കൊച്ചി: ക്നാനാ യ വിശ്വാസികള് തമ്മിലുള്ള സഘടനാ തര്ക്കത്തിലെ ആക്രമണം സിബിഐ അന്വേഷിക്കുമ്പോള് ഉന്നതര് കുടുങ്ങാന് സാധ്യത. ഉയര്ന്ന പോലീസ് ഉദ്യോഗസ്ഥര് മുതല് രാഷ്ട്രീയ നേതാക്കള്വരെ ഉള്പ്പെട്ടതാണ് വിദേശത്തുള്ളവര്ക്ക് ബന്ധമുള്ള ഈ ക്വട്ടേഷന് ആക്രമണ കേസ്.
ദേശീയ ന്യൂനപക്ഷ കമ്മീഷന് ഇടപെട്ട കേസില് കേരള ഹൈക്കോടതിയാണ് സംഭവങ്ങളുടെ ഗൗരവം കണക്കാക്കി സിബിഐ അന്വേഷണത്തിന് തിങ്കളാഴ്ച ഉത്തരവിട്ടത്. തിരുവല്ലയില് ക്നാനായ ക്രിസ്ത്യാനികളില് യാക്കോബായ വിഭാഗത്തിന്റെ കോണ്ഗ്രസിലെ തര്ക്കങ്ങളാണ് സംഭവത്തിന് തുടക്കം. ക്നാനായ കോണ്ഗ്രസിന്റെ കേന്ദ്ര ഭാരവാഹി തെരഞ്ഞെടുപ്പില് സ്ഥാനാര്ഥിയായിരുന്ന തിരുവല്ല ഓതറ കല്ലേമണ്ണില് ബിനു കുരുവിള (42) യെ ആക്രമിച്ച കേസ് പോലീസും ക്രൈംബ്രാഞ്ചും അന്വേഷിച്ചപ്പോള് കണ്ടെത്തിയ വിദേശ ബന്ധമാണ് ഹൈക്കോടതിയുടെ ഈ ഉത്തരവില് കാര്യങ്ങള് എത്തിച്ചത്. ക്രൈംബ്രാഞ്ച് അനേ്വഷണത്തില് യൂറോപ്പിലും അമേരിക്കയിലുമുള്ളവര്ക്ക് ബന്ധം കണ്ടെത്തി.
ഈ സഭയില് 12,000 പേരാണുള്ളത്. വിഭാഗീയ പ്രശ്നങ്ങള് സഭാംഗങ്ങളെ രണ്ട് ചേരിയാക്കി.
കോട്ടയം കേന്ദ്രമായി ബിസിനസ് നടത്തുന്ന ടി.ഒ. ഏലിയാസും അബ്രാഹാം എന്നയാളും നയിക്കുന്ന ചേരികള് തമ്മില് നടന്ന തെരഞ്ഞെടുപ്പ് മത്സരത്തിതുടക്കത്തില് എലിയാസിനൊപ്പമായിരുന്ന ബിനു, കൂറുമാറി അബ്രഹാമിനൊപ്പം ചേര്ന്നതാണ് ആക്രമണത്തിന് കാരണമായത്.
ബിനു മുഖ്യമന്ത്രിക്കും ഡിജിപിക്കും ദേശീയ ന്യൂനപക്ഷ കമ്മീഷനും പരാതി നല്കി. ന്യൂനപക്ഷ കമ്മീഷന് അംഗം ജോര്ജ് കുര്യന് കേരള പോലീസിന് പരാതി കൈമാറിയതിനെ തുടര്ന്ന് ഡിജിപി നേരിട്ടു നല്കിയ മറുപടിയിലെ വിവരങ്ങള് അടിസ്ഥാനമാക്കിയാണ് ഹൈക്കോടതി ഉത്തരവ്.
ആക്രമണം ക്വട്ടേഷന് സംഘമാണ് നടത്തിയത്. ഇവര്ക്ക് ആക്രമണ നിര്ദേശവും ഇടപാടും നടത്തിയതിന്റെ വിവരങ്ങള് പ്രകാരം, ബുള്ളറ്റ് രവി, സ്റ്റീഫന് ബേബി, കുട്ടന്, ചെല്ലപ്പന് തുടങ്ങിയവര്ക്ക് കേസിലുള്ള ബന്ധവും അവരില് ചിലര്ക്ക് ഏലിയാസുമായുള്ള ബന്ധുത്വവും വ്യക്തമായതായി ഡിജിപിയുടെ റിപ്പോര്ട്ടിലുണ്ട്.
ഏലിയാസിന്റെ ബന്ധുവാണ് സംഭവം നടക്കുമ്പോള് സംസ്ഥാന പോലീസിലെ ഐജി പദവിയിലായിരുന്നയാള്. ഇദ്ദേഹം സംഭവത്തിലും കേസിലും ഇടപെട്ടിട്ടുണ്ട്.
ഇദ്ദേഹത്തിന്റെ ബന്ധം വ്യക്തമായതോടെയാണ് ക്രൈംബ്രാഞ്ച് തുടരന്വേഷണം നടത്തി റിപ്പോര്ട്ട് സമര്പ്പിച്ചത്. ഏലിയാസിന്റെ സഹോദരന്റെ മരുമകനാണ് ഈ ഉദ്യോഗസ്ഥന്.
കേസ് അന്വേഷണത്തില് റാന്നി എംഎല്എ രാജു എബ്രഹാം, മുന് എംപി സ്കറിയാ തോമസ് തുടങ്ങി രാഷ്ട്രീയ
നേതാക്കള് ഇടപെട്ട സംഭവങ്ങളും റിപ്പോര്ട്ട് ചെയ്യപ്പെട്ടിരുന്നു.
