കൊച്ചി : ഹൈസ്കൂള് ഹയര്സെക്കന്ഡറി ഏകീകരണത്തിനായി കേരള സര്ക്കാര് നടപ്പാക്കാനൊരുങ്ങുന്ന ഖാദര് കമ്മിറ്റി റിപ്പോര്ട്ടിന്മേലുള്ള സ്റ്റേ നീക്കാന് ഹൈക്കോടതി വിസമ്മതിച്ചു. സംസ്ഥാന വിദ്യാഭ്യാസച്ചട്ടം തിരുത്തുന്നതിന് സ്റ്റേ തടസ്സമില്ലെന്ന് വ്യക്തമാക്കിയ കോടതി റിപ്പോര്ട്ട് നടപ്പാക്കുന്നതിനു മുമ്പ് എല്ലാവരേയും കേള്ക്കേണ്ടതുണ്ടെന്ന് അറിയിച്ചു. നേരത്തേ കമ്മിറ്റി റിപ്പോര്ട്ട് സ്റ്റേ ചെയ്തത് ചോദ്യം ചെയ്ത് സംസ്ഥാന സര്ക്കാര് നല്കിയ ഹര്ജിയിലാണ് ഹൈക്കോടതി സ്റ്റേ നീക്കില്ലെന്ന് വ്യക്തമാക്കിയത്.
അതേസമയം, ജൂലൈ 17ന് കൊണ്ടുവന്ന സ്റ്റേ ഉത്തരവില് ഭേദഗതി വരുത്താമെന്നും ഹൈക്കോടതി പറഞ്ഞു. കമ്മീഷന് റിപ്പോര്ട്ടില് സംസ്ഥാന സര്ക്കാര് സ്വീകരിച്ച തുടര്നടപടികളാണ് നേരത്തേ കേരള ഹൈക്കോടതി സ്റ്റേ ചെയ്തത്. ഹൈസ്കൂള്- ഹയര് സെക്കന്ഡറി ഏകീകരണം സംബന്ധിച്ചുള്ള കമ്മീഷന്റെ റിപ്പോര്ട്ട് നടപ്പാക്കുന്നത് ചോദ്യം ചെയ്ത് അധ്യാപകരും ഹെഡ്മാസ്റ്റര്മാരും നല്കിയ ഹര്ജി പരിഗണിച്ചാണ് ഹൈക്കോടതി സ്റ്റേ ചെയ്തിരിക്കുന്നത്.
വേണ്ടത്ര മുന്നൊരുക്കങ്ങളോ കൂടിയാലോചനകളോ ഇല്ലാതെയാണ് പരിഷ്കാരം നടപ്പാക്കുന്നത്. കമ്മീഷന് റിപ്പോര്ട്ടിന്റെ അടിസ്ഥാനത്തില് ഇതിനോടകം തന്നെ ഏകീകരണം നടപ്പാക്കുകയും ഒരു പൊതുവിദ്യാഭ്യാസ ഡയറക്ടറെ സര്ക്കാര് നിയമിക്കുകയും ചെയ്തിട്ടുണ്ട്. സ്റ്റേ വന്നതിനാല് ഈ പരിഷ്കാരങ്ങളും നിയമനങ്ങളുമെല്ലാം അസാധുവായി.
സംസ്ഥാനത്തെ പ്ലസ്ടു വരെയുള്ള സ്കൂള് വിദ്യാഭ്യാസം മെച്ചപ്പെടുത്തുന്നതിനെക്കുറിച്ച് പഠിക്കാന് നിയോഗിക്കപ്പെട്ട വിദഗ്ധ സമിതിയാണ് ഖാദര് കമ്മീഷന്. ഡോ. എം.എ. ഖാദര് ചെയര്മാനും ജി. ജ്യോതിചൂഢന്, ഡോ. സി. രാമകൃഷ്ണന് എന്നിവര് അംഗങ്ങളുമായിട്ടാണ് സമിതി രൂപീകരിക്കപ്പെട്ടത്. സര്വ ശിക്ഷാ അഭിയാന്, രാഷ്ട്രീയ മാധ്യമിക് ശിക്ഷാ അഭിയാന് എന്നിവ ലയിപ്പിച്ച് ഒന്നാക്കാനുള്ള കേന്ദ്ര സര്ക്കാര് നിര്ദ്ദേശത്തെ തുടര്ന്ന് അവ നടപ്പാക്കുന്നിന് മാര്ഗ്ഗനിര്ദേശം നല്കാനായി ഖാദര് കമ്മീഷന് രൂപം നല്കിയത്.
പൊതുവിദ്യാഭ്യാസ ഡയറക്ടറേറ്റ്, ഹയര് സെക്കന്ഡറി ഡയറക്ടറേറ്റ്, വൊക്കേഷണല് ഹയര് സെക്കന്ഡറി ഡയറക്ടറേറ്റ് എന്നിവ സംയോജിപ്പിച്ച് ഒന്നാക്കുക എന്നതായിരുന്നു ഖാദര് കമ്മീഷന്റെ പ്രധാന ശുപാര്ശ. സംസ്ഥാനത്തെ ഒന്ന് മുതല് പ്ലസ് ടു വരെയുള്ള എല്ലാ ക്ലാസുകളുടേയും നിയന്ത്രണവും ഏകോപനവും സ്കൂള് വിദ്യാഭ്യാസ ഡയറക്ടറേറ്റില് നിക്ഷിപ്തമാക്കണമെന്ന് കമ്മീഷന് ശുപാര്ശ ചെയ്യുന്നു.
വിദ്യാഭ്യാസത്തിന്റെ നിലവാരം ഉയര്ത്തുന്നതിന് അധ്യാപകരെ പ്രൊഫഷണലുകളാക്കി മാറ്റണമെന്നും ഇതിന്റെ ഭാഗമായി അധ്യാപക യോഗ്യതകളെല്ലാം ഉയര്ത്തണമെന്നും കമ്മീഷന് ശുപാര്ശ ചെയ്യുന്നു. വിദ്യാഭ്യാസ സംവിധാനത്തിലെ അടിസ്ഥാന പ്രവര്ത്തന ഘടകം സ്കൂളായിരിക്കും. ഒരു സ്കൂളിന് ഒരു സ്ഥാപന മേധാവി മാത്രമേ ഉണ്ടാകൂ.
മുഴുവന് വൊക്കേഷണല് ഹയര്സെക്കന്ഡറി സ്കൂളുകളും സെക്കന്ഡറി സ്കൂളുകളായി മാറ്റണം. യുപി, ഹൈസ്കൂള്, സ്ഥാപന മേധാവികള് പ്രിന്സിപ്പാള് എന്ന പേരില് ആയിരിക്കണം. പ്രിന്സിപ്പാള് (സെക്കന്ഡറി), പ്രിന്സിപ്പാള് (ലോവര് സെക്കന്ഡറി), പ്രിന്സിപ്പാള് (െ്രെപമറി), പ്രിന്സിപ്പാള് (ലോവര് െ്രെപമറി) എന്നിങ്ങനെ പേരുകള് മാറ്റണമെന്നും കമ്മീഷന് ശുപാര്ശ ചെയ്യുന്നുണ്ട്.
