ജയ്പ്പൂര്: മോദി സര്ക്കാരിനെതിരെ കോണ്ഗ്രസും ചില മുസ്ളീം സംഘടനകളും ആയുധമാക്കിയ ആള്വാര് ആള്ക്കൂട്ടക്കൊലക്കേസിന്റെ ഗതി മാറുന്നു. അന്ന് ജനക്കൂട്ടം തല്ലിക്കൊന്നെന്ന് പറയുന്ന പെഹ്ലു ഖാനും മക്കളായ ഇര്ഷാദ്(25) ആരിഫ്( 22) എന്നിവര്ക്കും എതിരെ രാജസ്ഥാനിലെ അശോക് ഗെഹ്ലോട്ടിന്റെ നേതൃത്വത്തിലുള്ള കോണ്ഗ്രസ് സര്ക്കാര് പശുക്കടത്തിന് കുറ്റപത്രം നല്കി. 2017ലായിരുന്നു സംഭവം.
പെഹ്ലു ഖാന്, ഇര്ഷാദ്, ആരിഫ് എന്നിവര്ക്കെതിരെ രാജസ്ഥാന് ബോവിന് ആനിമല്( ഗോഹത്യയും കടത്തും തടയല്)ആക്ട് പ്രകാരമാണ് കുറ്റപത്രം.ഗെഹ്ലോട്ട് സര്ക്കാര് അധികാരത്തില് വന്ന ശേഷമാണ് കുറ്റപത്രം തയ്യാറാക്കിയത്. ഇത് കഴിഞ്ഞ ദിവസം കോടതിയില് സമര്പ്പിച്ചു.
കശാപ്പ് ചെയ്യാനായി പശുക്കളെ കടത്തുന്നതും അവയെ കശാപ്പ് ചെയ്യുന്നതും തടയുന്നതാണ് നിയമം. ഖാന്റെ രണ്ട് സുഹൃത്തുക്കള്ക്ക് എതിരെ 2018ല് ബിജെപി സര്ക്കാര് ഇതേ വകുപ്പുകള് പ്രകാരം കേസ് എടുത്തിരുന്നു. ഇപ്പോള് കോണ്ഗ്രസ് സര്ക്കാരും ഖാനും മക്കള്ക്കും എതിരെ അതേ വകുപ്പുകള് പ്രകാരമാണ് കേസ് എടുത്ത് കുറ്റപത്രം സമര്പ്പിച്ചിരിക്കുന്നത്.
സംഭവവുമായി ബന്ധപ്പെട്ട് ഖാനെ തല്ലിക്കൊന്നവര്ക്ക് എതിരെ മറ്റൊരു കേസ് എടുത്തിരുന്നു. ഡയറി ഫാം നടത്തിരുന്ന ഖാന് ഹരിയാനക്കാരനാണ്. ജെയ്പ്പൂരില് നിന്ന് വാങ്ങിയ പശുക്കളെ ഹരിയാനയിലെ നൂവിലേക്ക് വാഹനത്തില് കടത്തുന്ന സമയത്താണ് ഒരുപറ്റമാള്ക്കാര് എത്തി തര്ക്കമുണ്ടാക്കിയതും ഇയാളെ മര്ദ്ദിച്ചതും. അനുമതിയില്ലാതെ പശുക്കളെ കടത്തിയെന്നാരോപിച്ചായിരുന്നു മര്ദ്ദനം. പിന്നീട് നയാള് മരണമടഞ്ഞു. തങ്ങള്ക്ക് അനുമതിയുണ്ടെന്നാണ് ഖാനും മറ്റും പറഞ്ഞിരുന്നത്. എന്നാല് പശുക്കടത്തിന് ഖാന് അനുമതിയില്ലായിരുന്നുവെന്ന് പോലീസ് കണ്ടെത്തിയിട്ടുണ്ട്.
