കൊച്ചി: ലോക്കപ്പ് കൊലപാതകം നടന്നതോടെ ഉദ്യോഗസ്ഥര്‍ക്ക് മാനസിക സമ്മര്‍ദ്ദമെന്ന പതിവു പല്ലവിയുമായി സംസ്ഥാന പോലീസ് മേധാവി ലോക് നാഥ് ബഹ്റ. പോലീസുകാരുടെ മാനസിക സമ്മര്‍ദ്ദം കുറയ്‌ക്കാന്‍ യോഗയും കായിക പരിശീലനവും നിര്‍ബന്ധമാക്കണമെന്ന് ഡിജിപി. എല്ലാം തുറന്ന് പറയാന്‍ ‘ശാന്തനായ സീനിയര്‍’ ഓഫീസറെ നിയമിക്കണമെന്നും നിര്‍ദ്ദേശം. വാരപ്പുഴയില്‍ ചവുട്ടി കൊലപാതകത്തിന് ശേഷം കര്‍ശനമാക്കിയ ‘സ്ട്രെസ്സ് മാനേജ്മെന്റ്ക്ലാസ്സുകള്‍’ ഇപ്പോഴും കടലാസ്സില്‍.
ഇടുക്കിയിലെ കസ്റ്റഡി മരണം, കൊച്ചിയിലെ സിഐയും എസിപിയും തമ്മിലുള്ള പ്രശനങ്ങളും സിഐയുടെ തിരോധാനവും, പോലീസ് സഹകരണ സംഘ തെരെഞ്ഞെടുപ്പിലെ കൂട്ട അടി തുടങ്ങി നിരവധി പ്രശ്നങ്ങള്‍ പോലീസിലുണ്ടായതോടെയാണ് വീണ്ടും മാനസികമായി സജ്ജരാക്കണമെന്ന സ്ഥിരം പരിഹാരവുമായി ഡിജിപി രംഗത്ത് എത്തിയത്. പോലീസില്‍ തമ്മിലുള്ള സമൂഹത്തിന് ആവശ്യമായ തരത്തില്‍ സേവനം ലഭ്യമാക്കുന്നതിന് പോലീസ് ഉദ്യോഗസ്ഥരെ മാനസികമായും ശാരീരികമായും സജ്ജരാക്കുന്നതിനെന്ന ആമുഖത്തോടെയാണ് പുതിയ നിര്‍ദ്ദേശം.
പോലീസ് സ്റ്റേഷനുകളില്‍ യോഗ ഉള്‍പ്പടെയുള്ള കായികപരിശീലനം ആഴ്ചയില്‍ നാലുദിവസം നടത്തണം. ദിവസേന കുറഞ്ഞത് 30 മിനിറ്റ് പരിശീലനം സ്റ്റേഷന്‍ ഹൗസ് ഓഫീസര്‍മാര്‍ (എസ്എച്ച്ഒ) ഉറപ്പ് വരുത്തണം. ആദ്യദിവസങ്ങളില്‍ ഇതിനായി യോഗ അധ്യാപകരുടെയോ കായിക അധ്യാപകരുടെയോ സഹായം തേടാം. ജോലിയുടെ ഭാഗമായി വേഗത്തിലുള്ള നടത്തം, വാരാന്ത്യങ്ങളിലും അവധിദിവസങ്ങളിലും കായിക പരിപാടികള്‍ എന്നിവ സംഘടിപ്പിക്കണം.
ഗാര്‍ഹികമായും ഔദ്യോഗികതലത്തിലും പ്രശ്നങ്ങള്‍ നേരിടുന്ന ഉദ്യോഗസ്ഥരെ കണ്ടെത്തണം. അവര്‍ക്ക് കായികപരിശീലനവും കൗണ്‍സലിങ്ങും നല്‍കാന്‍ എസ്എച്ച്ഒ പ്രത്യേകം ശ്രദ്ധിക്കണം. ഔദ്യോഗിക കാര്യങ്ങളില്‍ ആവശ്യമായ ഉപദേശം നല്‍കാനും സംശയങ്ങള്‍ ദുരീകരിക്കാനും പരിചയസമ്പന്നരും വിശ്വസ്തരുമായ പോലീസ് ഉദ്യോഗസ്ഥരെ കണ്ടെത്തണം. വ്യക്തിത്വവും പരിചയസമ്പത്തുമുള്ള സീനിയര്‍ സിവില്‍ പോലീസ് ഓഫീസര്‍, നാലോ അഞ്ചോ സിവില്‍ പോലീസ് ഓഫീസര്‍മാര്‍ക്ക് ആവശ്യമായ ഉപദേശങ്ങള്‍ നല്‍കണം. സബ് ഇന്‍സ്പെക്ടര്‍, ഇന്‍സ്പെക്ടര്‍, ഡിവൈഎസ്പി റാങ്കുകളില്‍ ഉള്ളവര്‍ക്ക് ജില്ലാ പോലീസ് മേധാവിമാരോ യൂണിറ്റ് മേധാവിമാരോ ഉപദേശങ്ങള്‍ നല്‍കണം. ഉപദേശകനായി നിയോഗിക്കപ്പെടുന്നവര്‍ നല്ല ആശയവിനിമയപാടവവും കഴിവും ശാന്തസ്വഭാവവും ഉള്ളവരായിരിക്കണമെന്നും നിര്‍ദ്ദേശിച്ചിട്ടുണ്ട്.
വാരാപ്പുഴയില്‍ യുവാവിനെ ചവിട്ടികൊലപ്പെടുത്തിയതിനും പോലീസ് ഉദ്യോഗസ്ഥരുടെ ആത്മഹത്യക്കും പിന്നാലെ അന്നും ‘മാനസിക സമ്മര്‍ദ്ദം കുറയക്കാന്‍ ക്ലാസ്സുകള്‍’ക്ക് നിര്‍ദ്ദേശം നല്‍കി. എന്നാല്‍ ഏതാനും ക്ലാസ്സുകള്‍ നടന്നതോടെ അതു നിലച്ചു. വീണ്ടും പോലീസ് പ്രതിക്കൂട്ടിലായതോടെ മാനസിക സമ്മര്‍ദ്ദം കുറയ്‌ക്കാനുള്ള നിര്‍ദ്ദേശങ്ങള്‍ നല്‍കുന്നത് പോലീസ് സേനയെ മുഴുവന്‍ അപമാനിക്കുന്നത് പോലെയാണെന്ന് ആരോപണം ഉയര്‍ന്നിട്ടുണ്ട്. ഉന്നത ഉദ്യോഗസ്ഥരുടെയും രാഷ്‌ട്രീയക്കാരുടെയും സമ്മര്‍ദ്ദത്തിന് വഴങ്ങി ചെയ്യുന്നതിന് തങ്ങളുടെ മാത്രം മാനസികആരോഗ്യം നന്നായാല്‍മതിയോ എന്ന ചോദ്യം സേനയില്‍ ഉയര്‍ന്നിട്ടുണ്ട്.
