.
കുത്തിയതിനെ തുടര്ന്നുണ്ടായ സംഘര്ഷ സംഭവങ്ങളുടെ അടിസ്ഥാനത്തില് കോളേജിന് തിങ്കളാഴ്ച അവധി പ്രഖ്യാപിച്ചിരിക്കുകയാണ്. സംഭവം നടന്ന ദിവസം മുതല് പ്രതികളായ എസ്എഫ്ഐ യൂണിറ്റ് പ്രസിഡന്റ് ശിവരഞ്ജിത്, സെക്രട്ടറി നസീം, അമര്, അദ്വൈത്, ആദില്, ആരോമല്, ഇബ്രാഹിം എന്നിവര് ഒളിവിലാണ്.
പ്രതികളെ പിടികൂടാന് ശ്രമം തുടരുന്നുവെന്ന് പോലീസ് പറയുന്നു. എന്നാല് പാര്ട്ടി നേതാക്കള് ഇടപെട്ട് ഇവര് കീഴടങ്ങുന്നതുമായി ബന്ധപ്പെട്ട ചര്ച്ചകള് നടക്കുന്നതായും വിവരമുണ്ട്. കേസിലെ ഏഴ് പ്രതിക്കെതിരെ വധശ്രമത്തിനാണ് പോലീസ് കേസെടുത്തിട്ടുളളത്. അടിയന്തിര ശസ്ത്രക്രിയയ്ക്കു വിധേയനാക്കിയ വിദ്യാര്ത്ഥിയുടെ നില തൃപ്തികരമാണെന്ന് ഡോക്ടര്മാര് അറിയിച്ചു.
കഴിഞ്ഞ ദിവസം അഖില് ക്യാന്റീനില് പാട്ടുപാടിയതിനെ തുടര്ന്നാണ് വിദ്യാര്ഥി സംഘങ്ങള് തമ്മില് തര്ക്കമുണ്ടായത്. ഇതിനെ തുടര്ന്ന് ഇരു വിഭാഗങ്ങളേയും വെള്ളിയാഴ്ച ഒത്തുതീര്പ്പ് ചര്ച്ചക്ക് വിളിച്ചിരുന്നു.
ഇതിനിടെ സംഘര്ഷമുണ്ടാവുകയും വിദ്യാര്ത്ഥികളിലൊരാളെ എസ്എഫ്ഐ യൂണിറ്റ് ഓഫീസിലേക്ക് കൊണ്ടുപോയി മര്ദ്ദിക്കുകയും, മര്ദ്ദനത്തിനിടെ മൂന്നാം വര്ഷ ബിരുദ വിദ്യാര്ത്ഥി അഖിലിനെ കുത്തിപ്പരിക്കേല്പ്പിക്കുകയും ചെയ്തെന്നതാണ് കേസ്.
