ശ്രീനഗര് : അമര്നാഥ് തീര്ത്ഥയാത്രയ്ക്കുള്ള ആദ്യ തീര്ത്ഥാടക സംഘം യാത്ര ആരംഭിച്ചു. ജമ്മുകശ്മീരിലെ ബേസ്ക്യാമ്പില് നിന്നാണ് യാത്ര ആരംഭിച്ചിരിക്കുന്നത്. തീര്ത്ഥാടന യാത്രയ്ക്ക് നേരെ ഭീകരാക്രമണം നടക്കാന് സാധ്യതയുണ്ടെന്ന രഹസ്യാന്വേഷണ വിഭാഗത്തിന്റെ റിപ്പോര്ട്ടിന്റെ അടിസ്ഥാനത്തില് വന് സുരക്ഷയാണ് ആഭ്യന്തര മന്ത്രാലയം ഒരുക്കിയിരിക്കുന്നത്.
അമര്നാഥ് യാത്രയ്ക്ക് നേരെ പുല്വാമ മാതൃകയിലുള്ള സ്ഫോടനം ഭീകരര് ലക്ഷ്യമിടുന്നുണ്ടെന്നായിരുന്നു ഇന്റലിജെന്സ് മുന്നറിയിപ്പ് നല്കിയത്. സുരക്ഷ കര്ശനമാക്കുന്നതിനായി വിവിധ സുരക്ഷാ സംഘങ്ങളെ വഴിയില് ഉടനീളം വിന്യസിച്ചിട്ടുണ്ട്. തീര്ത്ഥാടകരെ സിആര്പിഎഫിന്റെ സംഘം ബൈക്കില് അനുഗമിക്കുന്നുണ്ട്. ദ്രുതകര്മസേനയും സുരക്ഷാ രംഗത്തുണ്ട്. സുരക്ഷയുടെ ഭാഗമായി പ്രധാന സ്ഥലങ്ങളിലെല്ലാം സിസിടിവി ക്യാമറകള് സ്ഥാപിച്ചിട്ടുണ്ട്.
വാഹന നീക്കം നിരീക്ഷിക്കാന് ഡ്രോണുകളും റഡാറുകളും ഏര്പ്പെടുത്തിയിട്ടുണ്ട്. തീര്ത്ഥാടകരുടെ വാഹനങ്ങള് റേഡിയോ തരംഗം ഉപയോഗിച്ചുള്ള സംവിധാനത്താല് ബന്ധിപ്പിച്ചിരിക്കുന്നതിനാല് അന്യവാഹനങ്ങള്ക്ക് കടന്നുകയറാന് കഴിയില്ല. ഓരോ തീര്ത്ഥാടകനെയും തിരിച്ചറിയാനുള്ള ബാര്കോഡുകളും നല്കിയിട്ടുണ്ട്. ഈ സംവിധാനങ്ങളെല്ലാം ജമ്മു മുതല് അമര്നാഥ് വരെ ഏര്പ്പെടുത്തിയിട്ടുണ്ട്.
ഈ വര്ഷം ഒരുലക്ഷത്തിലധികം തീര്ഥാടകര് അമര്നാഥ് യാത്രയില് പങ്കെടുക്കുമെന്നാണ് കരുതുന്നത്. ദര്ശനം നടത്താന് 1.5 ലക്ഷം തീര്ത്ഥാടകരാണ് ഇതുവരെ പേര് നല്കിയിട്ടുള്ളത്. കഴിഞ്ഞ വര്ഷം 2,85,006 തീര്ത്ഥാടകര് അമര്നാഥില് എത്തിയിരുന്നത്. 2017 ല് അമര്നാഥ് യാത്രക്ക് നേരെ നടന്ന ഭീകരാക്രമണത്തില് ഏഴ് പേര് കൊല്ലപ്പെടുകയും 18 പേര്ക്ക് പരിക്ക് ഏല്ക്കുകയും ചെയ്തിരുന്നു.
