കോട്ടയം: മഞ്ചേശ്വരം മുതല് പാറശ്ശാല വരെ 26ന് തെളിയുന്ന അയ്യപ്പജ്യോതിയില് ഗ്രാമങ്ങള്തോറും വനിതകളെ പങ്കാളികളാക്കാന് വനിതകളുടെ പ്രത്യേക കൂട്ടായ്മ. വനിതാ സാമൂഹ്യ പ്രവര്ത്തകരും സാംസ്കാരിക പ്രവര്ത്തകരും സംസ്ഥാനത്തെ ഹിന്ദു സംഘടനകളുടെ വനിതാ നേതാക്കളും ഒരുമിച്ചാണ് കൂട്ടായ്മ സംഘടിപ്പിക്കുന്നത്. വിദ്യാലയങ്ങള് കേന്ദ്രീകരിച്ചും അല്ലാതെയുമുള്ള യുവതീ സംഗമങ്ങള്ക്കും കൂട്ടായ്മ നേതൃത്വം നല്കും.
പ്രവര്ത്തനങ്ങള്ക്ക് സമഗ്രമായ രൂപകല്പന നല്കാനായി 18ന് കേരളത്തിലെ ഹിന്ദു സംഘടനകളുടെ വനിതാനേതാക്കള് കോട്ടയത്ത് യോഗം ചേരും. രാവിലെ 10ന് തിരുനക്കര സ്വാമിയാര് മഠത്തില് നടക്കുന്ന സമ്മേളനം പ്രമുഖ സാമൂഹിക പ്രവര്ത്തക അശ്വതി ജ്വാല ഉദ്ഘാടനം ചെയ്യും.
മഹിളാ ഐക്യവേദി സംസ്ഥാന പ്രസിഡന്റ് നിഷ സോമന് അധ്യക്ഷയാകുന്ന സമ്മേളനത്തില് ശബരിമല കര്മസമിതി വര്ക്കിങ് ചെയര്പേഴ്സണ് കെ.പി. ശശികല ടീച്ചര് വിഷയം അവതരിപ്പിക്കും. കര്മസമിതി ജനറല് കണ്വീനര് എസ്.ജെ.ആര്. കുമാര്, ആര്എസ്എസ് പ്രാന്തകാര്യകാരി സദസ്യന് എ.ആര്. മോഹനന് എന്നിവര് മാര്ഗനിര്ദേശം നല്കും.
ശബരിമലയിലെ ആചാരാനുഷ്ഠാനങ്ങള് സംരക്ഷിക്കണമെന്ന് ആവശ്യപ്പെട്ടാണ് 26ന് അയ്യപ്പജ്യോതി തെളിക്കുന്നത്.
