കൊച്ചി : കുറച്ചെങ്കിലും നീതി കിട്ടിയെന്ന് കരുതുന്നുവെന്ന് നടി അന്‍സിബ ഹസന്‍.എല്ലാ കാര്യങ്ങളും അമ്മയിലെ അംഗങ്ങള്‍ക്ക് മുന്നില്‍ തുറന്ന് പറയാന്‍ സാധിച്ചു.ചരിത്രപരമായ തീരുമാനങ്ങളാണ് ഇന്നെടുത്തത്. താന്‍ നേരിട്ട എല്ലാ കാര്യങ്ങളും കൃത്യമായി ഉന്നയിക്കാന്‍ സാധിച്ചതില്‍ ഏറെ സമാധാനമുണ്ട്. അമ്മ പൊതു യോഗത്തില്‍ നടന്ന നാടകീയ നീക്കങ്ങള്‍ക്കൊടുവില്‍ ഭരണസമിതി ഒന്നടങ്കം രാജിവച്ചതിനോട് പ്രതികരിക്കുകയായിരുന്നു നടി.
32 വര്‍ഷത്തെ ചരിത്രത്തില്‍ ആദ്യമായിട്ടായിരിക്കും അമ്മയില്‍ ഇത്തരമൊരു സംഭവം നടക്കുന്നത്. ഇന്നത്തെ യോഗത്തില്‍ ഇത്രയും അംഗങ്ങള്‍ പങ്കെടുക്കുകയും അവരെ കാര്യങ്ങള്‍ ബോധ്യപ്പെടുത്തുകയും ചെയ്തതില്‍ സന്തോഷമുണ്ട്. എല്ലാ അംഗങ്ങളുടെയും അഭിപ്രായങ്ങള്‍ രേഖപ്പെടുത്തിയ കൃത്യതയുള്ള പൊതുയോഗമാണ് ഇന്ന് നടന്നത്.
വരവ് ചെലവ് കണക്കുകള്‍ പൊതുയോഗത്തില്‍ കാണിക്കാന്‍ ഭരണസമിതിയ്‌ക്ക് സാധിച്ചിട്ടില്ലെന്നതായിരുന്നു പ്രധാന പ്രശ്നം. ഇതിന് വീണ്ടും വീണ്ടും സമയം ചോദിച്ചുകൊണ്ടുള്ള ബാലിശമായ ചോദ്യങ്ങള്‍ വിലപ്പോയില്ല. തനിക്ക് സംസാരിക്കാന്‍ പഴയ ഭരണസമിതി ഉച്ചവരെ സമയം നല്‍കിയില്ല. എന്നാല്‍ അംഗങ്ങള്‍ കൂടെ നിന്ന് സംസാരിക്കാന്‍ അവസരം ഉണ്ടാക്കിത്തന്നു. അതിന് എല്ലാവരോടും നന്ദി പറയുന്നു- അന്‍സിബ പറഞ്ഞു.
പുതിയ ഭരണസമിതിക്ക് മുന്നില്‍ ഒരു നിര്‍ദേശവും അന്‍സിബ മുന്നോട്ടുവച്ചു. മുമ്പ് അമ്മയില്‍ നിന്ന് പോയ അതിജീവിത ഉള്‍പ്പെടെയുളള ആളുകളെ ഔദ്യോഗികമായി തിരികെ വിളിക്കണം. വരുന്നതും വരാതിരിക്കുന്നതും അവരുടെ ഇഷ്ടം. അമ്മയില്‍ നിന്ന് പുറത്തുപോയവരെ തിരികെ എത്തിക്കുമെന്ന് കഴിഞ്ഞ ഭരണസമിതി പറഞ്ഞെങ്കിലും അവര്‍ക്ക് പാലിക്കാന്‍ സാധിച്ചിട്ടില്ല.
