തൃശൂര്: വിശ്വാസവും അവിശ്വാസവും തമ്മിലുള്ള മത്സരമാണ് ശബരിമല സ്ത്രീപ്രവേശന വിഷയമെന്ന് ചലച്ചിത്ര താരം ദേവന്. തൃശൂര് പ്രസ് ക്ലബ്ബില് വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
വേണ്ട വിധത്തില് പഠനവും അന്വേഷണവും നടത്താതെയും അഭിപ്രായം ആരായാതെയും നടത്തിയ വിധി സുപ്രീംകോടതി പുനര്വിചിന്തനം നടത്തണം. വിധിക്കെതിരെ സംസ്ഥാന സര്ക്കാര് റിവ്യൂ ഹര്ജി കൊടുക്കില്ലെന്ന് ഉറപ്പായിരിക്കുകയാണ്. വാദി-പ്രതിഭാഗ അഭിഭാഷകരുടെ അഭിപ്രായങ്ങള് രേഖപ്പെടുത്താതെയാണ് സുപ്രീംകോടതി വിധി പ്രഖ്യാപിച്ചത്.
കോടിക്കണക്കിന് ഭക്തരുടെ വിശ്വാസത്തെ അവഗണിച്ചുള്ള വിധിയില് വളരെ ദുഃഖമുണ്ട്. സ്ത്രീ വിവേചനം എന്ന സാധാരണ കേസായി ശബരിമല വിഷയത്തെ കാണരുത്. പോസിറ്റീവ്, നെഗറ്റീവ് ശക്തികള് തമ്മിലുള്ള മത്സരത്തില് പോസിറ്റീവ് വിജയിക്കുമെന്നും അന്തിമവിജയം സത്യത്തിനായിരിക്കുമെന്നും ദേവന് അഭിപ്രായപ്പെട്ടു.
