ന്യൂദല്‍ഹി: ജമ്മു കശ്മീരില്‍ മുസ്ലിം ഭീകരര്‍ കൊലപ്പെടുത്തിയവരുടെ മക്കളും സഹോദരങ്ങളും ബിജെപിയില്‍ ചേര്‍ന്നു. ജിഹാദി ഭീകരതക്കിരയായി ജീവന്‍ നഷ്ടപ്പെട്ട ഷബിര്‍ അഹമ്മദ് ഭട്ടിന്റെ സഹോദരന്‍ ജാവേദ് അഹമ്മദ്, ഗോഹാര്‍ ഭട്ടിന്റെ സഹോദരന്‍ റയീസ് അഹമ്മദ് ഭട്ട്, ഗുല്‍ മുഹമ്മദ് മിറിന്റെ മക്കളായ സഹൂമര്‍ അഹമ്മദ്, ഉമര്‍ അഹമ്മദ്, പുല്‍വാമയിലെ യുവനേതാവ് ഷബിര്‍ ഭട്ട് തുടങ്ങിയവരാണ് യുവമോര്‍ച്ച ദേശീയ അധ്യക്ഷയും എംപിയുമായ പൂനം മഹാജന്റെ സാന്നിധ്യത്തില്‍ ദല്‍ഹി പാര്‍ട്ടി ആസ്ഥാനത്തുവെച്ച് അംഗത്വമെടുത്തത്.
കണ്ണൂര്‍ കണ്ണവത്ത് പോപ്പുലര്‍ ഫ്രണ്ട് തീവ്രവാദികള്‍ കൊലപ്പെടുത്തിയ എബിവിപി നേതാവ് ശ്യാമപ്രസാദിന്റെ സഹോദരന്‍ കെ.വി. ഷാരോണ്‍, അണ്ടല്ലൂരില്‍ സിപിഎം ക്രിമിനലുകള്‍ കൊലചെയ്ത ബിജെപി പ്രവര്‍ത്തകന്‍ സന്തോഷിന്റെ മകന്‍ എം.സി. സാരംഗ്, സീരിയല്‍ താരം നിതിന്‍ ജെയ്‌ക്ക് ജോസഫ് തുടങ്ങി എട്ട് മലയാളികളും അംഗത്വമെടുത്തു. കൊച്ചി സ്വദേശിയായ നിതിന്‍ ജെയ്‌ക്ക് മഞ്ഞള്‍പ്രസാദം എന്ന സീരിയലില്‍ നായകനായും അനുരാഗ കരിക്കിന്‍ വെള്ളം, ഗ്രേറ്റ് ഫാദര്‍ എന്നീ സിനിമകളിലും അഭിനയിച്ചിട്ടുണ്ട്.
യോഗയിലെ ലോക ചാമ്പ്യന്‍ തേജസ്വി, ദേശീയ ഹോക്കി താരം സുമീത് ശുക്ല, ഒളിംപിക്സ് താരം സ്വാതി സിങ്, സ്പെഷ്യല്‍ ഒളിംപിക്സ് മെഡല്‍ ജേതാവ് ദിഷ ധീരജ് മാരു, കോമണ്‍വെല്‍ത്ത് ജേതാക്കളായ അവതാര്‍ സിങ്, തുലിക മാന്‍, വിജയ് യാദവ്, അര്‍ജുന അവാര്‍ഡ് ജേതാവ് യശ്പാല്‍ സോളങ്കി, അന്താരാഷ്‌ട്ര ബാസ്‌കറ്റ് ബോള്‍ താരം യോഗേഷ് കടാരിയ തുടങ്ങിവിവിധ മേഖലകളില്‍ കഴിവ് തെളിയിച്ചവര്‍ ഉള്‍പ്പെടെ അറുപതിലേറെ യുവതീ യുവാക്കളാണ് ഇന്നലെ ബിജെപിയില്‍ ചേര്‍ന്നത്. നേരത്തെ ജവഹര്‍ലാല്‍ നെഹ്റു സര്‍വ്വകലാശാലയില്‍ യുവമോര്‍ച്ചയുടെ അംഗത്വ പ്രചാരണം പൂനം മഹാജന്‍ ഉദ്ഘാടനം ചെയ്തു.
