ഇരിട്ടി: തലശ്ശേരി-വളവുപാറ റോഡ് വികസനത്തിന്റെ ഭാഗമായി കെട്ടിടം പൊളിച്ചു മാറ്റേണ്ടതായി വന്നതോടെ കിളിയന്തറയില് പ്രവര്ത്തിച്ചു വന്നിരുന്ന ആര്ടിഒ ചെക്ക്പോസ്റ്റ് കൂട്ടുപുഴയിലേക്ക് മാറ്റുന്നു.
കിളിയന്തറയില് വാടകക്കെട്ടിടത്തിലാണ് ആര്ടിഒ ചെക്ക് പോസ്റ്റ് പ്രവര്ത്തിച്ചുവന്നിരുന്നത്. ഈ കെട്ടിടം റോഡ് വികസനത്തിനായി അക്വയര് ചെയ്ത ഭൂമിയിലാണ് സ്ഥിതിചെയ്യുന്നത്. ഇരിട്ടി മുതല് കൂട്ടുപുഴ വരെ വരുന്ന റോഡ് നിര്മ്മാണം ഏതാണ്ട് പൂര്ണ്ണമായിക്കഴിഞ്ഞു. ആര്ടി ഓഫീസ് പ്രവര്ത്തിക്കുന്ന കെട്ടിടം മറ്റു സ്ഥലം കണ്ടെത്താനാവാതെ ഒഴിഞ്ഞു കൊടുക്കാത്തത് കാരണം ഈ ഭാഗത്ത് നൂറുമീറ്ററോളം വരുന്ന റോഡ് പ്രവര്ത്തി തടസ്സപ്പെട്ടിരിക്കയാണ്. ഇതിനെത്തിയടര്ന്ന് കെഎസ്ടിപിയുമായി സംസാരിച്ചതിനെത്തുടര്ന്നു കെഎസ്ടിപിയുടെ അധീനതയിലുള്ള സ്ഥലം ആര്ടി ഓഫീസിനായി അനുവദിക്കുകയായിരുന്നു. നിര്മ്മാണം നടക്കുന്ന കൂട്ടുപുഴ പാലത്തിനും കച്ചേരിക്കടവ് പാലത്തിനും ഇടയിലാണ് സ്ഥലം അനുവദിക്കാന് തീരുമാനിച്ചത്. സ്ഥലം ഉടനെ കൈമാറാനുള്ള നടപടികള് സ്വീകരിക്കുകയും താത്കാലിക സംവിധാനമൊരുക്കി ഓഫീസ് ഇവിടേയ്ക്ക് മാറ്റുകയും ചെയ്യും. അതേസമയം കച്ചേരിക്കടവ് പാലത്തിന്റെ നിര്മ്മാണ പ്രവര്ത്തി പൂര്ത്തിയായിക്കഴിഞ്ഞു. അടുത്തു തന്നെ ഇതിന്റെ ഉദ്ഘാടനവും നടക്കും. കര്ണ്ണാടകത്തില് നിന്നും മറ്റും വരുന്ന വാഹനങ്ങള് ചെക്ക് പോസ്റ്റ് അധികൃതരെ വെട്ടിച്ച് ഈ പാലം വഴി കടന്നുപോകുന്നത് തടയുവാനും ഇപ്പോള് പുതുതായി ചെക്ക് പോസ്റ്റ് മാറ്റി സ്ഥാപിക്കുന്നതിലൂടെ സാധിക്കും.
