ന്യൂദല്ഹി: ഫോനി ചുഴലിക്കാറ്റ് ഇന്ന് അതിതീവ്ര ചുഴലിക്കാറ്റായി മാറുമെന്ന് കാലാവസ്ഥ നിരീക്ഷണ കേന്ദ്രം. കാറ്റിന്റെ തീവ്രത വര്ധിക്കുന്നതിനാല് മത്സ്യത്തൊഴിലാളികള് കടലില് പോകരുതെന്നും മത്സ്യബന്ധനത്തിന് പോയവര് തിരികെ എത്തണമെന്നും ദേശീയ ദുരന്തനിവാരണ സേനയും, തീരദേശ സേനയും മുന്നറിയിപ്പ് നല്കി.
ചെന്നൈയുടെ തെക്ക്കിഴക്കന് മേഖലയിലൂടെ വീശി വടക്ക് പടിഞ്ഞാറന് ഭാഗത്തേക്ക് നീങ്ങിയ കാറ്റിന്റെ ദിശ ബുധനാഴ്ചയോടെ വടക്ക് കിഴക്കന് ഭാഗത്തേക്ക് നീങ്ങും. ദിശമാറിയതിനാല് തമിഴ്നാട്, ആന്ധ്രാപ്രദേശ് തീരങ്ങളിലേക്കടുക്കില്ല. എന്നാല് ഒഡീഷ തീരത്ത് കാറ്റ് വീശിയടിക്കാനുള്ള സാധ്യതയുണ്ട്.
തീരദേശ സേനയുടേയും ദുരന്തനിവാരണ സേനയുടേയും നിരന്തര നീരീക്ഷണത്തിലുള്ള മേഖലയില് അതീവ ജാഗ്രത നിര്ദേശം പുറപ്പെടുവിച്ചിട്ടുണ്ട്. കൂടാതെ കാലാവസ്ഥ നിരീക്ഷണ കേന്ദ്രം എല്ലാ മൂന്ന് മണിക്കൂറിലും ഏറ്റവും പുതിയ കാലാവസ്ഥ പ്രവചനം സംസ്ഥാനങ്ങള്ക്ക് നല്കുന്നുണ്ട്.
അതേസമയം ഫോനി ചുഴലിക്കാറ്റ് ഇന്ന് അതിതീവ്രമായി മാറുന്ന സാഹചര്യത്തില് വേണ്ട തയ്യാറെടുപ്പുകള് നടത്താന് ഉദ്യോഗസ്ഥര്ക്ക് നിര്ദേശം നല്കിയതായി പ്രധാനമന്ത്രി നരേന്ദ്ര മോദി. പ്രധാനമന്ത്രി സ്ഥിതിഗതികള് സൂക്ഷ്മമായി നിരീക്ഷിക്കുന്നുണ്ട്.
ദേശീയ ദുരന്തനിവാരണ സേന, സംസ്ഥാന സര്ക്കാരുകള്, കേന്ദ്ര ഏജന്സികള് എന്നിവയുടെ യോഗം വിളിച്ചു ചേര്ത്ത് സ്ഥിതിഗതികള് വിലയിരുത്തി ഏത് സാഹചര്യത്തേയും നേരിടാനുള്ള മുന്കരുതലുകള് സ്വികരിക്കണമെന്ന് ക്യാബിനറ്റ് സെക്രട്ടറിക്ക് നിര്ദേശം നല്കിയതായും ആഭ്യന്തര മന്ത്രാലയത്തിന്റെ പ്രസ്താവനയില് പറയുന്നു.
ഫോനി ചുഴലിക്കാറ്റിനെ തുടര്ന്നുണ്ടായ സാഹചര്യങ്ങളെക്കുറിച്ച് ഉദ്യോഗസ്ഥരോട് സംസാരിച്ചു. വേണ്ട മുന്കരുതലുകള് എടുക്കാനും എല്ലാ സഹായവും നല്കാന് തയ്യാറായിരിക്കാനും നിര്ദേശം നല്കിയിട്ടുണ്ട്. പ്രശ്നബാധിത സംസ്ഥാനങ്ങളിലെ സര്ക്കാരുമായി ചേര്ന്ന് പ്രവര്ത്തിക്കണമെന്നും അവരോട് പറഞ്ഞിട്ടുണ്ട്. എല്ലാവരുടേയും സുരക്ഷയ്ക്കും നല്ലതിനും വേണ്ടി പ്രാര്ഥിക്കുന്നു. മോദി ട്വിറ്ററില് കുറിച്ചു.
