അഹമ്മദാബാദ് : നോട്ട് നിരോധനവുമായി ബന്ധപ്പെട്ട ക്രിമിനല് മാനനഷ്ടകേസില് കോണ്ഗ്രസ് നേതാവ് രാഹുല് ഗാന്ധി ഇന്ന് അഹമ്മദാബാദ് മെട്രോ പൊളിറ്റന് മജിസ്ട്രേറ്റ് കോടതിയില് ഹാജരാകും. അഹമ്മദാബാദ് ജില്ലാ സഹകരണ ബാങ്കും, അതിന്റെ ചെയര്മാന് അജയ് പാട്ടേലും നല്കിയ കേസിലാണ്് കോടതിയില് എത്തുന്നത്.
രാഹുല് ഗാന്ധി കോടതിയില് എത്തുമെന്ന് ഗുജറാത്ത് കോണ്ഗ്രസ് വക്താവ് മനീഷ് ദോഷി അറിയിച്ചിട്ടുണ്ട്. പാര്ട്ടിയുടെ ദേശീയ വക്താവ് രണ്ദീപ് സിങ് സുര്ജേവാലയ്ക്കും സമന്സ് അയച്ചതിനാല് അദ്ദേഹവും ഹാജരാകുന്നുണ്ട്.
2016 നവംബര് എട്ടിന് നോട്ടു നിരോധിക്കുമ്പോള് 745.59 കോടി രൂപയുടെ നിരോധിച്ച നോട്ടുകള് കൈമാറിയതില് അഹമ്മദാബാദ് ജില്ലാ സഹകരണബാങ്ക് അഴിമതി നടത്തിയതായി രാഹുല്ഗാന്ധിയും, സുര്ജേ വാലയും ആരോപിച്ചതിനെ തുടര്ന്നാണ് മാനനഷ്ടക്കേസ് ഫയല് ചെയ്തത്.
കേന്ദ്ര ആഭ്യന്തരമന്ത്രി അമിത് ഷാ എഡിസി ബാങ്കിന്റെ ഡയറക്ടര്മാരില് ഒരാളാണ്. കേസില് രാഹുലിനും സുര്ജേവാലയ്ക്കുമെതിരെ പ്രാഥമിക തെളിവുകള് കണ്ടെത്തിയതിനെ തുടര്ന്ന് കോടതി ഏപ്രില് ഒന്പതിന് സമന്സ് അയച്ചിരുന്നു. കൂടാതെ നിരവധി കോണ്ഗ്രസ് നേതാക്കള് ബാങ്കിനെതിരെ തെറ്റായ അപകീര്ത്തികരമായ ആരോപണങ്ങള് ഉന്നയിച്ചെന്നും പരാതിയില് ആരോപിക്കുന്നുണ്ട്. അതേസമയം ഇത്രയും വലിയ തുകയുടെ നോട്ടുകള് കൈമാറ്റം ചെയ്തിട്ടില്ലെന്നും ആരോപണം തെറ്റാണെന്നും ബാങ്ക് വെളിപ്പെടുത്തിയിട്ടുണ്ട്.
രാഹുല് ഗാന്ധിയേയും സുര്ജോവാലയെയും കേസില് ഹാജരാകാന് ആവശ്യപ്പെടുന്നതിന് മുമ്പ് ക്രിമിനല് നടപടി ക്രമങ്ങളുടെ 202-ാം വകുപ്പ് പ്രകാരം കോടതി അന്വേഷണം നടത്തിയിരുന്നു. ഒരു വ്യക്തിക്കെതിരെ നടപടിയെടുക്കാന് മതിയായ അടിസ്ഥാനമുണ്ടോ എന്ന് തീരുമാനിക്കുന്നതിനായിരുന്നു അന്വേഷണം.
