കുമളി: കേരളത്തിന് ഏറെ പ്രതീക്ഷ നല്കിക്കൊണ്ടാണ് മുല്ലപ്പെരിയാറില് പുതിയ അണക്കെട്ട് നിര്മിക്കാനുള്ള സാധ്യതയെപ്പറ്റി പഠിക്കാന് സംസ്ഥാനത്തിന് കേന്ദ്രം അനുമതി നല്കിയത്. ഈ അവസരം പരമാവധി സംസ്ഥാനം പ്രയോജനപ്പെടുത്തണമെന്നാണ് പെരിയാര് തീരത്തുള്ളവരുടെ ആവശ്യം.
പുതിയ അണക്കെട്ട് നിര്മിക്കുന്നതിനുള്ള നടപടിക്രമങ്ങളില് ആദ്യപടിയാണ് സാധ്യതാപഠനം. ഇപ്പോള് അണക്കെട്ട് സ്ഥിതിചെയ്യുന്ന സ്ഥലത്ത് നിന്ന് 1300 മീറ്റര് മാറി 53 അടി ഉയരത്തില് പുതിയ ഡാം നിര്മിക്കാനുള്ള സാധ്യത മുന്പ് കേരളം തേടിപ്പോള് യുപിഎ സര്ക്കാരിന്റെ കാലത്ത് തമിഴ്നാട് മുഖ്യമന്ത്രിയായിരുന്ന ജയലളിതയുടെ സമ്മര്ദത്തെ തുടര്ന്ന് കേന്ദ്രം പിന്നീട് നിലപാട് മാറ്റുകയായിരുന്നു.
എന്നാല് ഇപ്പോള് ലഭിച്ചിരിക്കുന്ന കേന്ദ്ര അനുമതിയെ കുറിച്ച് ഇടത് സര്ക്കാര് ഇതുവരെയും പ്രതികരിച്ചിട്ടില്ല. യുദ്ധകാലാടിസ്ഥാനത്തില് പഴുതുകളടച്ച് സാധ്യതാ പഠനം നടത്തി റിപ്പോര്ട്ട് സമര്പ്പിച്ചാല് നരേന്ദ്രമോദി സര്ക്കാരിന്റെ കാലത്ത് തന്നെ പാരിസ്ഥിതികാനുമതി നേടാനാകുമെന്ന പ്രതീക്ഷയാണ് മുല്ലപ്പെരിയാര് സമരസമിതിയുള്പ്പെടെ പങ്കുവെയ്ക്കുന്നത്.
കേരളത്തെ സാരമായി ബാധിച്ച പ്രളയകാലത്ത് മുല്ലപ്പെരിയാര് അണക്കെട്ടിന് കേടുപാടുകള് സംഭവിച്ചതായി വാര്ത്തകളുണ്ടായിരുന്നു. ജലനിരപ്പ് 142 അടിയിലും മുകളിലേക്ക് ഉയര്ന്നതോടെ ആ സമയത്ത് ജലനിരപ്പ് 139 അടിയായി കുറയ്ക്കാന് സുപ്രീംകോടതി തമിഴ്നാടിന് നിര്ദേശം നല്കിയിരുന്നു. എന്നാല് പ്രളയാനന്തരം പുതിയ അണക്കെട്ട് നിര്മ്മിക്കാനുള്ള നടപടികള് സ്വീകരിക്കാതെ മുല്ലപ്പെരിയാര് അണക്കെട്ടിന്റെ താഴ്വാരത്തും പെരിയാറിന്റെ ഇരുകരകളിലും പുതിയ നിര്മാണങ്ങള് നടത്തുന്നത് ഭാവിയില് കൂടുതല് ദുരന്തങ്ങള്ക്ക് കാരണമാകുമെന്ന് വിലയിരുത്തപ്പെടുന്നു. അതേസമയം തമിഴ്നാട് ഉന്നത ഉദ്യോഗസ്ഥരെ ഉള്പ്പെടുത്തി പത്തംഗ സമിതിയെ പുതിയതായി രൂപീകരിച്ചുകഴിഞ്ഞു. കേരളത്തിന്റെ നീക്കങ്ങളെ പ്രതിരോധിക്കാന് ഈ സമിതിയെ പ്രയോജനപ്പെടുത്തുകയാണ് ഇതിലൂടെ ലക്ഷ്യവെക്കുന്നത്.
സതീഷ്. കെ.എസ്
