കണ്ണൂർ: നിരവധി സ്വർണക്കടത്തുകൾ റിപ്പോർട്ട് ചെയ്ത കോഴിക്കോട് വിമാനത്താവളത്തിന് ശേഷം കണ്ണൂരും സ്വർണക്കടത്തുകാർ ലക്ഷ്യമിടുന്നു. ഉദ്ഘാടനം നടന്ന് ഒരു മാസം തികയും മുമ്പേ കണ്ണൂർ വിമാനത്താവളത്തിൽ നിന്നും രണ്ടുകിലോ സ്വര്ണം പിടികൂടി. അബുദാബിയിൽ നിന്നെത്തിയ പിണറായി സ്വദേശി മുഹമ്മദ് ഷാനിൽ നിന്നാണ് സ്വര്ണം പിടികൂടിയത്. ഇയാളെ റവന്യൂ ഇന്റലിജന്സിന് കൈമാറി.
വിമാനത്താവളം ഉദ്ഘാടനം ചെയ്ത ശേഷം ആദ്യമായാണ് സ്വർണക്കടത്ത് പിടികൂടുന്നത്. കഴിഞ്ഞ രാത്രി എത്തിയ എയർ ഇന്ത്യ എക്സ്പ്രസിലാണ് മുഹമ്മദ് ഷാന് എത്തിയത്. വിശദമായ പരിശോധനയില് ഇയാളില് നിന്നും കസ്റ്റംസ് സ്വര്ണം കണ്ടെടുക്കുകയായിരുന്നു. ഉണ്ണിയപ്പം ഉണ്ടാക്കാനുള്ള പാത്രത്തിനുള്ളിൽ ഒളിപ്പിച്ച നിലയിലായിരുന്നു സ്വർണം. കസ്റ്റംസ് പരിശോധനയ്ക്കിടെ സ്വർണം കണ്ടെത്തിയതിനെ തുടർന്ന് റവന്യൂ ഇന്റലിജൻസിനെ വിവരം അറിയിക്കുകയും ഷാനെ പിടികൂടുകയുമായിരുന്നു.
ഷാനെ കൊണ്ടു പോകാനായി കാറിലെത്തിയവരെയും അധികൃതർ കസ്റ്റഡിയിലെടുത്തു.
