ഇന്ത്യയുടെ ചരിത്രത്തില് ഏറ്റവും അധികം വനിത എംപിമാരുണ്ടായിരുന്നത് നരേന്ദ്രമോദി ഭരണകാലത്താണ്. 66 പേര്. ഒരേസമയം കൂടുതല് വനിതാമന്ത്രിമാര് (ഒന്പത്) ഉണ്ടായതും മോദി സര്ക്കാരില്. മന്ത്രിമാരില് ഏഴുപേര് കാബിനറ്റ് പദവിയും വഹിച്ചു.
പ്രതിരോധം (നിര്മല സീതാരാമന്), വിദേശം (സുഷമ സ്വരാജ്) എന്നീ വകുപ്പകള് വനിതകള് ഭരിക്കുന്ന, ലോകത്തെ ഏക രാജ്യമായി ഇന്ത്യ മാറി. ഉമാഭാരതി, മനേക ഗാന്ധി, സ്മൃതി ഇറാനി, നജ്മ ഹെപ്തുള്ള, ഹര്സിംറത്ത് കൗര് എന്നിവരായിരുന്നു കാബിനറ്റ് മന്ത്രിമാര്. അനുപ്രിയ പട്ടേലും കൃഷ്ണാ രാജും സഗ്വി നിരഞ്ജനും വനിതാ സഹമന്ത്രിമാരായിരുന്നു. സ്പീക്കറും (സുമിത്ര മഹാജന്) വനിതയായിരുന്നു. കേരളത്തില് നിന്ന് ലോക്സഭയിലെത്തിയ ഏക വനിതാപ്രതിനിധി പി.കെ. ശ്രീമതിയായിരുന്നു.
പതിനഞ്ചു ലോക്സഭകളില് ഒന്പതെണ്ണത്തില് മാത്രമാണ് കേരളത്തില്നിന്ന് വനിതാ പ്രാതിനിധ്യം ഉണ്ടായിരുന്നത്. 91ലും 2004ലും രണ്ടുപേര് വീതം മാത്രം. ലോക്സഭാംഗമായ ഒരു മലയാളി വനിതയും കേന്ദ്രത്തില് മന്ത്രിമാരായിട്ടില്ല. എന്നാല് കേരളത്തില് നിന്നല്ലാതെ രാജ്യസഭയില് എത്തിയ മലയാളി സ്ത്രീ മന്ത്രിസഭയിലെത്തുകയും ചെയ്തു.
1967ല് അമ്പലപ്പുഴയില് നിന്നും ജയിച്ച സുശീലാ ഗോപാലനാണ് ആദ്യമായി ലോക്സഭാംഗമാകുന്ന മലയാളി വനിത. 71ല് അമ്പലപ്പുഴയില് വീണ്ടും മത്സരിച്ചെങ്കിലും ആര്എസ്പിയുടെ കെ. ബാലകൃഷ്ണനോട് തോല്വിയായിരുന്നു ഫലം. 77ല് ആലപ്പുഴയില്നിന്നും 91ല് ചിറയിന്കീഴില് നിന്നും ജയിച്ച സുശീലാഗോപാലന് ലോക്സഭയിലെത്തിയപ്പോള് മൂന്നുവട്ടം എന്ന റെക്കോഡും സ്വന്തമാക്കി.
71ല് സുശീലാഗോപാലന് തോറ്റെങ്കിലും അടൂരില്നിന്നും ജയിച്ച സിപിഐയുടെ കെ. ഭാര്ഗവി വനിതാ പ്രാതിനിധ്യം കാത്തു. 89ലും 91ലും മുകുന്ദപുരത്തുനിന്ന് ജയിച്ച സാവിത്രി ലക്ഷ്മണനാണ് കേരളത്തില്നിന്ന് ലോക്സഭയിലെത്തിയ ആദ്യ കോണ്ഗ്രസ്സുകാരി.
ലോക്സഭാംഗമായ ഏക കോണ്ഗ്രസ്സുകാരിയും സാവിത്രി തന്നെ. 91ല് സുശീലയും സാവിത്രിയും ഒരേസമയം അംഗങ്ങളായിരുന്നതുപോലെ 2004ല് 14-ാം ലോക്സഭയിലും രണ്ട് മലയാളിമഹിളകള് ഉണ്ടായിരുന്നു. മാവേലിക്കരയില്നിന്നും ജയിച്ച സി.എസ്. സുജാതയും വടകരയില്നിന്ന് ജയിച്ച പി. സതീദേവിയും. ഇരുവരും സിപിഎം പ്രതിനിധികള്. വടകരയില്നിന്ന് 98ലും 99ലും ജയിച്ച എ.കെ. പ്രേമജം (സിപിഎം) ആണ് എംപിയായ മറ്റൊരു വനിത. പി.കെ. ശ്രീമതി കണ്ണൂരില് നിന്നാണ് ജയിച്ചത്്.
കേന്ദ്രമന്ത്രിസഭയില് അംഗമായിരുന്ന മലയാളി വനിത. ലക്ഷ്മി എന്. മേനോന് ആണ്. ബീഹാറില് നിന്നും രാജ്യസഭയിലെത്തിയ ലക്ഷ്മി, വിദേശകാര്യ സഹമന്ത്രിയായി നെഹ്റു, നന്ദ, ലാല്ബഹദൂര് ശാസ്ത്രി മന്ത്രിസഭകളിലുണ്ടായിരുന്നു.
ജന്മഭൂമി ഓണ്ലൈന്