കണ്ണൂര്‍: ഭീകരതക്കെതിരെ മാനവികത എന്ന മുദ്രാവാക്യമുയര്‍ത്തി ജനാധിപത്യ സംരക്ഷണവേദിയുടെ നേതൃത്വത്തില്‍ ജനാധിപത്യ സംരക്ഷണ സദസ്സ് സംഘടിപ്പിച്ചു. ഹിന്ദു ഐക്യവേദി സംസ്ഥാന സെക്രട്ടറി കെ. ഷൈനു വിഷായവതരണം നടത്തി. ഭീകരവാദികള്‍ക്ക് രാഷ്‌ട്രീയപരമായ സംരക്ഷണം ലഭിക്കുകയാണെന്നും കേരളത്തില്‍ മാറിമാറി ഭരിച്ച കോണ്‍ഗ്രസ്-കമ്മ്യൂണിസ്റ്റ് സര്‍ക്കാരുകള്‍ ഭീകരവാദത്തെ പ്രോത്സാഹിപ്പിക്കുകയായിരുന്നുവെന്നും വിഷയാവതരണം നടത്തിക്കൊണ്ട് അദ്ദേഹം പറഞ്ഞു. കേരളത്തില്‍ ഐഎസ് ആഴത്തില്‍ വേരോട്ടം നടത്തിക്കഴിഞ്ഞ സാഹചര്യത്തില്‍ സംസ്ഥാനത്തുടനീളം നടക്കുന്ന ജനാധിപത്യ സംരക്ഷണ സദസ്സുകള്‍ക്ക് വളരെയേറെ പ്രസക്തിയുണ്ടെന്നും അദ്ദേഹം പറഞ്ഞു.
ഐഎസിന്റെ വേരുകള്‍ ആഴ്ന്നിറങ്ങിക്കഴിഞ്ഞ കണ്ണൂര്‍ പോലുളള പ്രദേശങ്ങളില്‍ ഭീകരവാദത്തിന് വേരോട്ടമുണ്ടാക്കുന്നതില്‍ കമ്മ്യൂണിസ്റ്റ് പാര്‍ട്ടികള്‍ക്ക് വലിയ പങ്കാണുളളതെന്ന് പരിപാടിയില്‍ സംസാരിച്ച ഹിന്ദു ഐക്യവേദി സംസ്ഥാന സെക്രട്ടറി ശശി കമ്മട്ടേരി മാസ്റ്റര്‍ പറഞ്ഞു. ഇത്തരം പ്രസ്ഥാനങ്ങളില്‍ പരസ്യമായി തീവ്രവാദ-ഭീകരവാദ പ്രവര്‍ത്തകര്‍ പരസ്യമായി പ്രവര്‍ത്തിക്കുകയാണ്. ഇത് തിരിച്ചറിയാനും ഇവരെ തള്ളിപ്പറയാനും സമൂഹം തയ്യാറായാല്‍ മാത്രമേ ഭീകരവാദത്തെ ഇല്ലാതാക്കാന്‍ സാധിക്കൂ. കമ്മ്യൂണിസ്റ്റ് പാര്‍ട്ടിയും ഒരു ഭീകരവാദ സംഘടനയ്‌ക്ക് സമാനമായാണ് പ്രവര്‍ത്തിക്കുന്നത്. തെറ്റായ ചിന്തകളും പദ്ധതികളും അടിച്ചേല്‍പ്പിക്കുകയും വ്യക്തികളുടെ ബൗദ്ധികമായ വികസത്തെ ഇല്ലാതാക്കുകയുമാണ് ഇവര്‍ ചെയ്യുന്നത്. തങ്ങള്‍ ഭീകരവാദത്തിനും തീവ്രവാദത്തിനും എതിരാണെന്ന് പ്രസംഗിക്കുകയും ഇത്തരം വിധ്വംസക പ്രവര്‍ത്തനങ്ങള്‍ക്ക് കൂട്ടുനില്‍ക്കുകയാണെന്നും അദ്ദേഹം പറഞ്ഞു.
