മുംബൈ: പീഡനക്കേസില് യുവതി കോടതിയില് സമര്പ്പിച്ച പുതിയ തെളിവുകള് ബിനോയ് കോടിയേരിയെ കൂടുതല് പ്രതിരോധത്തിലാക്കുന്നു. ബിനോയ് സ്വന്തം മെയില് ഐഡിയില് നിന്നും യുവതിക്കും കുഞ്ഞിനുമയച്ച ദുബായിലേക്കുള്ള വിസയും വിമാന ടിക്കറ്റുകളും ഇനിയങ്ങോട്ട് കേസില് നിര്ണ്ണായകമാകും.
2015 ഏപ്രില് 21നാണ് യുവതിക്കും കുഞ്ഞിനും ദുബായ് സന്ദര്ശിക്കാന് ബിനോയ് വിസയും വിമാന ടിക്കറ്റുമയച്ചത്. ഈ വിവരങ്ങളടങ്ങിയ ഇ-മെയില് തെളിവായി കോടതിയില് യുവതിയുടെ അഭിഭാഷകന് ഉയര്ത്തിക്കാട്ടിയത് ബിനോയിക്ക് കുരുക്കാകും. വിസയില് കുഞ്ഞിന്റെ അച്ഛനും യുവതിയുടെ ഭര്ത്താവും ബിനോയ് ആണ്. ഇത് ഏത് സാഹചര്യത്തിലാണെന്ന് വിശദീകരിക്കാന് ബിനോയിയുടെ അഭിഭാഷകന് സാധിച്ചില്ലെങ്കില് കേസില് നിര്ണായക തെളിവായി മാറും. ബിനോയിക്കെതിരെ ദുബായില് ക്രിമിനല് കേസുള്ളതും കുഞ്ഞിനെ തട്ടിക്കൊണ്ടുപോകും എന്ന് ഭീഷണിപ്പെടുത്തിയതും മുന്കൂര് ജാമ്യാപേക്ഷയില് കോടതി ഉത്തരവിനെ സ്വാധീനിച്ചേക്കും.
യുവതിയുടെ ലക്ഷ്യം ബ്ലാക്ക്മെയില് ചെയ്ത് പണം തട്ടലാണെന്ന പ്രതിഭാഗത്തിന്റെ വാദം അംഗീകരിക്കണമെങ്കില് യുവതി നല്കിയ തെളിവുകളെല്ലാം കെട്ടിച്ചമച്ചതാണെന്ന് കോടതിക്ക് തോന്നണം. വെള്ളിയാഴ്ച വരെ അറസ്റ്റുണ്ടാകില്ലെങ്കിലും പുതിയ തെളിവുകളുടെ പശ്ചാത്തലത്തില് ബിനോയിക്ക് മുന്കൂര് ജാമ്യം ലഭിക്കല് എളുപ്പമല്ലെന്നാണ് നിയമ വിദഗ്ധര് അഭിപ്രായപ്പെടുന്നത്. അതേസമയം ഒളിവിലുള്ള ബിനോയിയെ കണ്ടെത്താന് വൈകുന്നത് മുംബൈ പോലീസിന് തലവേദനയായി മാറുന്നുണ്ട്. മജിസ്ട്രേറ്റിന് മുമ്പാകെ യുവതിയുടെ രഹസ്യമൊഴി രേഖപ്പെടുത്താനുള്ള നടപടി പോലീസ് തുടങ്ങി.