ഭീകരതയ്‌ക്കെതിരെ മാനവികത എന്ന വിഷയം കാലിക പ്രസക്തമാണെന്ന് പരിപാടിയില്‍ സംസാരിച്ച കെഎന്‍എം സംസ്ഥാന വൈസ് പ്രസിഡണ്ട് ഷംസുദ്ദീന്‍ പാലക്കോട് പറഞ്ഞു. മതതത്വങ്ങളില്‍ നിന്നും വ്യതിചലിച്ച് നിക്ഷിപ്ത താല്‍പര്യങ്ങള്‍ക്കായി പ്രവര്‍ത്തിക്കുന്നവരാണ് ഭീകരവാദ-തീവ്രവാദ പ്രസ്ഥാനങ്ങള്‍ക്ക് പിന്നില്‍. ഇത്തരക്കാരുടെ പിന്നാമ്പുറം ചികഞ്ഞാല്‍ എത്തിച്ചേരുന്നത് ദൈവീകതയിലല്ല. മറിച്ച് മയക്കുമരുന്ന് മാഫിയകളിലും വിധ്വംസക പ്രവര്‍ത്തനങ്ങളിലുമാണ്.
ഭീകരതയ്‌ക്ക് മതങ്ങളുമായി ബന്ധമില്ല. എല്ലാ മതങ്ങളും സ്‌നേഹവും പരസ്പര സഹകരണവുമാണ് മതഗ്രന്ഥങ്ങളിലൂടെ വ്യക്തമാക്കുന്നത്. സ്‌നേഹമാണ് മനുഷ്യനെ മനുഷ്യനാക്കുന്നത്. എന്നാല്‍ വിദ്വേഷം പ്രചരിപ്പിച്ച് വ്യക്തികള്‍ക്കിടയില്‍ വിഭജനത്തിന്റെ വേലികള്‍ തീര്‍ത്ത് സ്വര്‍ത്ഥതാല്‍പ്പര്യങ്ങള്‍ സംരക്ഷിക്കാനും നേടാനും ഭീകരവാദികള്‍ ശ്രമിക്കുകയാണ്. തീവ്രവാദികളെ കുറ്റവാളികളായി കാണണം. ഭീകരതയെ ഭീകരതയായി കാണണം. അദ്ദേഹം പറഞ്ഞു.
മാനവികതയുടെ ആദ്യമുഖം കാട്ടിക്കൊടുക്കുന്നത് മാതൃത്വമാണെന്ന് ചടങ്ങില്‍ സംബന്ധിച്ച കണ്ണൂര്‍ ബിഷപ്പ് പ്രതിനിധി കെ.എം. മാര്‍ക്കോസ് മാസ്റ്റര്‍ പറഞ്ഞു. അമ്മമാരാണ് ഭീകരതയ്‌ക്കെതിരായ പ്രക്രിയക്ക് തുടക്കം കുറിക്കേണ്ടത്. നന്മയെ മറ്റുളളവരിലേക്ക് പകര്‍ന്നു കൊടുക്കാന്‍ സാധിച്ചാല്‍ മാനവികത താനെ വന്നുകൊള്ളും. വളര്‍ന്നുവരുന്ന തലമുറയുടെ മനസ്സിലേക്ക് നന്മയുടെ വിത്തിടുന്നതിനെക്കുറിച്ചാവണം നാം ഇനി ആലോചിക്കേണ്ടത്. വ്യാജ പ്രചാരണങ്ങളെ ഇല്ലാതാക്കി മാത്സരികത വെടിഞ്ഞ് ഭീകരതയെ നേരിടാന്‍ സമൂഹം ഒറ്റക്കെട്ടായി മുന്നോട്ടു വരണമെന്നും അദ്ദേഹം പറഞ്ഞു. കണ്ണൂര്‍ സ്റ്റേഡിയം കോര്‍ണറില്‍ നടന്ന പരിപാടിയില്‍ ഹിന്ദു ഐക്യവേദി ജില്ലാ വര്‍ക്കിംഗ് പ്രസിഡണ്ട് പ്രദീപ് ശ്രീലകം അധ്യക്ഷത വഹിച്ചു. സെക്രട്ടറി ശ്യംമോഹന്‍ സ്വാഗതം പറഞ്ഞു.
